Juswa 23 - Udél Dwata: Gna Kesfasad ne Lomi Kesfasad

Hol són udél Juswa ebè yó kem tau Israél

¹ Timbow deng hilu halayen bè yó, deng menek ne kbenwu le yó kem tau Israél lemwót bè yóm deng kehegmò Dwata kul bè yó kem hohon le. Ne deng tey tuha ne Juswa.

² Yó gónón htaba yó kem tuha bè yó kem tau Israél ne yó kem tau gónó le gel galak ne yó kem gel kmukum lem blóng le ne yó kem dumu tau wen glalen bélê le, monen mò kul, “Ni denge tey tuha lem blóng ye.

³ Deng gotu ton ye yóm kdê nmò Dwata bè yó kem dumu but tau bè nim benwu ni lanen tmóbóng kuy. Yóm kut Dwata hol gónó mogot deng sfatay bè yó kem hohon tekuy.

⁴ Deng sket nólólu bè yó kem ból ye klamang nim tonok ni lenwóten bè Él Jurdan fi dmata kdaw efet kól bè Mohin Miditiranyan fi desdef. Yóm kul tonok yó kem tau deng hdó tekuy dalang se yóm kul tonok yó kem tau tolo tebel tahen deng gotu nólólu bélê ye.

⁵ Angat kuy se funen nim tonok ni, yakà angat gotu lo Dwata lu yó kem tau tolo nô tahen bè yóm angat khusek ye elemen. Yu se tles nô tahen lómón yóm deng fasad Dwata kuy yóm sana kut Dwata hol gónó mogot.

⁶ Yó gónóm mon hol ye setgel. Hol bê ye abay klifót lemolò du yóm kdê deng snulat Musis lem yóm Bok Hlau. Béen abay wen nulé ye du.

⁷ Ke ni se nmò ye, là kô gbek ye du mit sbilà bè yó kem tólóng tau dù tebel ta nim tonok ni. Yó kem kul dwata lennged, balù olo moluy yóm kul boluy hol bê ye abay nmò. Là se hyuhen ke hlan ye bè boluy le ke mò ye fasad. Hol bê ye abay tmaba ebélê le ne bê ye abay mni tóbóng bélê le.

⁸ Okóm henlel ye mimón du yóm sana kuy Dwata hol gónó mogot lómón se yóm gel nmò ye ni kmoen ni.

⁹ Bè yóm khusek ye elem nim benwu ni, deng gotu lo Dwata yó kem tau alì wen ne mbegel senta ye. Laen dù bélê le ke deng le gemmò bélê ye.

¹⁰ Baluen ke tek sotu bélê ye, gbeken hlóy lemibu hohonen abay se eles mung bélê ye sfatay Dwata yóm sana kut Dwata hol gónó mogot, lómón yóm deng fasaden tekuy.

¹¹ Duhen yó, hol bê ye abay kó yóm kbong nawa ye yóm sana kuy Dwata hol gónó mogot.

¹² Okóm ke knogol ye Dwata ne gmung ye bè yó kem tólóng tau dù tebel ta nim tonok ni ne ke myehen ye bélê le,

¹³ tódô eles tulónu kuy, là kô bud lo Dwata du bélê ye ni kem dù hohon ye ni ke sok nundug ye lu. Deng mom lu gónó ye gholot, duhen ke lu yóm blatik gónó ye bkó. Ne tey sidek kdesen bélê ye, lómón ke nfes le gu tekwang ye ne lómón ke huling ye sual. Ngangen mò du bélê ye yóm yó efet ye gotu mekfung ta nim tey tonok hyu deng blayen kuy yóm sana kuy Dwata hol gónó mogot.

¹⁴ Ni deng bangu mfu lem blóng ye. Yóm ket kuy na sotu tódô gnóm ye lemwót lem but blutut ye yóm deng keblay Dwata du kuy yóm kdéen hyu deng tehe fasaden kuy. Ket fasaden kuy sal dohò.

¹⁵ Yóm kdohò yóm fasaden kuy hol lómón yó se kdohò yóm ktafaken kuy ke là mimón ye efet ye gotu mekfung ta nim tey tonok hyu deng blayen kuy.

¹⁶ Ke nulé ye yóm deng senfasad ye Dwata ne ke tmaba ye ebè yó kem dumu dwata kéng ne demsù ye ebélê le, tey sidek kbuten kuy yóm sana kuy Dwata hol gónó mogot ne angat tey ktafaken kuy. Là kóen legen gotu ye mekfung ta nim tey tonok hyu deng blayen kuy.”