Juswa 2 - Udél Dwata: Gna Kesfasad ne Lomi Kesfasad

Khógów Juswa yó kem tau anì na le e henkana yóm benwu Jiriku

¹ Omin Juswa lifut mdók lewu tau lemwót bè yó bè kamfù le bè Akasya mò na a hemkana yóm benwu Kanan, hol néen yóm syudad Jiriku. Timbow le kól bè yóm syudad yó, yóm lewu kem tau hemkana yó koni, tódô le hlós ebè gónô yóm sotu libun hdóyón boluyen Rahab ne bè yó gónó le tungô.

² Tikóng gungol yóm tau hol geta bè Jiriku yóm kwen kem tau Israél gefet bè yó yóm kifu yó na a hemkana yóm benwu le,

³ yó gónón tminok ebè Rahab, monen, “Yó nógów yó kem tau nô bè gónóem na le e henkana yóm benwu tekuy. Hewaem lu.”

⁴ Okóm yó balà Rahab du, monen, “Tahu se yó, wen se kem tau deng gu bè ni bè gónô okóm là tngónu du gónó le gu lemwót.

⁵ Gu laanen là deng sdef kdaw eginu deng le sana lemwót anì là gtufì le bè yóm ktikeb le yóm bak tikeb yóm syudad tekuy. Là tngónu du bud gónó le e solu. Okóm ke kendel ktes ye lu, déke gafit ye lu.”

⁶ (Blaem yó nmò Rahab, deng sana nwiten lu ete ketef gónóen yóm lewu kem tau yó koni. Bnosen lu laan yóm gel newelen deng eles luduken ditu ta.)Kewót le bè yó yó kem tau dók yóm tau hol geta, hewà le bè yóm syudad yó anì na le e hnebel yó kem tau Israél. Uni le hewà bè yóm syudad le sen-geng le se tmikeb du yóm bak tikeb yó kem tau mentey bè yó. Ngang le mebel kul yó kem tau hemkana yó kem tau yó koni efet le kól bè lan mifal Él Jurdan.

⁷ Kewót le bè yó yó kem tau dók yóm tau hol geta, hewà le bè yóm syudad yó anì na le e hnebel yó kem tau Israél. Uni le hewà bè yóm syudad le sen-geng le se tmikeb du yóm bak tikeb yó kem tau mentey bè yó. Ngang le mebel kul yó kem tau hemkana yó kem tau yó koni efet le kól bè lan mifal Él Jurdan.

⁸ Okóm ditu bè gónô Rahab bè yóm kifu yó gu laan le là deng hlilil yó kem tau hemkana, motun ebélê le ete ketef Rahab

⁹ ne monen mò kul, “Tngónu deng blay Dwata kuy yóm sana kuy Dwata hol gónó mogot, nim tonok ni. Tódô kdê ni kem tau bè nim benwu ni, gotu le likò kuy.

¹⁰ Deng gungol me yóm kmò kehektihen du bélê ye yóm sana kuy Dwata yóm Mohin Hulô bè yóm ktagak ye yóm benwu Idyip. Bud gungol me snéen yóm kmò khatay ye ke Sihun ne Ug yóm lewu kem tau hol geta Amurayt menwu fi dmata kdaw Él Jurdan, hono kem tau deng gotu genlà ye.

¹¹ Yóm uni me mungol du ni kem ni ya tey klikò me, botong lana bélê me klóbô me. Yóm Dwata kuy gónó mogot, du se hol dandónen geta bè longit ne dini talak tonok.

¹² Ne ni smafà ye do bè yóm kuy Dwata yó, hol nmò ye bè yó kem fes lówóhu yóm hyu deng nmou bélê ye. Mò ye do ilô mò gónóhu smalig kuy.

¹³ Fasad ye dou yóm là khomong ye kul le mà ne yê ne yó kem logihu ne yó kem dumuhu setwoli libun ne kdê yó kem fes lówó le ke genlà ye nim benwu ni. Bê ye abay hnatay mi.”

¹⁴ Yó mon le mò ke Rahab yó kem tau hemkana yó koni, “Dwata he hol ma klowil me ke là nmò me du yóm mon me mò kóm. Ke laen dù tau tnulónem bè yóm nmò me yó fasad me kóm, là kô homong me kuy ke bang Dwata hemlus du kum nim benwu ni.”

¹⁵ Uma kóm yóm gónô Rahab yó, demket bè beng yóm syudad le. Yó gónón hlan kul yó kem logi yó koni, hlanen lu tembó beng mlan bè yóm fét hloyolen elaan.

¹⁶ Yó mon Rahab mò kul, “Mlóy ye bè tu kem bulul lemnek anì là ton le kuy yó kem dók yóm tau hol geta. Hlun ye hebnos ditu tlu kdaw efet le bud semfulék edini. Ke deng le bud semfulék edini, omin ye yó he hlós mulék.”

¹⁷ Yó mon le mò ke Rahab yó kem logi yó koni, “Angat dohò yóm fasad me kóm.

¹⁸ Ni mò hol nmoem ke sok hnusek me nim benwu ni, hol tléwéngem nim fét hulô nii bè yóm bak bngaw yóm gónóm hmoyol kum. Eles nangayem le maem ne yéem ne yó kem logihem ne kdê yó kem fes lówó maem, gotu ye sbung bè ni bè gónóem.

¹⁹ Bè yóm kdaw yó ke wen hewà bélê ye, kun salà ke angat matay, là kum snolu du. Okóm ke wen bélê ye nô lem gónô ne wen hemenen, kum snolu se yó.

²⁰ Ke wen tau tnulónem bè nim nmò me ni, là kô dnohò me du yóm deng fasad me kóm.”

²¹ Ne knotuk Rahab yóm mon le yó, ominen hewót kul. Bè yóm deng kewót le, tléwéngen bè bak bngawen yóm fét hulô mon le mò du yó koni.

²² Lemwót yó kem tau hemkana yó koni, tódô le hlós etu bè tu kem bulul lemnek ne ditu gónó le hebnos. Botong tlu kdaw le kegen le tendo mebel kul yó kem dók yóm tau hol geta, okóm là kô ton le kul ne yó gónó le tódô bud beklil semfulék ebè Jiriku yó kem dók yóm tau hol geta yó koni.

²³ Ne yó he kosol le se kul yó kem lewu tau hemkana nifal le Él Jurdan, mulék le ebè Juswa. Gotu tulón le ke Juswa yóm kdê glan le

²⁴ ne yó udél le, mon le, “Deng hol tahu blay Dwata tekuy yóm benwu Kanan. Tódô kdê yó kem tau bè yó, tey sidek klikò le bélê tekuy.”