Juswa 10 - Udél Dwata: Gna Kesfasad ne Lomi Kesfasad

Yóm là kegmò yóm limu kem tau hol geta bè kem Amurayt

¹ Deng gotu gungol Adunisédék yóm tau hol geta bè Jirusalim, yóm deng gotu kegbà Juswa yóm syudad Ay ne yóm deng khatayen yóm tau hol geta bè yó, lómón yóm deng tehe nmoen bè Jiriku ne bè yóm tau hol geta bè yó snéen. Gungol Adunisédék snéen yóm deng kwit le sbilà bè yó kem tau Israél yó kem tau bè syudad Gibyun ne deng le menwu moni bè yó kem tau Israél.

² Ya tey sidek klóngón nawa yó kem tau bè Jirusalim bè yóm kungol le du yóm yó, abay se yóm Gibyun syudad bong mkél bè yó kem dumu syudad wen mdengen tau hol geta le. Nim syudad ni, bong senta Ay ne tey le hulung sfatay yó kem sendalù bè yó.

³ Ne yó gónó Adunisédék mdók tau ebè Hoham bè Hibron ne bè Piram bè Jarmut ne bè Jafiya bè Lakis ne bè Dibir bè Iglun, monen,

⁴ “Hol ye mógów dou edini ne ye e tnóbóng ou mundug yó kem tau bè Gibyun, abay se deng le mit sbilà bè le Juswa ne bè yó kem tau Israél.”

⁵ Tahu se, lemwót nim limu kem tau hol geta bè kem Amurayt ni gotu sentnù le lu yó kem sendalù le. Omin le lemwót na le e snibut yóm syudad Gibyun, omin le gmida du.

⁶ Lemwót se kul yó kem tau bè Gibyun, wen tau kendel dók le ebè Juswa bè yóm gónón kmamfù bè Gilgal. Yó udél hwit le du, mon le, “Hol béem tódô bayà mi, Sér. Holi géhél mógów kum edini nam e tnóbóng mi. Deng le gotu ssotu yó kem tau hol geta bè kem Amurayt ne deng nundug le mi. Hol hewaem mi, Sér.”

⁷ Tahu se, kendel le lemwót bè yó bè Gilgal le Juswa ne kdê yó kem sendaluen, gomong yó kem sendalù deng alì layam bè sfatay.

⁸ Bè yóm kewót le, yó mon Dwata mò ke Juswa, “Hol béi abay hlikò bélê le. Deng blayu lu elem hólólem. Bà sotu bélê le ke gembek kóm.”

⁹ Tódô suloy le buteng le Juswa ne yó kem sendaluen mógów, lenwót le bè yó bè Gilgal mneged le ebè Gibyun na le e kentut nundug yó kem tau Amurayt.

¹⁰ Ya tey kehlangaf Dwata kul yó kem tau Amurayt bè yóm kton le yó kem sendalù Israél. Tey dê bélê le hnatay yó kem sendalù Israél bè yó bè syudad Gibyun ne ktes le mosol yó kem dumu lenwót le bè bulul Bét Horon efet kól etu bè benwu Asika ne etu bè benwu Makida ne tey dê bélê le hnatay le gu bè lan.

¹¹ Bè yóm igò le mlóy mosol yó kem tau Amurayt, yó nmò Dwata hetbóhen eta le yóm tey bulók kulón. Ngangen hetbó du eta le efet le kól ditu bè benwu Asika. Tey dê bélê le matay bè bulók kulón senta yóm kul hnatay yó kem tau Israél.

¹² Bè yóm kdaw kehegmò Dwata yó kem tau Israél bè yó kem tau Amurayt, tódô mdà bè solu yóm kdéen tau Israél Juswa, yó udélen ebè Dwata, monen, “Ó kdaw, nahi htengen ta Gibyun, Ó bulón, hetnui ta Datal Adyalon.”

¹³ Tahu se, tódô htengen yóm kdaw ne yóm bulón là kóen mili efet le gotu gemmò bè yó kem hohon le yó kem tau Israél. Nim nmò Dwata bélê le ni deng gotu snulat le bè bok Jasar. Tódô henek bè gónón sóól longit yóm kdaw, là se mosolen bè yóm kdaw yó.

¹⁴ Bè yóm kdaw yó, Dwata se mung kul sfatay yó kem tau Israél. Balù sulék bè gnan kdaw ne efet nim kmoen ni ke lómón ni yóm kmò kógów kdaw, bè yóm tódô kimón Dwata du yóm udél tau.

¹⁵ Kogol yóm kesfatay le yó, gotu le mulék ebè kamfù le bè Gilgal le Juswa ne yó kem sendaluen. Là gomongen bè nili yóm tsaptér 10:16 efet kól bè tsaptér 12:34. Yó tulónen bè sfu yóm tsaptér 10 efet kól bè tsaptér 11 yóm kmò khatay le Juswa ne yó kem sendaluen yóm limu kem tau hol geta bè kem Amurayt deng eles setgel mundug yó kem tau Gibyun. Tulónen bè ni snéen yóm kmò keglà Juswa yó kem syudad nô fi leged bè yóm benwu Kanan ne yóm bud kegmoen bè yó kem tau hol geta nô fi debwak bè benwu Kanan. Kogol yóm kegmò le yó na le na hegnô. Okóm bè yóm kdaw yó, tolo wen he tonok là deng gwa le du. Yó tulónen bè tsaptér 12 yóm tehe kegmò Musis bè yóm lewu kem tau hol geta nô fi dmata kdaw Él Jurdan. Tulónen bè ni snéen yóm boluy yóm tlu folò sotu kem tau hol geta gónó Juswa gemmò nô fi desdef Él Jurdan. Yó tulónen bè tsaptér 13 efet kól bè tsaptér 19 yóm kmò kólól le Juswa du yóm tonok nwa le bè Kanan. Tódô nólól le bè yó kem sfolò sotu ból Israél, abay se yó kem sfu Libay laen dù kul ólól. Yó henged kul ólól, wen nwa le bè yóm gel dsù yó kem tau Israél ebè Dwata. Là gomongen bè nili tsaptér 20. Yó tulónen bè tsaptér ni yó kem syudad deng htólóng yó kem tau Israél mò gónón e mlóy yóm tau ke wen ghatayen. Yó tulónen bè tsaptér 21 wen kem syudad bè Kanan deng blay Dwata bè yó kem sfu Libay mò gónó le nô ne mò gónó le mò nmò gu laanen là deng wen nmò le bè yóm Gónô Dwata. Yó tulónen bè tsaptér 22 yóm bud kesfulék yó kem dumu tau Israél ebè yóm tonok tehe blay Musis kul nô fi dmata kdaw Él Jurdan.