Juswa 1 - Udél Dwata: Gna Kesfasad ne Lomi Kesfasad

Eles kehgel Dwata nawa Juswa bè yóm kled Juswa yóm benwu Kanan

¹ Kogol yóm katay Musis yóm tau tóbóng lówó Dwata, yó udél Dwata ebè Juswa yóm ngà Nun tehe tóbóng lówó Musis, monen,

² “Deng matay Musis, yóm tóbóng lówóhu. Yó gónóm mon, uu se tles mit kul yóm kdéen tau Israél na ye e nifal yóm Él Jurdan, mógów ye etu bè yóm tonok blayu kuy.

³ Deng tehe wen fasadu ke Musis bè yóm tonok yó. Yó fasadu du, balù kihu gónó ye e gefet ta yóm tonok yó, gotu blayu kuy.

⁴ Yó gónón gkilil yóm tonok yó, lenwóten fi leged bè yóm benwu laen hol wen tauhen efet kól fi bwak yóm Bulul Libanun. Yó bud kililen fi dmata kdaw, lenwóten bè Él Yufratis, hnalaken benwu yó kem tau Hitayt efet kól bè fi desdef Mohin Miditiranyan.

⁵ Bè yóm klawihem mowil, Juswa, laen kô gembek gemmò béléem, yakà tódô senflósu du nô béléem lómón yóm tehe knóu bè Musis. Là kô naw e tnagak kóm ne là se kô naw e tódô bayà kóm.

⁶ Hol hotuhem gelem ne hol hfólem nawam, yakà uu du malak kul ni kem tau ni eta yóm tonok tehe fasadu yó kem tehe fù ye.

⁷ Hol hotuhem gelem ne hol hfólem nawam. Hol nimónem yóm kdê deng hlau Musis kuy yóm tau tóbóng lówóhu. Hol béen abay wen nuléhem du anì wen uléken yóm gel nmoem.

⁸ Hol gel senfalahem yóm bok gónón nô yó kem hlauhu kuy. Eles tendo suem bè nawam senflósen kdaw ne kifu ne hol nimón ye yóm kdê snulat lemen. Sónen bè yó se gónón hyu kógów klowilem ne gónóm gembek mò du yóm hmou kóm.

⁹ Ni hol monu mò kóm, hol hotuhem gelem ne hol hfólem nawam. Béi abay hlikò ne béi abay htakas, yakà ou du yóm sana kóm Dwata hol gónó mogot ne tendohe nô béléem balù kihu gónóm e solu.”

Eles kehtifes le bè yóm móyón kifal le yóm Él Jurdan

^10-11 Omin Juswa htaba yó kem tuha gónó le gel galak yó kem tau Israél, monen mò kul, “Hol ye mógów ebè klamang yóm kamfù tekuy anì tulón ye yó kem tau Israél eles le hemtifes ken, abay se tek tlu ni ne duen kifal tekuy du yóm él Jurdan ne kled tekuy du yóm tonok blay Dwata tekuy yóm sana kut Dwata hol gónó mogot.”

^12-13 Omin Juswa htaba yó kem sfu Rubén ne sfu Gad ne sóól bè yó kem sfu Manasi, monen mò kul, “Hol hentulón ye nawa yóm tehe udél Musis ebélê ye yóm tau tóbóng lówó Dwata. Yó tehe monen mò kuy, ‘Deng blay Dwata kuy nim tonok fi dmata kdaw Él Jurdan ni mò kuy gónó henek nô.’ Yó se tehe udél Musis ebélê ye.

¹⁴ Ne ni,” mon Juswa, “lemwót yó kem yehen ye ne yó kem ngà ye ne yó kem ógóf ye, fen le tebel bè ni kul tahen. Okóm yó kem sendalù ye, eles lesek le yó kem ngom le sfatay ne fen le mifal Él Jurdan tukô gna yó kem dumu le Israél na le e tnóbóng lu

¹⁵ efet le gnô ta yóm tonok deng blay Dwata kul nô fi desdef Él Jurdan. Ke deng tilob kehnô Dwata kul tahen yóm tonok yó, omin ye yó he mulék edini anì na ye e nô ta yóm kuy tonok bè ni fi dmata kdaw Él Jurdan, yóm tonok deng blay Musis kuy yóm tau tóbóng lówó Dwata.”

¹⁶ Ne yó balà le ke Juswa, mon le, “Balù kihu hmoem kum nmò me. Ne balù kihu gónóm e mdók kum, nógów me.

¹⁷ Nimón me uu lómón yóm tehe kimón me ke Musis. Yó hem kóm sana Dwata hol gónó mogot tendo nô béléem lómón yóm tehe knóen bè Musis.

¹⁸ Ke wen bélê me hemda kóm ne là nimón le du yóm hmoem kul, tódô hnatay kmò du. Duhen yó, holi hgel kut ne hol hfólem nawam.”