Juna 4 - Udél Dwata: Gna Kesfasad ne Lomi Kesfasad

Yóm kebut Juna ne yóm kkodu Dwata

¹ Okóm ke Juna kun, là kóen hligal du yóm là dog ktafak Dwata kul yó kem tau bè Ninibi, deng mom lembut.

² Ne yó gónón mni bè Dwata, monen, “Ó Dwata, tahu se yóm tehe monu gu laanu là deng lemwót bè yóm tehe kdókem do. Yó tehe monu, là kô genbaem du Ninibi. Yó se tehe tô gónóhu mógów ebè Spén. Deng eles tngónu yóm tey kbong nawahem tau ne yóm tey kkoduhem kul. Deng tngónu snéen yóm tey khanayem nawahem ne yóm tey kehyuhem bè tau. Mahil béléem gel hmifót kul senta ke tnafakem lu.

³ Ne ni, Dwata, géhél nwahem klowilu ne. Mom hyu nawaw tódô kem matay ne.”

⁴ Ne yó balà Dwata ke Juna, monen, “Hyu kô, Juna, yóm alì kebutem yó?”

⁵ Omin Juna mógów fi dmata kdaw bè yóm syudad yó ne bè yó gónón myón. Wen slung nmoen mò gónón hgolung, nangaten ke tedu angat nmò Dwata bè Ninibi.

⁶ Ne yó nmò Dwata, wen hulu lemfà htowoken eta yóm slung Juna mò temnù gmolung du anì hyu kegnómen du. Ya tey kehyu nawa Juna du yóm hulu yó.

⁷ Okóm hayahen bè yó, bè yóm deng kebtù mata kdaw, wen kuled hken Dwata du yóm hulu yó ne menes.

⁸ Timbow deng malù tahà kdaw, hyuf Dwata gu fi dmata kdaw yóm tey lenos kinì eta Juna, botong kfuteng bà mon tey ékét kdaw mnóng etahen. Hol kóyô Juna ke matay. Yó monen, “Mom hyu nawaw tódô kem matay ne.”

⁹ Okóm yó bud mon Dwata mò du, “Hyu kô, Juna, yóm alì kebutem du yóm kenes yóm hulu yó?” Bnalà Juna se, monen, “Wen se buten nim kebutu ni. Tumù nawaw tódô kem matay ne.”

¹⁰ Yó bud mon Dwata mò du, “Yóm hulu ni, tek suloyen tmowok. Hayahen bè yó, menes. Laen dù kóm liteg du ne là hlowilem du se kóm, okóm botong gkoduhem.

¹¹ Milud he kkoduhu du yóm tey syudad Ninibi ni. Mukas lematu lewu folò libuhen kem ngà lemnek nô bè yó, kem ngà laen dù deng sidek tngón le. Lelen tey wen kem ógóf he bè yó.”