Juna 3 - Udél Dwata: Gna Kesfasad ne Lomi Kesfasad

Kimón Juna ke Dwata

¹ Omin Dwata bud mudél ebè Juna,

² yó monen mò du, “Yó ne Juna, hlósi ebè Ninibi ebè yóm tey syudad bong, nam e tulón yó kem tau bè yó yóm htugodu kóm.”

³ Tahu se, nimón Juna Dwata ne mógów ebè Ninibi. Yó kbongen yóm syudad yó ke tnonokem, tlu kdawem mógów bè sóólen, ominem gefet bè dolihen.

⁴ Botong sendaw Juna mógów lem yóm syudad yó, ominen yó hetngón du kul yóm udél Dwata ebélê le, yó monen, “Tek fat folò buteng duen kegbà Dwata yóm syudad Ninibi.”

⁵ Tahu se, hentahu yó kem tau bè Ninibi yóm udél Dwata ebélê le. Yó nmò le, gotu le fasting yóm kdê le, lenwóten bè yó kem tau hol geta kkólen bè yó kem tau glaan. Gotu le mnes sakù mò gónó le hegfan du yóm deng kehegsel le.

⁶ Timbow gungol yóm tau hol geta bè Ninibi yóm hetngón Juna yó koni, tódô tebelen yóm gónón gel myón kmukum, tódô nlusen yóm nes tau hol geta leseken ne tles mnes sakù se kun ne tódô myón ta kohù, yó se yóm kul gel adat.

⁷ Wen udin hwiten ebè yóm kdéen tau bè Ninibi, yó monen, “Ni se udin hol lemwót bè yóm kuy Tau Geta ne bè yó kem genlalen. Hol béen tagad wen tau mken duhen ke minum él. Balù yó kem safì ne yó kem ubiha, hol bê ye tagad henken lu ne hinum lu.

⁸ Kdéen tau gotu mnes sakù. Balù yó kem ógóf ye, nmò ye sakù le. Tódô kdéen tau hol mni bè Dwata ne hol tebel ye yóm kdê sidek gel nmò ye.

⁹ Là tngón te du ke tenles Dwata hendemen, mkó yóm kebuten tekuy ne yó se gónó tekuy là matay.”

¹⁰ Tahu se, ton Dwata yóm nmò le yó ne tonen se yóm gotu ktebel le du yóm kdê sidek gel nmò le. Yó gónón temles hendemen ne là kô dohò tnafaken kul, lómón yóm tehe monen mò kul.