Juna 1 - Udél Dwata: Gna Kesfasad ne Lomi Kesfasad

Yóm là kimón Juna ke Dwata

¹ Sotu kdaw, mudél Dwata ebè Juna yóm ngà Amitay logi

² yó monen mò du, “Ó Juna, mógówi etu bè Ninibi bè yóm tey syudad bong, nam e tulón yó kem tau bè yó yóm deng khulenu kul lemwót bè yóm deng kgulé yóm sidek nmò le.”

³ Okóm mom yó atul Juna, mógów ebè yóm tólóng benwu alì mayuk bè Ninibi, tô henlóyen Dwata. Yó gónón lemwót mógów ebè Jupa, yóm sotu syudad nô bè kilil mohin, ne bè yó gónón mton du yóm kafal mógów ebè Spén. Tódô kendel bnayaden yóm sukéyen anì hsakay le, mung bè yó kem tau gel mò nmò bè kafal anì yó, wen lanen tô hlayuk bè Dwata.

⁴ Okóm yó nmò Dwata, hbelen yóm tey lenos bong te mohin ne tey lewók setbulù, deng tô gbà yóm kafal le.

⁵ Ya tey sidek klikò yó kem tau mò nmò lemen, tódô ket tau tmaba ebè yóm kun dwata gónó hemtahu, lel le gotu mbot elem mohin yó kem dumu lulón le anì malù maan yóm kafal. Okóm ke Juna kun, mom henga tungô ditu laan lem bediga yóm kafal.

⁶ Timbow ton yóm kfitan mit kafal, monen mò du, “Tedum tlek tnungóem ni du? Btiki ne géhéli mni tóbóng bè yóm kóm dwata. Nénég ke wen koduhen tekuy ne ke hlowilen tekuy.”

⁷ Ne lemwót yó kem tau gel mò nmò bè kafal gotu le stulón, yó mon le, “Yake mò tekuy atù anì tngón tekuy lewóten yóm tey gfà tekuy ni.” Tahu se, mò le atù ne kun boluy Juna yóm gwa le.

⁸ Ne omin le smólók ke Juna, “Hol tulónem kum kun ke uu buten yóm tey glumfak tekuy ni? Tedu se nmoem bè ni du? Benwu du gónóm gu lemwót? Tmau kóm de?”

⁹ Bnalà Juna lu, monen, “Tauhe Hibru se do. Yó do gónó hemtahu bè yóm Dwata nô bè longit. Du se tehe dmimun tonok ne mohin.”

¹⁰ Ne bud tulón Juna kul yóm kehlóyen ke Dwata. Bè yóm kungol le du yó kem tau gel mò nmò bè kafal, tey sidek klikò le ne mon le mò du, “Tey alì gedlug ksideken yóm nmoem ni.”

¹¹ Bè yóm igò le stulón, sónmoen temnù yóm tey lewók ne yó mon le mò ke Juna yó kem tau gel mò nmò bè kafal yó, “Tedu se tô kmò me kóm du anì teflok yóm tey lewók ni?”

¹² Bnalà Juna lu, monen, “Són gónón menek ke tódô bot ye o elem mohin. Tódô tngónu lemwót bè dou salà gónó ye gmumfak du nim ni.”

¹³ Okóm mom yó nmò yó kem tau gel mò nmò bè kafal, tódô hotu le gel le tô kemwa du ebè kilil yóm kafal. Tnódónem mom lenwéen yóm tey lewók ne là kô le gili bè yó.

¹⁴ Ne omin le tmaba ebè Dwata, yó mon le, “Ó Dwata, ni hol hni me béléem, hol béem abay hbô kum klowilen nim tau ni. Lemwót béléem yóm gfà me ni, uu se mò du.”

¹⁵ Omin le tódô mbot ke Juna elem mohin ne tódô sen-gengen se teflok yóm tey lewók.

¹⁶ Bè kton le du nim ni, botong le likò ke Dwata yó kem tau gel mò nmò bè kafal. Yó nmò le, wen dsù le ebéléen ne fasad le yóm kimón le du.

¹⁷ Bè yóm kbot le ke Juna yó, wen tey utón bong dók Dwata mò na a hemlo du. Botong tlu buteng Juna nô lem blutut yóm utón yó.