Job 5 - Udél Dwata: Gna Kesfasad ne Lomi Kesfasad

¹ Yó bud mon Ilifas mò ke Job, “Ke tói tmaba anì wen tmóbóng kóm, laen kô bang na a hmungol kóm. Ke tói htóbóng bè yó kem hógów Dwata nô bè longit, laen kô dù bélê le tmóbóng kóm snéen.

² Tey nungel yóm tau hmosok ke Dwata ne yó se gónón angat meglà. Tey tau là hulungen hedem yóm tau mélés nawahen ne yó se but angat gónón matay.

³ Ni se yóm dou deng ton, yóm tau nungel knogolen Dwata, baluen ke hyu klowilen là kóen gfu yóm kehyu klowilen yó, tódô mekto sut béléen hlayam.

⁴ Tódô gbayà yó kem ngaen, laen kô dù gónó le e mlóy. Balù sotu ke wen mfi kul bè gónô skukum.

⁵ Yó kem tbas yó kem tau nungel gotu hennagaw yó kem tau bitil. Balù yóm tmowok gu lem sual gotu hennagaw le. Ne yó kem kendengen le, gotu nwa yó kem tau alì henkoso le kwen kendengen le.

⁶ Okóm yóm sidek, là kóen na a tódô sut gu lem tonok. Dalang se yóm gfà là kóen na a tódô tmowok te tonok.

⁷ Bè ktahuhen, yóm tau sal gel wen hlayam msut bè klowilen. Lómón se yóm ofi sal gel wen kutuhen.

⁸ Ke ou uu, kaem ebè Dwata gónów tódô e smolu hkukum du yóm hlayamu.

⁹ Là kô deng hol glileb te du he yóm tey hyu gel nmoen. Là kô gbek te msó kul yó kem hentaw ton gel nmoen.

¹⁰ Gel hkulónen ete tonok. Gel hnéféen yó kem hulu.

¹¹ Gel hegetahen yó kem tau hulung heglaan ne bud hbegelen kdà yó kem langag.

¹² Gel hensengen atul yó kem lemingko anì laen dù uléken yóm gel nmò le.

¹³ Yó kem tau temngón alì le hulung smukat sal gel wen lan Dwata hemseng du yóm atul le.

¹⁴ Yó kem tau yó, baluen ke gtungó kdaw lómón kmoen bélê le lómón ke tau butô gel migóf. Là mton le ke kifu, senged nóm ke kemdaw là kô le mton.

¹⁵ Okóm kul yó kem tau élél lenwà Dwata lu ke wen udél le sidek eta le yó kem tau wen kfasang le. Lenwaen lu lem hólól yó kem tau gel hemgnok kul.

¹⁶ Yó gónóm mon, wen nefet nawa yó kem tau élél ne Dwata fen hemseng kul yó kem tau là tedeng nmò le.

¹⁷ Okóm hligal kun yóm tau ke wen gónó Dwata semtódô du. Hol béem tnagaw nawa ke wen gónó Dwata mólów kóm.

¹⁸ Yóm Dwata ke hnalien uu, bud du se mulung du béléem. Ke kun tdok hemsidek kóm bud kun tdok se hkó du.

¹⁹ Tendo gel lenwaen uu bè yóm gónón wen gfaem.

²⁰ Kesok mbel bitil sal gel lenowilen uu. Ne ke mungi bè gida sal gel kenlungen u bè hatay.

²¹ Ke wen tô dmelem kóm, Dwata se gel mofin kóm. Ke wen gemlà kuy, laen dù knikoem se kóm.

²² Mom knulihem yóm keglà ne yóm kbitil. Ne là kói likò du yó kem ógóf lóbô lem bnes.

²³ Ne baluen ke alì bnotu yóm dnaduhem laen dù gónó le sidek yó kem huluhem. Dalang se yó kem ógóf lóbô lem bnes laen dù bélê le hemsidek kóm.

²⁴ Duhen yó angati henek nô lem gónóem. Ke gel hnénégem yó kem ógófem, balù sotu ke wen lana bélê le.

²⁵ Yó kem ngaem angat tey kwen le. Ne yó kem semfu gu béléem, lómón angat kwen le lómón yó kem bnes gónó ye gel hótób ógóf.

²⁶ Angat tey ktahà klowilem. Hol lómón yóm halay, là kô nuta le du efet tilob khulóen.

²⁷ Deng legen ne kehnagì me du nim ni, tódô tngón me hono tahu. Hol hnungolem nim udélu ebéléem ni mò nit nawahem.”