Job 42 - Udél Dwata: Gna Kesfasad ne Lomi Kesfasad

¹ Ne omin Job bud malà ke Dwata, monen,

² “Ó Dwata, tngónu uu se yóm gembek mò du yóm kdéen. Laen kô dù tau gembek hemseng du yóm kóm atul.

³ Deng snólókem ou, monem, ‘Tmau kóm de mudél laen dù lem, tô smólók yóm dou khulung hedem?’ Tahu se, Dwata, deng tey dê udélu gbak bè yóm là deng tngónu du ne gbak ebè yóm tey tennga là kô deng glilebu du.

⁴ Deng monem mò do ‘Holi hmungol, wen udélu ebéléem. Wen kem sólóku kóm ne hol bnalaem.’

⁵ Tahu se, Dwata. Bè gnan olohu mungol du yó kem tulón le do lemwót gu béléem. Okóm ni, deng hol dou mata mton kóm.

⁶ Duhen ni, deng tey sidek kyaku bè yóm kdê deng monu. Ni se gónów myón lem kfung ne lem kohù mò gónów hegfan du yóm deng tey kegselu.”

Són yóm tutul Job

⁷ Tikóng deng kudél Dwata ebè Job, yó bud udél Dwata ebè Ilifas yóm tau lemwót bè Timan, monen mò du, “Lenbutu uu ne yó kem lewu weem mung kóm, abay se là tódóen yóm tulón ye lemwót béléu lómón yóm deng kun nmò Job yóm tau tóbóng lówóhu.

⁸ Yó gónóm mon, mit ye ebè Job hitu safì tudu ne hitu se ubiha logi mò dsù hkekeb ye bè yóm kuy knô. Angat mni bélê ye Job yóm tau tóbóng lówóhu ne angat bnalau yóm hnihen yó ne là kô tafaku du kuy yóm tafak mò bang bayad yóm salà nmò ye. Yó tô gónóhu tmafak kuy abay se là tódóen yóm deng tulón ye lemwót gu béléu lómón yóm deng kun nmò Job yóm tau tóbóng lówóhu.”

⁹ Tahu se, nmò le Ilifas yóm tau lemwót bè Timan ne Bildad yóm tau lemwót bè Suwa ne Sufar yóm tau lemwót bè Naama, yóm hmò Dwata kul yó. Ne mni bélê le Job ne bnalà Dwata se yóm kni Job.

¹⁰ Timbow deng kogol yóm kni Job bè yóm tlu kem ween, ya tey bud kehdengen Dwata du. Botong lewu duléken bud hulék du ebè Job yó kem deng lana béléen.

¹¹ Ominen yó, tódô kdê yó kem dumun setwoli Job ne kem ween gotu mauy du ne mung le hligal mken béléen bè gónóen. Gotu le gbót béléen bè yóm ksidek kegnómen du bè kdê yó kem gfà deng hwit Dwata ebéléen. Wen filak blay le du yóm ket kul na sotu ne wen tising blówónen.

¹² Duhen yó, ya tey bud kuyag Dwata ke Job bè yóm dù kdawen mowil, mkay bè yóm gnahen he yóm bud któbóngen du ni. Yó bud kdê ubiha Job, botong sfolò fat libuhen ne nem libu kamélen ne lewu libu safien ne lemibu kudà asnuhen.

¹³ Bud wen hitu ngaen logi ne tlu ngaen libun.

¹⁴ Yó boluyen du yóm ngaen twogu libun, Jimima, tmodol Kisiya ne yóm hol són twoli bélê le boluyen Kérén-hapuk.

¹⁵ Laen dù libun bè klamangen benwu le ke mkél bè ktilob yó kem ngà Job libun. Gotu wen se kul ólól bè keblay mà le yó kem logi le.

¹⁶ Kogol nim gfà Job ni, yó kegenen na bud mowil botong lematu bud fat folò halay. Nahen na gafit ton lu he yó kem téméen ne yó kem fuen.

¹⁷ Ne song matay deng tey tuha ne deng tey gsengel klowilen.