Job 40 - Udél Dwata: Gna Kesfasad ne Lomi Kesfasad

¹ Omin Dwata bud mon du mò ke Job,

² “Bud natuem o he kô, Job, igoen ou se yóm Dwata laen dù là gbeken du? Tey dê udélem etahu, hyu se ke bnalaem yóm sólóku kóm?”

^3-4 Omin Job mudél, monen, “Ó Dwata, tauhe laen dù tngón yóm ou. Laen kô dù balau kóm. Sentikomu ne yóm sumóngu.

⁵ Tey gulé ne yó kem deng udélu. Ne ni laen bud duen ne.”

⁶ Omin Dwata bud mudél ebè Job gu lem yóm tey lenos bong, monen,

⁷ “Hbegelem kdaem, Job, hol bnalaem yó kem bud sólóku kóm.

⁸ Yóm tô nmoem ni, tô hegfanem kô yóm là ktedengu anì gfan yóm kóm ktedeng?

⁹ Senged kgis te kô yóm lewu te? Gbekem kô mudél lómón yóm dou kudél hlanu bè lugung?

¹⁰ Ke gbekem, yó kun hegfanem yóm kegetahem. Lesekem yóm nes alì tilob gel lesek yóm tau hol geta mò klóónen.

¹¹ Temngeli ebè yó kem tau alì hegmón kun, lusem eta le kun yóm kebutem anì hol gnóm le.

¹² Hol tenngelem lu dé ne ndaem lu elaan. Gotu ndaem lu elaan yó kem tau gel mò sidek.

¹³ Gotu lebengem lu yóm kdê le. Fétem lu bè benwu yó kem tau deng matay.

¹⁴ Ke gbekem mò du yóm yó ou he gna dmóyón kóm ne hentahuhu wen kegbekem se kóm.” Là gomongen bè nili yóm bérs 15 kól bè bérs 24. Bè ni kem bérs ni, bud heftulón Dwata bè nawa Job yóm sotu ógóf bong lóbô boluyen hipupatamus. (Bè boluy le du bè dumu Udél Dwata bè Ingglis, yóm ógóf bong lóbô yó duhen bihimut.) Là gomongen bè nili yóm tsaptér 41. Yó tulónen, bud heftulón Dwata bè nawa Job yóm bwangkug bong. (Bè dumu Udél Dwata bè Ingglis, yó boluy le du libyatan.) Bè kdê yó kem ógóf deng tehe nmò Dwata, laen kô dù bélê le ke mkél bè alì kgisen. Bè yóm igò Dwata heftulón du bè nawa Job ni kem ógóf alì kemgis tehe nmoen ni, tódô dilô Job yóm tey kfasang Dwata ne yóm tey kegbeken. Ton Job yóm tey kehedem Dwata du yó kem deng tehe nmoen ne milud he kehedemen yóm tau. Ne bè yó but gónón hegsel Job bè yó kem tey dê udélen eta Dwata.