Job 39 - Udél Dwata: Gna Kesfasad ne Lomi Kesfasad

¹ Yó bud udél Dwata ebè Job, monen, “Yó kem kambing lem bnes gel nô bè yó kem bulul geta, deng tngónem kô kóm yóm kdaw ksut blutut le? Deng gtanudem kô kngà yó kem uhu?

² Deng tngónem kô kegen le mlutut du yó kem ngà le yó? Tngónem kô kóm yóm kdaw kehesut le ngà le?

³ Kaem tódô le lekohong bè yóm ksut blutut le.

⁴ Ne yó kem ngà le ditu lem bnes gónó le lemnok, omin le tmagak ke yê le ne là kô le bud semfulék ebéléen.

⁵ Tmau du se hlayal kul yó kem kudà asnu lem bnes? Tmau du se htagaw kul anì bliwel le?

⁶ Deng blayu kul yóm benwu laen hol wen tauhen mò kul gónó nô, suu lu bè yóm benwu là hyu mò du hulu.

⁷ Gel le hlayuk bè yó kem syudad alì hebnes. Là kô gungol le du se kul ke wen udél tau dmanda mdók kul mò nmò.

⁸ Tódô le mótób bè yó kem bulul, bè yó gónó le gel mebel kihu bnes nótób le.

⁹ Gbekem hnalam du kô yóm safì lem bnes? Móyô kô ke htungóem bè yóm gónô gónóm gel hemsu ógóf ke kifu?

¹⁰ Gbekem lemeket du dadu kô? Gbekem kô hdadu du? Neet.

¹¹ Balù bè yóm tey kekgisen, gbekem smalig du kô anì nmoen béléem yóm tey nmò blat?

¹² Gbekem smalig du kô mò tmóbóng kóm bè yó kem deng nutahem, duhen ke hwitem du yóm nutahem yó ebè yóm gónóm kmusu? Neet he.

¹³ Yóm sotu onuk bong lem bnes boluyen ustrik, tey hulung kemfa. Okóm là hulungen móyóng lómón yóm kul khulung móyóng yó kem banug.

¹⁴ Yóm onuk ustrik yó, ke gel mngà tódô tebelen ta tonok anì tódô le kinì bè tonok.

¹⁵ Balù udì ke hendemen angat wen gemdà kul, duhen ke wen ógóf lem bnes bemtù kul.

¹⁶ Ke deng misok yó kem ngaen lenbotù, lómón kmoen kul lómón ke sundu kun ngà du ne là kô hendemen du ke matay le.

¹⁷ Kaem ou se tehe mò du béléen yóm kbakaen yó, là benlayu du khulung hedem.

¹⁸ Okóm balù yóm tey kbakaen, ke lemwót mlóy tey metlasik. Mom knulihen yóm kudà alì hulung mlóy ne yóm tau smakay tahen.

¹⁹ Uu kô, Job, tehe bemlay kul kgis yó kem kudà? Uu kô bemlay du kul yó kem blugal tahà le mò klóón le?

²⁰ Lemwót béléem kô yóm tey khulung le hetò lómón tlangas? Ne yóm kehlikò le tau mlan bè kdél le, lemwót béléem kô?

²¹ Tey le kemgis kmuhaw bè tonok. Tódô hotu le gel le kendel mlóy ebè gónó sgida.

²² Balù udì ke wen klikò le. Balù sudeng, là kô le likò du.

²³ Yó kem tey hanak nwit yó kem tau smakay kul, ne tey uni lekokot le ne tey silaen bè nóng kdaw yó kem buyus nwit le.

²⁴ Nan e muni féw mò but yóm kesgida le ya tey kehyu nawa le kmuhaw bè tonok, gotu le sektes mlóy.

²⁵ Bè ket kungol le du yóm uni féw tey kekdél le, lómón ke deng gungef le boo sfatay gu laan le là deng kól du ne gungol le snéen udél le htê yó kem tau genlal mdók yó kem sendalù nalak le.

²⁶ Ne yóm kofi, uu kô hdalang hóyóng du ne yóm kedfohen móyóng e leged?

²⁷ Dalang se yóm banug nahen nangat udélem he kô, ominen móyóng etu etta na a mò sala ditu ta yó kem léhék?

²⁸ Ditu gónón nô ta yó kem léhék alì geta ne nmoen mò gónón heklung yó kem tey botu bè hol tfusù yóm léhék.

²⁹ Bè yó tendo gónón gu temgélé mebel mò kenfóen. Baluen ke mayuk gónón nô yóm kenfóen, gbeken mton du.

³⁰ Ke wen matay, tódô le gotu sbung hilolen yó kem banug. Ne yó kem ngà le gotu ken le yóm unged tolo mitô.”