Job 38 - Udél Dwata: Gna Kesfasad ne Lomi Kesfasad

Yóm kbalà Dwata ke Job

¹ Duhen yó, lemwót Dwata tódô mudél ebè Job gu lem yóm tey lenos bong, monen,

² “Tmau kóm de mudél laen dù lem, tô smólók yóm dou khulung hedem?

³ Hol hbegelem kdaem dé, bnalaem ni kem sólóku kóm.

⁴ Gónóm nô se kóm du bè yóm tehe kmou benwu? Ke uu se yóm sotu tau temngón hol tulónem do kun.

⁵ Tau du se tehe eles hlamang du yóm klamangen? Tau du se tehe bemtol btes gu talaken? Tngónem kô balaen ni kem snólóku béléem ni?

⁶ Gónóhu hdà du du yóm tud blóngón mò mtud yóm klamangen tonok? Tmau du se fen mò du yóm mò hembegel yóm klamang tonok?

⁷ Bè yóm tehe kmou du yó kem yó, gotu le segeng semngal yó kem blotik ne gotu le hligal mensag yóm kdê hógówu nô bè longit.

⁸ Tmau du se fen hemseng du yóm tey él mohin bè yóm tehe ksuten gu lem tonok? Tau du se mò du yóm kililen yóm mohin yó

⁹ bè yóm tehe klimunu du lobun mung du yóm tey kifu mget?

¹⁰ Ou se mò són yóm mohin anì là nuléhen du yóm kililen.

¹¹ Yó tehe udélu ebè yóm mohin yó, monu, ‘Olon bè ni ne gónóm són. Olon bè ni gónón són yóm tey lewókem.’

¹² Kmò kóm se, Job, bè klawihem mowil deng gbekem mdók du kô yóm kdaw anì baling hlafus?

¹³ Uu kô hesut du fi dmata kdaw yóm mwas? Deng gel dókem layag kô kóm anì gefet bè hol són tonok anì laen dù bud gónó le hebnos yó kem tau gel mò sidek ke kifu?

¹⁴ Abay se ke deng mwas, gotu gfan yó kem bulul ne yó kem datal ne hulô yóm but longit.

¹⁵ Yóm layag gel gefet ebè yó kem tau mò sidek, fen hensengen yóm tô kmò le sidek.

¹⁶ Dengi gu du kô kóm yó kem sfut él laan tonok gónón gu lemwót mohin? Deng hnalakem kô yóm mò kmoen ditu tlaan yóm mohin yó?

¹⁷ Deng wen kô tau tmolok du kóm yó kem bak tikeb bè yóm benwu alì kmifu gónó le nô yó kem tau deng matay?

¹⁸ Wen kô kóm ketngón du yóm klamang yóm benwu? Ke tngónem tulónem do.

¹⁹ Tngónem kô kóm gónón gu lemwót yóm layag, duhen ke gónón e solu yóm kifu?

²⁰ Gbekem kô mit kul ebè yóm kul gónó nô? Tngónem kô kóm yóm lan ebè yóm gónó le nô yó?

²¹ Déke tngónem nim ni abay se dengi tey tuha ne dengi tau bè yóm kmou benwu. Ê, hnikót he ke dengi tau.

²² Deng nauyem kô yó kem gónô gónóhu hemsù snu ne bulók kulón? Deng eles henyuhu yóm yó mò tgamahu bè yóm kdawen wen gfà tau te tonok, duhen yóm kdawen wen sgida.

²³ Deng eles henyuhu yóm yó mò tgamahu bè yóm kdawen wen gfà tau te tonok, duhen yóm kdawen wen sgida.

²⁴ Tngónem kô kóm yóm lan ebè yóm benwu gónón seblà msut kdaw, duhen yóm benwu gónón gu mbel yóm lenos gu fi dmata kdaw?

²⁵ Tau du se mélék du yóm mò gónón e gdek yóm hol yéen kulón? Ke smilà, tau du se mò du yóm lesangen?

²⁶ Tau du se fen hkulón du bè yóm benwu laen hol wen tauhen?

²⁷ Tau du se fen hméfê du yóm hol gónón mékéng tonok anì wen bnes tmowok tahen?

²⁸ Wen kô mà le yóm kulón ne yóm amù?

²⁹ Tau du se yê yó kem bulók kulón?

³⁰ Tau du se hembaling du ays yóm él lómón kgelen botu? Ne balù bè yóm él lanaw, tau du se gembek hembaling du ays yóm tofi tahen?

³¹ Yóm sotu bung blotik boluyen Pliyadis, gbekem kô kóm sembekes kul anì là sekla le? Dalang se yóm sotu bung blotik boluyen Uriyun, gbekem kô mkó bkes le anì sekla le?Gbekem kô malak yó kem blotik bè yóm kógów le ket bulón? Ne yóm sotu bung blotik boluyen Bér mung du yó kem ngaen, gbekem kô mit kul hlalak longit?

³² Gbekem kô malak yó kem blotik bè yóm kógów le ket bulón? Ne yóm sotu bung blotik boluyen Bér mung du yó kem ngaen, gbekem kô mit kul hlalak longit?

³³ Tngónem kô yóm gel hlolou kul yóm kdê gel tonem nô bè longit? Tngónem kô yóm muhu kul lem benwu?

³⁴ Gbekem kô na a mdók du yóm lobun anì kmulón?

³⁵ Ne yóm silà, gbekem kô mdók du anì smilà? Gbekem mdók du kemfô kô yóm leték?

³⁶ Gónón lemwót de yóm khulung hedem ne yóm khulung temnef?

³⁷ Tmau du se yóm alì temngón gembek msó kul yó kem lobun? Tau du se gembek mkok kul yó kem lebwón bè longit

³⁸ mò hméfê yóm tey tonok mékéng, botong baling hitok?

³⁹ Ne sotuhen, hulungi mebel mò kenfô le kô yó kem liyun mò ken le? Gbekem hebsow kul kô yó kem ngà le bè yóm gel kbitil le

⁴⁰ ke gel le hlilil mangat lem yóm kul kilib gónó le nô, duhen ke hebnos le lem bnes?

⁴¹ Ne tau du se hemtukô kul yó kem wak ke mebel le yóm mò tnukô le? Ne ke mni le béléu ken yó kem ngà le, tau du se hemtukô kul bè yóm kebel le ken?”