Job 33 - Udél Dwata: Gna Kesfasad ne Lomi Kesfasad

¹ Ne ni, Job, hol hninggelem hmungol du yóm kdê monu mò kóm.

² Móyóe tmulón du kóm yó kem dou nô lem hendem.

³ Tódô kdê yó kem tulónu kóm ni, sal lemwót lem nawaw ne hono tahu.

⁴ Yakà yóm Tulus Dwata fen mò do ne kun nawa Dwata yóm yufen do mò hlowil dou, yóm Dwata laen dù là gbeken du.

⁵ Ke hulungi malà do bnalaem o sen. Ndaem yóm kóm ktahu.

⁶ Yakà senged kton Dwata kut yóm lewu te, hono te lemwót bè tonok.

⁷ Yó gónóm mon, laen dù lasunem likò do, là kô ten-gnahu kóm.

⁸ Ó Job, ni se yóm deng gungolu udélem, monem,

⁹ ‘Laen dù salau dou. Laen dù sidek deng nmou. Laen dù belenu, laen dù salà tngónu deng nmou.

¹⁰ Okóm yóm Dwata, wen lan nmoen mò hemsidek do. Lómón kmoen do lómón ke hohonen ou.

¹¹ Lómón ke nféten o bè tihu ne gotu hnénégen nô kdólu.’

¹² Okóm Job, ni wen udélu ebéléem. Salà se yóm monem yó. Deng gel monem se kóm, Dwata se hol geta senta tau.

¹³ Ne tahu se yó. Okóm moen de ke dnuónem Dwata bè yóm là kbalaen yóm gel tnalaw tau?

¹⁴ Igò Dwata senflós tendo mudél ebélê tekuy, okóm laen dù tau hmungol du.

¹⁵ Ke kifu bè yóm igò tau henga tungô, wen gel hekna Dwata kul ne wen gel htonen kul.

¹⁶ Senboyongen lem klingu le ne gotu le likò bè yó kem eles hetgamahen kul.

¹⁷ Mudél ebélê le anì tenflok le yóm kmò le salà ne anì là bud le gfét bè yóm kehegeta le knô le.

¹⁸ Wen lanen hemseng kul anì là kô le meglà. Kóyóen ke lenwaen lu lem hatay.

¹⁹ Yóm Dwata, wen gónón semtódô yóm tau mlan bè des ne mlan bè yóm tódô seflósen ketduk lem tiolen.

²⁰ Yóm tau wen desen laen kô dù bud óyóen mken, baluen ke tey mnóm yóm ken là kô kenen du.

²¹ Yóm lówóhen tódô hono tiol.

²² Udì duen gónón là gehlós ebè yóm kul benwu yó kem tau deng matay.

²³ Okóm ke wen hógów Dwata gu bè longit, yóm sotu bè yó kem hilu libu gel hógówen nô bè yó ne ke du mfi du yóm tau yó ne tulónen du yóm hyu mò nmoen,

²⁴ lemwót bè yóm kkodu Dwata du yóm tau yó, yó udélen ebè yóm hógówen, monen, ‘Hol lenwaem yóm tau yó. Là hyuhen ke hlós elem hatay yakà deng wen tonu mò soken du yóm klowilen.’

²⁵ Ne tahu se. Ominen yó tódô bud mulék hyu yóm klówóhen, hol lómón se yóm lówóhen bè yóm hanà tolo klomihen tau.

²⁶ Ke mni bè Dwata yóm tau yó ya tey kehmóyóen du. Tey kehligal Dwata bè yóm kehmóyóen du ne bud baling hyu ktonen du.

²⁷ Yó angat udélen bè yó kem dumu tau yóm tau nsok Dwata yó, monen, ‘Denge gemsalà bè Dwata, là hyuhen yóm deng nmou okóm là kô tafak Dwata du do yóm tafak bang bayad yóm salà nmou.

²⁸ Deng lenwà Dwata o bè benwu yó kem tau deng matay ne ni denge bud mowil ne deng bud gel hlayag Dwata klowilu.’

²⁹ Ne ni se, yóm tendo gel nmò Dwata bè tau.

³⁰ Sal gel lenwaen lu bè benwu yó kem tau deng matay ne bud gel hlayagen klowil le.

³¹ Ne ni, Job, hol hnungolem nim monu. Béi abay mudél hol hnungolem ou.

³² Okóm ke wen se monem, hol tulónem dou anì hnungolu. Hyu nawahu ke tahu se yó kem monem.

³³ Okóm ke laen dù tô monem, hol béi abay mudél. Hol hnungolem ou anì toloku kóm yóm khulung hedem.” Là gomongen bè nili yóm tsaptér 34 kól bè tsaptér 37. Bè ni kem tsaptér ni, sfu yóm udél Ilihu ebè Job.