Job 3 - Udél Dwata: Gna Kesfasad ne Lomi Kesfasad

Ktalaw Job ebè Dwata

¹ Kogolen bè yó, tódô hebkó mudél Job henmulaen yóm kdaw tehe ksuten.

² Yó monen,

³ “Yake tódô lana ne yóm kdaw tehe ksutu. Dalang se yóm kifu hol tehe kbut keblutut yê do yake tódô lana.

⁴ Yake tódô baling kifu yóm kdaw tehe ksutu yó. Yake tódô hlana balù bè Dwata bè longit, béen bud wen layag etahen ne.

⁵ Hyu ke hol baling mget kkifuhen yóm kdaw yó. Hyu ke tódô tenfeng lenimun lobun. Hyu ke laen dù bud layagen, hono kifu mget gónó likò.

⁶ Yake tódô lana yóm kifu kbut keblutut yê do. Hol béen abay bud gomong bè yó lem yóm sfalay ne béen abay bud gomong lem yóm sbulón.

⁷ Yake tehe là bnutut yê do bè yóm kifu yó. Hyu ke tehe laen dù kligal le bè yóm kifu yó.

⁸ Yó kem tau alì hulung hemmulà, yó kem tau gbek mdók yóm bwangkug lem mohin, yake hol henmulà le yóm kdaw yó.

⁹ Yake bê le tehe mnóng yó kem blotik gel mnóng móyón mwas bè yóm ksutu. Yake béen tehe mwas yóm kdaw yó

¹⁰ abay se là tehe hensengen du yóm tehe ksut blutut yê. Là hensengen du yóm ksutu igoen tey sidek yóm gónóhu e kól.

¹¹ Mom hyu ne ekni ke tehehe matay bè yóm tehe ksutu.

¹² Moen du ke tehe sniwi yê ou? Moen du ke tehe htutuen ou?

¹³ Ke denge tehe matay denge hegnô ne ni, denge tungô.

¹⁴ Hegnóe lem blóng yó kem tau hol geta ne lem blóng yó kem dumu tau mogot benwu, kem tau alì tótól tehe hefdà yó kem gónô lembang te tonok.

¹⁵ Tungóe lem blóng yó kem ngà tau hol geta tehe tódô hnok lem gónô le yó kem tahu blówón ne blówón bukay.

¹⁶ Mom hyu ne ke tehe lebeng le o lómón kebeng le yóm ngà sut hosot, yóm ngà là tonen du layag kdaw.

¹⁷ Abay se ke deng kól lem hatay yóm tau, deng hotok ne kmò le béléen sidek yó kem tau gel mò sidek. Ne yó kem tau alì miteg mò nmò tódô le hegnô bè yó.

¹⁸ Balù yó kem tau tehe negef le, tey wen kenek nawa le bè yó abay se là bud gungol le du yóm udél yó kem tau alì dmanda mdók kul.

¹⁹ Gotu le nô bè yó snéen yó kem tau tehe wen kendengen le ne yó kem tau élél. Dalang se yóm tau tehe hesek deng gewà lem hólól ogoten.

²⁰ Moen du ke mowil yó kem tau alì sidek kliteg le? Ne yó kem tau alì sidek kegnóm le bè klowil le, moen du ke mowil le?

²¹ Yó kem tau yó nangat le katay le, okóm là kóen dog kól bélê le. Yóm kehkoso le yóm katay le, mkay senta kehkoso yó he kem tau mokol yóm kimu legen deng lebeng le.

²² Hyu nawa le ke deng le matay ne ke deng lebeng le lu.

²³ Moen du ke hlowil Dwata lu yó kem tau laen dù lan ton le mò gónó le gewà lem yóm hlayam le? Ne yó kem tau deng lus Dwata bè yóm gónón alì mgel, moen du ke hensengen bélê le yóm hatay?

²⁴ Lemwót bè yóm klangagu, balù udì ke wen óyóu mken, tódô senflósu dmolong.

²⁵ Deng gnómu ne yóm tehe knikou. Deng mom sut béléu yóm gónón slang katayu.

²⁶ Laen kô dù kenek nawahu ne laen se kô gónón tinof béléu. Laen dù hen-gnóu, tódô senflósen wen hlayam sut bè klowilu.”