Job 2 - Udél Dwata: Gna Kesfasad ne Lomi Kesfasad

Bud ktilów Seitan ke Job

¹ Bud sotu kdaw bè yó, bud le gotu stifun bè solu Dwata yó kem hógówen nô bè longit ne bud mung bélê le bè yó Seitan.

² Omin Dwata smólók ke Seitan, “Gónóm gu de?” Bnalà Seitan se, monen, “Snolò tenngelu yóm mò kmoen ditu talak tonok.”

³ Mon Dwata se mò du, “Tonem Job kô, yóm tau tóbóng lówóhu? Laen dù tau talak tonok ke gemsenged du. Laen dù gónó le gemsanil du kem dumu tau. Tau gulit knawahen, lelen tey klikoen do ne tendo gel hetsik bè yóm sidek. Efet yóm kmoen ni, tey kguliten balù yóm tey kubugem dou anì lusu uu mò hemsidek du balù yóm klaen dù duónem du.”

⁴ Yó balà Seitan ke Dwata, monen, “Yóm tau són gónón dmóyón kóm ke nuyagem. Ke móyô mowil, kaem gotu blayen kdê nfunen.

⁵ Okóm ni ke hensidekem lówó Job, ngem kà angat tey sidek kehmulaen kóm.”

⁶ Ne yó gónó Dwata mon du mò ke Seitan, “Yó ne suu lem hólólem, okóm hol béem abay hnatay.”

⁷ Tahu se. Lemwót Seitan gu bè solu Dwata, tódô hlós ebè Job ne gotu hesuten bè lówó Job yó kem tey hisa wen lenwóten laan tihen efet kól bè kuluhen.

⁸ Lemwót Job myón bè yóm gónó le gel mkok kohù, nwahen yóm ngà kébéng kuleng tonok mò gel kléhen yóm nanak hisahen.

⁹ Yó mon yehen Job mò ke Job, “Tolohi hgulit bè Dwata he kô? Henmulaem Dwata dé anì géhéli matay.”

¹⁰ Bnalà Job se, monen, “Kudél libun nungel. Bè yóm klawihen wen hyu blay Dwata kut tey kehmóyô te du. Moen se ke tô te tmalaw ke henwiten tu sidek?” Balù yóm deng tey kwen hlayam Job, ewenem laen kô dù udél sidek btang bè sumóngen.

Kauy le ke Job yóm tlu kem ween

¹¹ Wen tlu kem tau hol dumuhen swè Job. Yó boluy le, Ilifas tau lemwót bè benwu Timan ne Bildad yóm tau lemwót bè benwu Suwa ne Sufar yóm tau lemwót bè benwu Naama. Tikóng gungol le yóm tey glumfak Job ni, tódô le lemwót bè yóm kul benwu ne slomong le mauy ke Job anì na le e henyu nawahen.

¹² Bè yóm hanà le tolo mayuk ton le Job, bede là hol dilô le du. Tikóng le kól béléen tey kkik le du, gotu kensê le nes le lemwót bè klangag le. Gotu hensù le kfung te kulu le.

¹³ Hitu buteng le tódô myón bè yó klohok Job. Lemwót bè yóm kton le yóm tey hlayamen, balù sekteb ke mudél le.