Job 14 - Udél Dwata: Gna Kesfasad ne Lomi Kesfasad

Yóm udél Job ebè Dwata

¹ Yó udél Job ebè Dwata, monen, “Yóm klowil tau là mbegelen. Ne tey ukol klowilen lelen sbeweg.

² Mahil me lemnok ne mahil me se matay lómón yó kem bulók, mahil le menes. Mahil me lana lómón yóm klahil klana yóm olung lobun.

³ Ke lómón yó se yóm dou klowil, Dwata, moen du ke alì snoloem o? Moen du ke hdaem o bè soluhem anì nam e knukum o?

⁴ Tau du se gembek hólós yóm tau ke tehe là mólósen lemwót bè ksuten? Kaem laen duen.

⁵ Yóm ktahà klowil tau deng eles tngónem ne kóm, Dwata. Tngónem ke hilu yóm dù bulónen mowil. Ne yóm deng natulem là kóen bud megetles.

⁶ Duhen yó, béem bud snolò ne yóm tau anì wen kehegnóen, tódô bayaem du yóm kun. Lómón yóm tau mò nmò bè dumun tau, sal gel wen ngà kligalen ke bangen hegnô kimel kesok deng kmoen nmò.

⁷ Yóm koyu ke deng nofok le bud wen uléken.

⁸ Baluen ke deng legen knóen lem tonok yó kem dolilen ne deng gotu bolok yóm tuhoden,

⁹ ke kmulón kaem angat bud gulék lómón yóm hulu lomi tmowok.

¹⁰ Okóm yóm tau ke matay sónen ne kun klowil. Ke deng milot nawahen bud gónón nô se kun du?

¹¹ Yóm tau ke deng matay, lómón ke mkél bè yóm él mlel deng kti bè yó kem bulónen alì mnóng kdaw ne lómón ke mkél bè yóm lanaw deng kti.

¹² Lómón yó se yóm tau ke deng matay là kóen na a bud btik. Là kô le na a btik efet laen dù bud longit ne laen se dù gembek bud bemtik kul.

¹³ Ó Dwata, hol kóyóu dé ke bnosem o bè benwu yó kem tau deng matay. Hol bnosem o efet deng gotu mkó yóm kebutem do. Okóm hol eles hnutusem do yóm kdaw bud kehedemem do.

¹⁴ Ke deng matay yóm tau gbeken kô bud mowil? Ke yó dum bud mowil wen nefet nawahu se do. Ne balù yóm deng keglayamu yóm kmoen ni, naw hol nangat he yóm bud klowilu.

¹⁵ Ke tahu se yóm kehlowilem tau, Dwata, angat tnabahem o ne bnalau uu. Ne tey kehligalem béléu, ou yóm tau deng nifilem.

¹⁶ Bè yóm kdaw yó, angat tendo bnenteyem kdê yó kem lafangu, okóm là kô bud snoloem du ne yó kem salau.

¹⁷ Angat tódô gotu hnifótem lu ne là bud hendemem du ne. Angat gotu tnibengem kdéen sidek deng nmou.

¹⁸ Okóm wen gónóm lemsón du yóm nefet nawa me, Dwata, hol lómón yóm bulul ke stunal ne lómón yóm botu mluy gu bè tubaw kbu, là kô bud tonem kul ne.

¹⁹ Ne lómón yóm hagang ke wen él semflós mlel tahen baling megbang. Ne lómón yóm tey dunuk gotu sloben yóm tonok. Lómón yó se, Dwata, kmoem sónen yóm nefet nawa tau.

²⁰ Laen kô dù gmò tau béléem. Ke deng matay yóm tau là kô bud ton du ne efet kól bè sónen. Ditu lem hatay tey kesbukel lem uyóhen.

²¹ Yó kem ngaen, là kô tngónen du ke wen gónó le madat kul hulin kdaw duhen ke wen gónó le hemyak knô le.

²² Tek són olo gnómen, són yóm des bè kun lówó ne són yóm kun klangag.” Là gomongen bè nili yóm tsaptér 15 efet kól bè tsaptér 18. Yó tulónen bè tsaptér 15 yóm gewu dulék Ilifas mudél ebè Job ne bè tsaptér 16 ne 17 yóm kbalà Job du yóm udél Ilifas ebéléen. Yó tulónen bè tsaptér 18 yóm gewu dulék Bildad mudél ebè Job.