Job 1 - Udél Dwata: Gna Kesfasad ne Lomi Kesfasad

Yóm kun klowil Job

¹ Tehe yu ekni bè yóm benwu Us, wen sotu tau menwu bè yó boluyen Job. Nim tau ni, laen dù gónó le gemsanil du yó kem dumu tau. Tey tau gulit knawahen, mung du yóm klikoen ke Dwata ne tendo gel hetsik bè yóm sidek.

² Wen hitu ngaen logi ne tlu ngaen libun.

³ Botong hitu libu ubihahen ne tlu libu kamélen ne lemibu safien ne limu latu kudà asnu libunen. Tey wen kem tau mò nmò béléen. Bè ktahuhen, bè kdê yó kem tau menwu fi dmata kdaw, du se yóm alì wen kendengenen bélê le.

⁴ Yó gel nmò le ket halay yó kem ngà Job logi, ke gel kól yóm kun kdaw ksut yóm sotu, wen ken bong gel nmoen bè gónóen. Gotu tinoken yó kem dumun setwoli anì mung le hligal béléen.

⁵ Ke sok deng yóm kdaw gel kmò le ken, yó gel nmò Job gotu hfangayen lu anì nan e bud hfólós lu. Tódô hlafus btik nan e demsù yóm dsù gel hkekeb le ebè Dwata bè ket yó kem ngaen. Yó gónón mò du yóm yó, abay se hendemen déke wen sotu bélê le deng wen gónóhen gemsalà bè Dwata ne deng wen gmon le sidek eta Dwata, yóm là lenbù le du. Ni se yóm tendo gel nmò Job bè yó kem ngaen.

Tanay ktilów Seitan ke Job

⁶ Sotu kdaw bè yó, gotu le stifun bè solu Dwata yó kem hógówen nô bè longit ne mung bélê le bè yó Seitan.Snólók Dwata Seitan,

⁷ Snólók Dwata Seitan, “Gónóm gu de?” Bnalà Seitan se, monen, “Snolò tenngelu yóm mò kmoen ditu talak tonok.”

⁸ Mon Dwata se, “Tonem Job kô, yóm tau tóbóng lówóhu? Laen dù tau talak tonok ke mkél béléen. Laen dù gónó le gemsanil du kem dumu tau. Tau gulit knawahen, lelen bong klikoen do ne tendo hetsik bè yóm sidek.”

⁹ Bnalà Seitan se, monen, “Knikoen uu kô yóm Job yó ke laen dù ofolen du?

¹⁰ Yóm gel nmoem béléen ni kmoen ni, deng tódô senflósem gel kemlung du dalang se yó kem fes lówóhen ne kdê yó kem nfunen. Tódô kdê yó kem gel nmoen tey gel kuyagem du. Yó gónóm mon, tey wen ógófen, botong tô lenngeben yóm benwuhen.

¹¹ Okóm ni, ke gotu nwahem yóm kdê nfunen, ngem kà angat mulék henmulaen kóm.”

¹² Yó mon Dwata mò ke Seitan, “Yó ne, tódô kdê yó kem nfunen gotu suu lem hólólem. Okóm hol béem abay hendes ke Job kun.” Tahu se, lemwót bè yó Seitan bè solu Dwata.

Keglà yó kem ngà Job ne yóm kdê kendengenen

¹³ Sotu kdaw bè yó, igò le stifun mken yó kem ngà Job bè gónô yóm hol twogu bélê le logi

¹⁴ wen sotu tau mit tulón sut ditu bè gónô Job, monen mò ke Job, “Bè yóm igò me tolo hdadu yó kem safiem ne tolo lel le mótób bè yó klohok me yó kem asnuhem,

¹⁵ tódô le kento sut yó kem tau Sabiyan, gotu nwa le yóm kdê ógófem ne gotu hnatay tnibó le yó kem tau mò nmò béléem. Tek són o là matayen. Tódóe mlóy edini naw e tulón kóm.”

¹⁶ Là dengen gfu kudél yóm tau yó koni bud wen sotu tau sut, monen, “Gotu kenfô leték lu yóm kdê ubihahem ne yó kem tau semgyok kul. Tek són o là matayen. Tódóe mlóy edini naw e tulón kóm.”

¹⁷ Gu laanen là deng gfu se kun kudél yóm tau yó, bud wen sotu tau sut ne monen, “Botong tlu lumbuk tau Kaldiyan mundug kum ne gotu nwa le yóm kdê kamélem ne yó kem mentey kul gotu hnatay tnibó le lu. Tek són o là matayen. Tódóe mlóy edini naw e tulón kóm.”

¹⁸ Gu laanen là deng gfu se kun kudél yóm tau yó bud wen sotu tau sut ne monen, “Yóm igò le hligal mò ken yó kem ngaem bè gónô yóm hol twogu bélê le logi,

¹⁹ deng nan e tódô mbel yóm hol yéen lenos bong lemwót gu bè yóm benwu laen hol wen tauhen. Gotu genbaen yóm gónô gónó le nô ne gotu le matay yóm kdê le. Tek són ou là matayen. Tódóe mlóy edini naw e tulón kóm.”

²⁰ Omin Job hebkó mdà, gotu kenséen yóm nes bè lówóhen lemwót bè yóm tey klangagen. Ominen gotu tembulud weken ne tódô lemfen bè tonok bè solu Dwata.

²¹ Yó monen, “Bè yóm tehe ksutu gu bè yê, tódóe hlówó ne bè yóm angat katayu bude tódô hlówó snéen. Deng gotu blay Dwata do yóm kdéen deng nfunu ne ni deng gotu bud nwahen. Yake hol megdóyón yóm kun boluy.”

²² Bè kdê nim glumfak Job ni, balù udì se ke tô nselen Dwata.