Jirimaya 9 - Udél Dwata: Gna Kesfasad ne Lomi Kesfasad

¹ Hyu dé ke kokol él yóm kuluhu ne yóm matahu, hyu dé ke tbul lewok anì senflósu mkik ket kdaw ne kifu. Nkiku yóm kdê yó kem dou tau deng hnatay le.

² Hyu dé ke wen gónóhu nô ditu lem yóm benwu laen hol wen tauhen anì glayuke bè yó kem dou tau, yakà deng le gotu baling tau mdà yehen, tau mahil hmatay dumu tau.

Tafak yóm là kimón

³ Yó udél Dwata, monen, “Sónmò le tmulón kéng yó kem dou tau, là ndà le du yóm ktahuhen. Sónmoen temnù ksideken yóm gel nmò le. Laen dù bud nawa le ebéléu,” mon Dwata.

⁴ “Elesi temgama bè yóm dumuhem sebét. Hol béem snalig yóm hol dumum sulil-lem. Yakà tódô kdê le du hulung smukat, ne kdê le sal gel tnulón le kéng kem wè le.

⁵ Ket tau, snukaten kem dumun. Laen kô dù bélê le tmulón yóm ktahuhen. Hono kéng btang bè sumóng le. Botong le miteg bè yóm kmò le salà.

⁶ Sónmoen temnù yóm kéng gel tulón le. Là kô le bud móyô mulék ebéléu,” mon Dwata.

⁷ Duhen yó, ni se udél yóm Dwata laen dù là gbeken du, monen, “Lemwót bè yóm nmò le ni, gotu hnou lu, lómón yóm gel kehnò le bala tók anì mkó yóm kê faken. Laen dù dumu lanu hkó du yó kem salà le.

⁸ Yóm sumóng le hol lómón ke lewet mò hmatay tau. Tey tilob gel kestulón le bè yó kem dumu le sebét, anì monem mò lan le hmatay kul.

⁹ Mone là tnafaku kul kô bè yóm nmò le ni? Mone là angat bnelesu kul kô ni kem tau lómón ni kmò le?” mon Dwata.

¹⁰ Yó bud udél Jirimaya, monen, “Lenangagu yó kem bulul ne lenangagu yó kem bnes gel nótób ógóf, abay se deng le gotu mékéng laen dù bud mótób kul. Là bud gungolem kul ne yó kem udél safì. Yó kem onuk koyu ne yó kem ógóf lem bnes, deng le gotu hlayuk.”

¹¹ Yó bud udél Dwata, monen, “Yóm syudad Jirusalim, angat gotu genbau yóm klamangen mò gónóhu lemuduk yó kem deng gbà, mò gónó le nô yó kem ohu lóbô lem bnes. Yó kem dumu benwu bè Juda angat gotu genbau, laen dù bud tau menwu du.”

¹² Ominu smólók ke Dwata, “Tau du se gembek temnef du yóm angat nmoem ni? Tau du se deng tolokem anì bud hlanen bè dumu tau se kun? Moen du ke deng tódô gbayà yóm tonok lómón ke baling benwu là hyu menwu du, benwu laen dù bud tau mlan lemen?”

¹³ Yó balà Dwata do, monen, “Yó gónón deng lómón yó kmoen, abay se monem yó kem dou tau, deng tebel le yóm dou hlau hlolò kul. Là nimón le do ne là kô nimón le du yóm dou hlau kul.

¹⁴ Mom yó nmò le, hgel le kulu le ne tmaba le ebè yó kem dwata lennged boluyen Baal, yóm deng hlolò le kul yó kem tehe fù le.

¹⁵ Duhen ni hol hnungolem yóm angat nmou, ou yóm Dwata laen dù là gbeken du, yóm sana kul Dwata yó kem tau Israél. Hol lómón ke wen hulu alì héét angat hkenu kul yó kem dou tau ne lómón ke wen él gónó milu angat hinumu kul.

¹⁶ Angat gotu senklahu lu ebè yó kem benwu là deng hnikót gungol le du ne là deng hnikót gungol le du se kul yó kem tehe fù le. Angat wen kem sendalù mit sudeng hektesu kul efet gotu genlau lu.”

Kkik le mni tóbóng bè Dwata yó kem tau bè Jirusalim

¹⁷ Yó udél yóm Dwata laen dù là gbeken du, monen, “Hol hendem ye dé yóm móyón gefet bè benwu ye. Hangay ye lu edini yó kem libun gel lemanu bè matay, yó kem libun alì hulung mò du.”

¹⁸ Yó udél yó kem tau, mon le, “Henslò ye lu anì géhél le lemanu bélê tekuy efet btang lewok tekuy ne efet héfê bè lewok hifi tekuy.”

¹⁹ Hnungol ye dé yóm tey kik bè Sayun, yó mon le, “Deng tekuy gotu meglà ne. Deng tekuy gotu myak ne ni. Deng bang ktebel tekuy du ne nim benwu tekuy ni, abay se deng gotu gbà yó kem gónô tekuy.”

²⁰ Yó bud udél Jirimaya, monen, “Yu kem libun, hol hnungol ye yóm kun udél Dwata, hol henklingu ye yóm udélen ebélê ye. Tolok ye lu langag yó kem ngà ye libun ne bud tolok ye lu lemanu yó kem wè ye.

²¹ Deng kól lem gónô tekuy ne yóm hatay lanen tembó beng. Dalang se ebè gónô bong yó kem tau mogot benwu deng kól lemen hatay. Deng kól bè yó kem ngà tekuy, là bud le là mdengen bè yó kem lan. Ne yó kem logi lomi lemnok, là kô le bud gel stifun lem fedyan, abay se deng kól lem blóng le hatay.”

²² Ne yó bud udél Dwata, monen, “Angat tódô bulét bè klamangen yó kem tau deng matay, lómón kbuléten kê ógóf ne lómón ke logom halay gtebel yó kem tau muta du ne laen kô dù tau bud semtifun kul.”

²³ Yó bud udél Dwata, monen, “Yóm tau hulung hedem, hol béen abay salù yóm khulungen hedem yó. Dalang se yóm tau alì kemgis, hol béen abay salù yóm kekgisen. Yóm tau wen kendengenen, hol béen abay salù yóm kwen kendengenen.

²⁴ Ke wen tau móyô megsalù, yó dé salù le yóm ketngón le dou ne yóm ketnef le yóm dou kmò. Salù le ou dé yóm Dwata tedeng kkukumen ne tedeng kmoen. Ne yóm kbong nawahu tau là kóen monol. Ni kem ni koni gónóhu hligal. Ou se Dwata nim mudél ni.”

²⁵ Yó bud udél Dwata, monen, “Angat kól yóm kdawu tmafak yó kem tau deng htulì là tenles le du kmò le,

²⁶ duhen yó kem tau Idyip ne tau Idom ne tau Amun ne tau Muab ne yó kem tau menwu bè yóm benwu laen hol wen tauhen. Ni kem tau ni, hono kem tau là hemtahu bè Dwata. Tahu se, balù yó kem tau Juda gomong tnafaku. Senged snéen yó kem tau Israél, skél le bè yó kem tau là hemtahu le bè Dwata. Htulì le, okóm là kô tenles le du kmò le.”