Jirimaya 8 - Udél Dwata: Gna Kesfasad ne Lomi Kesfasad

Kkik Jirimaya yóm angat gfà yó kem tau bè Juda

¹⁸ Yóm tey klangagu ni là kóen mkó. Lómón ke deng gbà lem kfuhu.

¹⁹ Hol hnungolem dé yóm kik yó kem tauhu, botong gefet bè klamang yóm benwu me. Yó mon le, “Deng tahu tebel Dwata kô Jirusalim? Là buden nô bè yó ne kô, igoen du yóm hol geta bélê le?” Yó balà Dwata kul, monen, “Moen de ke alì hebut le ou yó kem tauhu bè yóm gel ktaba le ebè yó kem dwata kéng, dwata laen dù muhen?”

²⁰ Yó utóm kik yó kem tau, mon le, “Laen dù bud kdaw me ne. Deng deng ne yóm nuta, blaem là kô kuy deng gewà.”

²¹ Bud mon Jirimaya, “Nkiku yóm gfà yó kem tauhu. Tódóe teneng là kóe gudél, botonge yem bè yóm klangagu.

²² Laen dù bud bulung kô ditu bè benwu Gilyad? Laen dù bud tau mulung bè yó kô? Moen se ke laen dù hkó du yó kem halì yó kem tauhu?”