Jirimaya 7 - Udél Dwata: Gna Kesfasad ne Lomi Kesfasad

Ktolok Jirimaya bè yóm Gónô Dwata bè Jirusalim

¹ Yó bud udél Dwata ebè Jirimaya, monen,

² “Mógówi ebè bak tikeb yóm dou Gónô, bè yóm bak tikeb gónó le gel husek tmaba ebéléu yó kem tau ne yó monem mò kul, ‘Ó kem tau bè Juda, hnungol ye yóm udél lemwót bè yóm sana Dwata hol gónó mogot. Hol hnungol ye yóm kdê ye gel tmaba Dwata bè ni.

³ Yó udélen ebélê ye yóm Dwata laen dù là gbeken du yóm sana kuy Dwata kem tau Israél, monen, Balù nim kmoen ni ke kó ye yó kem sidek gel nmò ye, là kô hdóhu kuy ta nim tonok ye ni.

⁴ Hol bê ye abay snalig yóm udél yó kem tau gel mon du mò kuy lemwót bè yóm knóen lem blóng tekuy yóm Gónô Dwata, laen kô dù dumu tau hemsidek tekuy. Kéng yóm yó.

⁵ Són gónóhu kmodu kuy ke kó ye yóm sidek nô lem hendem ye ne yóm sidek gel nmò ye. Knoduhu yu ke tedeng nmò ye bè yó kem dumu ye tau.

⁶ Tenflok ye ne smukat yó kem tólóng tau nô lem blóng ye dalang se yó kem ngà hikit ne yó kem libun bolu. Tenflok ye ne hmatay kul yó kem tau laen dù salà le. Tenflok ye ne tmaba ebè yó kem dumu dwata, abay se yó yóm hemsidek knô ye.

⁷ Ke tenles ye kmò ye, là kô kóhu kuy ta yóm tonok tehe blayu yó kem tehe fù ye mò hlós nfun le.

⁸ Ngem, deng ye mom smalig bè yó kem udél kéng, yóm gel mon le laen dù tau hemsidek kuy ke wen Gónô Dwata nô lem blóng ye. Kéng yóm yó.

⁹ Igò ye gel mnagaw ne monok ne mò samuk. Gel ye smafà kéng ne deng ye mom demsù ebè Baal ne deng ye mom tmaba ebè yó kem dwata là deng kuy hnikót tngón du.

¹⁰ Omin ye yó mdà bè soluhu lem yóm dou Gónô ne mon ye, “Laen kô dù hemen me bè ni se kum.” Kéng yóm yó, abay se tódô senflós ye mò du yóm alì kenbéu.

¹¹ Ilóem yó kô kehedem ye du yóm dou Gónô, yóm hol gónóhen nô yóm dou boluy mò gónó le hebnos yó kem tau mnagaw? Deng gotu tonu se yóm sidek gel nmò ye bè yó, mon Dwata.

¹² Mógów ye etu bè Silu, yóm hol tanay benwu néléku mò gónó ye tmaba ebéléu. Hnénég ye yóm deng nmou bè yó lemwót bè yó kem tey salà yó kem dou tau Israél.Igò ye mò du yó kem salà monu yó koni, sónmou se dou tendo semsulit mudél ebélê ye, okóm là kô ye dog móyô hmungol. Deng tnabahu yu anì wen eles hetgamahu kuy, okóm là kô na ye e bnalà dou.

¹³ Igò ye mò du yó kem salà monu yó koni, sónmou se dou tendo semsulit mudél ebélê ye, okóm là kô ye dog móyô hmungol. Deng tnabahu yu anì wen eles hetgamahu kuy, okóm là kô na ye e bnalà dou.

¹⁴ Duhen ni, yóm deng tehe kegbau bè Silu, angat bud nmou bè ni bè yóm dou Gónô deng hdà ye bè ni, mò gónóhen nô yóm dou boluy, yóm Gónô tendo snalig ye mò gónó ye hofin bè yó kem hohon ye. Bè ni bè yóm tonok tehe blayu kuy dalang se yó kem tehe fù ye, bud nmou bè ni yóm deng tehe nmou bè Silu.

¹⁵ Hegefu yu lómón yóm tehe khegefu yó kem dumu ye Israél. Ou se Dwata nim mudél ni.’ ”

Là kimón yó kem tau

¹⁶ Yó bud udél Dwata ebè Jirimaya, monen, “Ó Jirimaya, hol béi abay bud mni béléu bélê le ni kem tau ni. Béem abay nkik lu ne béem abay tô senblóng lu ebéléu, abay se là kô hnungolu kóm.

¹⁷ Ilóem là deng tonem du kô yóm tendo gel nmò le bè yó kem dumu benwu bè Juda dalang se bè yó kem lan bè ni bè Jirusalim?

¹⁸ Lemwót yó kem ngà le, fen le ma koyu ne fen le hembong ofi yó kem mà le ne fen le mò mambang yó kem yê le mò blay le ebè yóm sotu dwata bnoluy le Libun Boi bè Longit. Bud wen se dumu ninum blay le ebè yó kem dumu dwata mò gónó le hebut do.

¹⁹ Okóm bè yóm gel nmò le yó là ou du yóm henyak le, kaem kul knô.”

²⁰ Duhen ni, ni se udél yóm Dwata hol dandónen geta, monen, “Tódô koku eta nim benwu ni yóm tey lebutu. Koku eta yó kem dou tau ne eta yó kem ógóf le. Bud koku eta yó kem koyu ne eta yó kem hulu. Nim lebutu ni, hol lómón ke mkal dilóf ofi ne laen kô dù tau gembek hmatay du.”

²¹ Ni se udél yóm Dwata laen dù là gbeken du yóm kut Dwata kem tau Israél, monen, “Bée du dou yó kem dsù gel hkekeb ye ebéléu dalang se yó kem dumu gel dsù ye. Tódô ken ye yóm kdéen là kóe móyô du.

²² Bè yóm tehe kwitu kul hewà gu bè Idyip yó kem tehe fù ye, laen kô dù hlolou kul ke gbak bè yóm dsù gel hkekeb le duhen ke bè yó kem dumu dsù.

²³ Okóm yó hol hlolou kul, monu mò kul, ‘Hol nimón ye ou anì ou se mò kuy Dwata ne yu se mò dou tau. Hol lolò ye yóm deng monu mò kuy anì hyu kógów klowil ye.’

²⁴ Okóm yó kem tehe fù ye yó, là kô hnungol le dou ne là se kô kenmón le do. Deng mom yó nmò le yóm sidek lemwót bè yóm kgel kulu le ne yó kem sidek gel nô bè nawa le. Són moen temnù yóm ksidek nmò le, deng lana yóm hyu tehe tonu bélê le.

²⁵ Tódô lenwóten bè yóm kdaw tehe kehewà le gu bè Idyip yó kem tehe fù ye efet nim kmoen ni, són moen tendo wen kem tugodu mógów elem blóng ye.

²⁶ Okóm balù sotu bélê ye ke wen hmungol kul duhen ke kemmón kul. Mom hgel ye kulu ye ne knogol ye o senta yóm kul kkogol do yó kem tehe fù ye.

²⁷ Duhen ni Jirimaya, hol tulónem yó kem dou tau nim udélu ni, okóm là kô hnungol le kóm. Ke tnabahem lu anì wen eles hetgamahem kul, là kô bnalà le kóm.

²⁸ Hol tulónem kul, monem, ‘Ni se sotu but tau là kô na le e nimón du yóm sana kul Dwata hol gónó mogot. Là kô le móyô ke wen tô semtódô kul. Deng lana lem blóng le yóm ktahuhen, là kô bud gungolem du btang bè sumóng le.

²⁹ Ó kem tau Israél hol ye hlangag dé, hetbulud ye mò gónó ye hegfan du yóm klangag ye. Lemanu ye ta yó kem bulul, yakà deng kenbê Dwata kuy, yu kem tau tolo mowil nim kmoen ni. Deng tódô bayaen yu, yu kem tau hebut du.’ ”

Yóm sbong gónó le gel hmatay tau

³⁰ Yó bud udél yóm sana Dwata hol gónó mogot, monen, “Yó kem tau bè Juda, deng tey sidek nmò le bè soluhu. Deng sù le lem yóm dou Gónô yó kem dwata lennged alì sidek béléu.

³¹ Bè Sbong Hinom, deng wen gónó demsù boluyen Tufét hdà le bè yó mò gónó le hkekeb yó kem ngà udì le logi duhen libun. Nim nmò alì sidek ni, là kô hmou du kul. Balù sulék ke tô hendemu yóm nmò le yó.

³² Yó gónóm mon, eles ten-gama ye,” mon Dwata, “angat kól yóm kdawen là bud Tufét du ne boluy le du yóm sbong yó ne là bud Sbong Hinom du ne boluy le du, okóm yó tles boluy le du, Sbong Gónó Hmatay. Abay se bè yó angat gónó le lembeng yó kem tey dê tau hnatay yó kem hohon le bè Jirusalim efet laen dù gónó le bud lembeng bè yó.

³³ Ne lemwót yó kem lówó yó kem tau laen dù gónó le lembeng kul, gotu ken yó kem onuk koyu gel mken matay ne yó kem ógóf lem bnes ne laen dù bud tau mò hlikò kul.

³⁴ Bè yó kem syudad bè Juda ne bè yó kem lan bè Jirusalim, angat nmou sónen yóm kehligal le bè yó. Dalang se yóm udél yó kem tau lomi myehen, angat nmou sónen. Abay se nim benwu ni, angat henbalingu benwu laen dù tauhen.”