Jirimaya 52 - Udél Dwata: Gna Kesfasad ne Lomi Kesfasad

Kegbà Jirusalim

¹ Deng lewu folò sotu ne halay Sidikaya yóm kbalingen tau hol geta bè Juda. Ne sfolò sotu halayen kegenen mogot du ne bè Jirusalim gónóhen gel nô. Yó boluy yéen, duhen Hamutal ngà yóm sotu Jirimaya lemwót bè yóm benwu boluyen Libna.

² Bud gemsalà bè Dwata snéen kun nim Sidikaya ni, lómón yóm tehe kun nmò Jihuyakim.

³ Tey sidek kebut Dwata kul yó kem tau bè Jirusalim ne bè Juda ne yó gónón hdó kul bè soluhen, hegefen lu. Lemwót Sidikaya, natuen Nibukadnisar bè Babilun.

⁴ Ne yó gónó Nibukadnisar mundug ebè Jirusalim mung du yóm kdê sendaluen. Yóm kundugen yó, deng syóm halay sfolò bulón bud sfolò kdaw Sidikaya deng mogot benwu. Tódô gotu snibut yó kem sendalù Babilun yóm syudad Jirusalim ne tódô le kmamfù bè lewà yóm syudad ne deng wen nmò le mò lan le husek elemen.

⁵ Ngang le smibut yóm syudad Jirusalim yó kem sendalù Babilun, efet kól bè gesfoloen sotu halay kogot Sidikaya benwu.

⁶ Bè yóm gesyómen kdaw bè yóm gfaten bulón bè yóm gesfoloen halay kogot Sidikaya benwu, laen kô dù bud ken le. Ya tey sidek kbitil le yó kem tau nô lem yóm syudad.

⁷ Yó deng nmò yó kem sendalù Babilun, wen gónó le gembà du yóm beng hmilol Jirusalim anì gusek le elemen. Yó atul yó kem sendalù Juda gotu le hewà lem Jirusalim yóm kdê le, okóm là kô le tagad mlóy ke là dengen kifu, abay se deng gotu snibut yó kem sendalù Babilun yóm syudad le. Yó lan le bè bak tikeb yóm lewu kem beng sedà sentu gónón mò hulu yóm tau hol geta, tô le mlóy etu bè Datal Jurdan.

⁸ Okóm bud gotu ktes kem sendalù Babilun lu ne kenfô le Sidikaya bè Datal Jiriku. Bè yóm kekfô le du tódô le gotu sekla yó kem sendaluen, mom tnagak le Sidikaya.

⁹ Lemwót yó kem sendalù Babilun, nwit le Sidikaya ebè Nibukadnisar bè syudad Ribla bè tonok Hamat ne bè yó gónón kmukum du yóm mò tafaken du.

¹⁰ Bè yó bè Ribla, tódô hton Nibukadnisar ke Sidikaya yóm kehfatayen yó kem ngaen logi. Gotu hfatayen snéen yóm kdê genlal bè Juda.

¹¹ Ominen yó bud hsit mata Sidikaya, ominen hfét du kedina ne ominen hwit du ebè Babilun. Bè yó gónó Sidikaya blanggù efet katayen.

Kegbà yóm Gónô Dwata

¹² Bè yóm gesfoloen syóm halay bud limu bulón bud sfolò kdaw deng kegen Nibukadnisar kmamal bè Babilun, gdek bè Jirusalim Nibusaradan, yóm kmandér bè yó kem sendalù Nibukadnisar.

¹³ Yó nmò yóm kmandér yó, gotu ntemen yóm Gónô Dwata ne yóm gónô bong yóm tau hol geta mogot kul ne kdê yó kem dumu gónô bè Jirusalim. Gotu hegbaen snéen yóm kdê gónô lembang lem Jirusalim.

¹⁴ Ne gotu hegbaen bè yó kem sendaluen yóm beng hmilol Jirusalim.

¹⁵ Ne gotu negefen ebè Babilun yó kem dù tau alì élél ne yó kem dù tau mowil lem yóm syudad yó. Gotu negefen snéen yó kem tau wen kenhulung tdok le ne yó kem sendalù Israél deng gmung bélê le.

¹⁶ Okóm wen se kem tau alì élél tebel bè Juda mò fen semgifà yó kem grép hulu le ne yó kem tonok gónó mò hulu. Là gomongen bè nili yóm bérs 17 kól bè bérs 23. Yó tulónen bè ni kem bérs ni yóm boluy yóm kdê kimu ne kdê ngom nô lem yóm Gónô Dwata deng negef yó kem sendalù Babilun, hono kem kimu alì mebtes deng hetfing le ebè Dwata. Yó kem kimu là gbek le mit du, tódô lenusok le kmò le du.

Kegef le kul ebè Babilun yó kem tau wen boluyen bè Juda

²⁴ Lemwót Nibusaradan yóm kmandér bè yó kem sendalù Nibukadnisar, gomong kenfóen Siraya yóm hol geta bè yó kem tau gel blóng ebè Dwata, mung du yóm tau smugung béléen boluyen Sifanaya. Bud kenfóen snéen yóm tlu kem geta bè yó kem tau gel mentey bè bak tikeb yóm Gónô Dwata.

²⁵ Ne yó kem tau tolo hebnos lem yóm syudad, bud kenfóen yóm sotu tau fen gel malak yó kem sendalù Juda. Ne bud wen hitu kenfóen bè yó kem tau gónón gel mungol hlau yóm tau hol geta kmamal bè Juda. Ne bud kenfóen snéen yóm genlal gel mogot lista yóm kmandér yó kem sendalù Juda ne bud wen nem folò kem dumu tau wen glalen bè Juda nwiten.

²⁶ Gotu nwiten lu etu bè yóm tau hol geta bè Babilun bè syudad Ribla.

²⁷ Ne bè yó bè Ribla bè tonok Hamat, gotu hfatayen lu yóm tau hol geta bè Babilun. Duhen yó, gotu negef le lu mayuk yó kem tau bè Juda, tnagak le yóm kul benwu.

²⁸ Bè yóm ghituhen halay kogot Nibukadnisar yóm benwu Babilun, botong 3,023 tau Juda tanay negefen ebè Babilun.

²⁹ Bè yóm gesfoloen wolu halay mogot benwu bud wen 832 tau negefen, hono tau lemwót bè Jirusalim.

³⁰ Ne bè yóm gewuhen folò tlu halay mogot benwu, bud wen 745 tau hegefen ke Nibusaradan yóm kmandér bè yó kem sendaluen. Setnù kdéen, botong 4,600 tau Israél negef le.

Yóm nmò Dwata anì là lanahen bè sfu Dabid yóm tau mò geta bè Israél

³¹ Bè yóm deng getluhen folò hitu halay kegen Jihuyakin blanggù bè Babilun, yóm sotu tau tehe geta bè Juda, wen tau hol geta bud tles mogot yóm benwu Babilun boluyen Ibil-mirudak. Tey hyu knawahen ebè Jihuyakin, botong hewaen gu lem blanggù. Yóm kdaw kehewaen du yó, bè gewuhen folò limu kdaw bè yóm gesfoloen lewu bulón bè yóm halay yó.

³² Tey hyu kudélen ebè Jihuyakin ne tey nadaten senta yó kem dumu tau hol geta deng negef le ebè Babilun.

³³ Wen nes lomi blayen du mò tles yóm nes blanggù leseken ne gel hmungen mken bè yóm kun lemisa efet katay Jihuyakin.

³⁴ Hyu wen filak blayen du ket bulón mò gel lowilen efet katayen.