Jirimaya 45 - Udél Dwata: Gna Kesfasad ne Lomi Kesfasad

Yóm udél Dwata ebè Baruk

¹ Bè yóm deng gfaten halay kmamal bè Juda Jihuyakim yóm ngà Jusaya logi, wen udél Dwata hsulat Jirimaya ke Baruk yóm ngà Niraya logi. Kogol yóm deng ksulat Baruk du yóm kdéen, wen udél Jirimaya ebéléen, monen,

² “Ó Baruk, ni se udél Dwata ebéléem, yóm kut Dwata kem tau Israél, monen mò kóm,

³ Yó deng udélem, ‘Denge tmakas ne. Tendo tennù Dwata yóm blat nô tahu. Laen kô dù bud gelu ne tódô sónmou dmolong, là kóe gehegnô.’

⁴ Okóm Baruk, ni se udél Dwata ebéléem, monen, Angat gotu genlau nim benwu deng tehe hdau ni. Gotu kendutu lu yó kem tau deng tehe huluhu.

⁵ Yó kô hnebelem ke wen kegetahem? Béem nmò yóm yó. Okóm béem abay heblat nawam. Angat wen tey heglumfaku kul yóm kdéen tau bè nim benwu ni. Okóm kóm du, tendo kenlungu uu balù nô gónóm e solu, là kô wen tau hmatay kóm. Ou se Dwata nim mudél ni.” Là gomongen bè nili yóm tsaptér 46 kól bè tsaptér 51. Yó tulónen lemen yóm eles htugod Dwata ke Jirimaya gbak ebè yó kem hohon le. Eles tulón Jirimaya yó kem tau Israél yóm angat ktafak Dwata yó kem hohon le, duhen yó kem tau Idyip ne kem tau Flistin ne kem tau Muab ne kem tau Amunayt ne kem tau Idom ne kem tau bè Damaskus ne kem tau Kidar ne kem tau bè Ilam ne kem tau bè Babilun. Angat lus Dwata yó kem tau bè Babilun mò gemlà kul yó kem tau bnoluyen ni. Okóm kogolen bè yó Dwata fen gemlà kul yó kem tau Babilun. Kdê yó kem tau hohon Israél bnoluyen yó koni, wen se bélê le yóm là bud hen-gulék Dwata du, duhen yó kem tau Idom ne tau Flistin ne tau Damaskus ne tau Kidar ne tau Babilun. Lemwót bè yóm alì kehegmón le gónó Dwata là bud hemgulék kul.