Jirimaya 42 - Udél Dwata: Gna Kesfasad ne Lomi Kesfasad

Kóyô Dwata ke tódô le henek bè Juda yó kem dù tau tebel bè yó

¹ Omin le gotu mógów ebè Jirimaya yóm kdéen genlal bè yó kem sendalù Israél, mung kul Juhanan yóm ngà Kariya logi ne Jisanaya yóm ngà Husaya logi ne kdê yó kem tau kewóten bè leneken kkólen bè lebangen, gotu le mógów ebè

² Jirimaya yóm tau tugod Dwata. Yó mon le mò du, “Holi mni kum bè yóm sana kut Dwata hol gónó mogot. Tonem ni là kô tekuy hol bud wen. Là mkélen bè yóm gnan, tehe tey kwen tekuy.

³ Hkoduhi kut bè yóm sana kut Dwata hol gónó mogot anì tngón me yóm kun kóyô bè yóm angat nmò me ne ke tedu gónó me e solu.”

⁴ “Yó ne,” mon Jirimaya, “mnihe bè yóm sana kut Dwata hol gónó mogot ne gotu tulónu kuy yóm monen. Là kô bunihu du bélê ye.”

⁵ Ominen yó udél le ebè Jirimaya, mon le, “Yó hem sana kut Dwata hol gónó mogot hol temksì kum ke là nimón me du yó kem tulónen kum.

⁶ Ke móyô me du yóm tulónen kóm, duhen ke là móyô me du, nimón me yóm sana kut Dwata hol gónó mogot yóm Dwata gónó me hefni kóm. Ke hol nimón me angat baling hyu kógów klowil me.”

⁷ Timbow sfolò butengen bè yó, bnalà Dwata yóm hni Jirimaya.

⁸ Duhen yó, htaba Jirimaya Juhanan yóm ngà Kariya logi ne yó kem genlal bè yó kem sendalù ne kdê yó kem tau kewóten bè leneken kkólen bè lebangen.

⁹ Yó udél Jirimaya ebélê le, monen, “Deng hefni ye ou ebè Dwata yóm kut Dwata yó kem tau Israél, deng gotu tulónu du yóm hni ye béléen ne ni se balaen kuy, monen,

¹⁰ ‘Tódô ye henek bè nim benwu ni. Ke ni se nmò ye bud hdau yu, là kô naw e bud hebtang kuy. Lómón ke bud huluhu yu ne là kô naw e bud kendut kuy. Là gbeku du ke là tnafaku kuy lemwót bè yóm là kimón ye. Bede bud sidek kegnómu du bè yóm alì keglayam ye.

¹¹ Bê ye abay bud hlikò bè yóm tau hol geta bè Babilun, abay se ou tendo nô bélê ye ne angat bud lenwau yu lem hólólen.

¹² Hlanu béléen yóm kkoduhu kuy anì tilob knawahen ebélê ye ne tódô bud suen yu ta yóm kuy tonok.’

¹³ Okóm ke là nimón ye du yóm sana kuy Dwata hol gónó mogot ne ke mon ye, ‘Là kô me móyô nô bè ni.’

¹⁴ Ne ke alì duil ye se mógów ebè Idyip, abay se hendem ye laen dù bud gmida kuy ditu ne là bud ye bitil ne laen dù bud hennilam ye.

¹⁵ Ke yó se udél ye, ni se kun udél Dwata ebè yó kem dù tau tebel bè Juda. Yó udélen ebélê ye yóm Dwata laen dù là gbeken du, yóm Dwata yó kem tau Israél, monen, ‘Ke alì duil ye mógów ebè Idyip,

¹⁶ yóm gida ne bitil alì knikò ye angat tendo eles huli kuy ne angat ye tódô matay ditu.

¹⁷ Yó se yóm angat nô ta yóm ket kuy sotu dmendel mógów etu. Tahu se, wen se bélê ye angat matay bè gida ne wen se angat matay lemnus ne wen se angat matay bè des. Laen kô dù bélê ye gewà gu lem yóm angat glumfak ye ditu.’

¹⁸ Ni se udél yóm Dwata laen dù là gbeken du, yóm Dwata yó kem tau Israél, monen, ‘Deng koku eta yó kem tau bè Jirusalim yóm tey sidek kebutu kul. Hol lómón yó se angat bud nmou bélê ye ditu bè Idyip. Yó kem tau nô bè yó, angat baling kenhisik le yu, lel le hemmulà kuy lel le semlón kuy. Ne là kô bud ton ye du ne yóm kuy benwu.’

¹⁹ Ó kem dù tau tebel bè Juda, hol ye hmungol. Deng mon Dwata mò kuy, ‘Hol bê ye abay mógów ebè Idyip.’ Hol bê ye abay klifót nim eles hetgamahen kuy ni.

²⁰ Deng tnondo ye ou bè yóm kdók ye dou mni bè yóm sana kut Dwata hol gónó mogot. Yó mon ye, ‘Hol tulónem kum yóm udél yóm sana kut Dwata hol gónó mogot anì nimón me.’

²¹ Nim kemdaw ni deng gotu tulónu kuy se yóm hol udélen ebélê ye yóm sana kut Dwata hol gónó mogot, okóm là kô nimón ye du. Yóm là kimón ye nim kmoen ni, hol mkél bè yóm tehe gna là kimón ye.

²² Yó gónóm mon, là kóen megewu nawa ye du yóm angat katay ye bè gida ne katay ye lemnus ne katay ye bè des ditu bè Idyip, yóm benwu gónó ye e dmendel mógów.” Là gomongen bè nili yóm tsaptér 43 ne 44. Yó tulónen bè tsaptér 43 yóm là kimón yó kem tau dù tebel bè Juda du yóm kmon Dwata du mò kul hol le henek bè Juda. Deng mom yó nmò le gotu le mógów ebè Idyip, nwit le Jirimaya ne Baruk. Yó gónó le mógów ebè Idyip, abay se likò le ke Nibukadnisar. Tikóng le kól bè Idyip, bud wen udél htugod Dwata ke Jirimaya mò tulónen kul, monen, “Yóm Nibukadnisar tendo knikò ye ni, mom du tau mò tóbóng lówóhu. Ou se bud hógów du ebè Idyip anì nan e gotu gnida yóm klamang Idyip. Gotu ntemen yóm gónô yó kem dwata kéng le ne gotu negefen lu ebè Babilun yó kem tau Idyip.” Yó tulónen bè tsaptér 44, yóm bud htugod Dwata ke Jirimaya ebè yóm kdéen dù tau Juda deng kól bè Idyip. Bud hegbel Dwata bè nawa le yóm but gónón gemlà yóm benwu Juda ne syudad Jirusalim lan le tmógó mambang mò dsù le ebè yó kem dwata kéng hentahu le ne lan le mtem insinsu ebélê le lem yóm kul gónô. Bud senged se nmò le ni kem tau ni bè yóm deng knô le bè Idyip, là kô kó le du. Ne yó gónó Dwata bud htugod ke Jirimaya anì eles tngón le yóm angat tey ktafaken kul efet le gotu matay yóm kdê le, dalang se yó kem ngà tolo sniwi le. Wen se bè yó kem tau là mimón yó angat matay bè gida ne wen se bélê le matay lemnus.