Jirimaya 40 - Udél Dwata: Gna Kesfasad ne Lomi Kesfasad

Knô Jirimaya bè gónô Gidalaya

¹ Wen udél Dwata ebè Jirimaya kogol yóm deng kegewaen gu lem blanggù bè benwu Rama. Yóm kmandér bè yó kem sendalù Babilun boluyen Nibusaradan fen hewà du. Tonen Jirimaya mung nfét le kedina bè yó kem dumu tau negef le bè Jirusalim ne bè Juda ne nwit le lu ebè Babilun.

² Lemwót yóm kmandér yó tnabahen Jirimaya, monen mò du, “Kaem yóm sana kuy Dwata hol gónó mogot yóm hemwit du elem benwu ye nim glumfak ye ni,

³ hol lómón yóm deng monen mò kuy. Yó gónón hdohò du eta ye nim ni lan le gemsalà béléen yó kem tauhen ne lan le là mimón du.

⁴ Ni kóhu béléem yóm fét kedina bè henmuem anì gliwai. Ke móyói mung do ebè Babilun, mungi ne ou he semgifà kóm ditu. Okóm ke là móyói mung, tódói tebel bè ni. Kihu kóm nóyô gónó e solu bè klamangen nim benwu ni.

⁵ Ke móyói tebel, mógówi ebè Gidalaya yóm ngà Ahikam témê Syafan. Du deng nélék yóm tau hol geta mogot bè Babilun mò gubérnor bè Juda. Nói béléen bè yó lem blóng yó kem tau nogoten. Okóm kihu kóm nóyô gónó nô.” Ominen wen ken ne filak blay Nibusaradan du, ominen yó hewót du.

⁶ Duhen yó lemwót Jirimaya mógów ebè Gidalaya yóm ngà Ahikam logi nô bè Mispa, nô lem blóng yó kem hilu dù tau tebel bè Juda.

Gidalaya yóm gubérnor bè Juda

⁷ Wen se bè yó kem sendalù genlal bè Juda dalang se yó kem sendalù nogot le tolo le hebnos, là móyô le heglaan bè yóm tau hol geta kmamal bè Babilun. Timbow gungol le yóm deng kehyón yóm tau hol geta kmamal bè Babilun ke Gidalaya yóm ngà Ahikam logi, mò gubérnor bè yó kem tau élél dù tebel bè Juda, yó kem tau là gomong negef le kul.

⁸ Yó nmò le, mógów le ebè Gidalaya bè Mispa. Yó boluy yó kem genlal mógów, Ismaél yóm ngà Nitaniya logi ne Juhanan lewu le Junatan hono kem ngà Kariya logi ne Siraya yóm ngà Tanhumét logi, ominen yó kem ngà Ifay logi lemwót gu bè benwu Nitufa ne Jaasaniya lemwót gu bè benwu Maaka, mung kul yó kem tau nalak le. Gotu le mógów ebè Gidalaya.

⁹ Yó tulón Gidalaya kul, hyu ke heglaan le bè yóm tau hol geta kmamal bè Babilun, monen mò kul, “Henek ye bè ni ne nimón ye yóm tau hol geta bè Babilun anì hyu kógów klowil ye.

¹⁰ Bong ni dum dou, heneke bè ni bè Mispa mò dung lówó ye ke wen kem tau Babilun sut bè ni. Tódô ye mélék mò gónó ye henek nô, mebel ye ken ye bè nim tonok ni. Muta ye yó kem bungu grép ne yó kem dumu bungu koyu ne bungu ulib mò henyu ye.”

¹¹ Wen kem tau tehe nô bè Juda deng mlóy ebè Muab ne ebè Amun ne ebè Idom ne ebè yó kem dumu benwu hmilol. Timbow gungol le yóm deng kehyónen ke Gidalaya yóm tau hol geta bè Babilun mò gubérnor bè yó kem tau dù tebel bè Juda,

¹² gotu le bud mulék ebè Juda se kul gu bè yó kem benwu deng gónó le e sekla. Na le slob bè Mispa setngón le bè Gidalaya, omin le yó mbut muta yó kem tey bungu grép ne yó kem dumu hulu.

Katul le ke Gidalaya

¹³ Kogolen bè yó, lemwót Juhanan yóm ngà Kariya logi ne yó kem dumuhen malak yó kem sendalù là deng heglaan bè yóm tau hol geta kmamal bè Babilun, mógów le ebè Gidalaya bè Mispa.

¹⁴ Yó mon le mò du, “Deng tngónem kô yóm kdók Baalis yóm tau hol geta kmamal bè Amun ke Ismaél yóm ngà Nitaniya logi mò na a hmatay kóm?” Okóm là kô hentahu Gidalaya kul.

¹⁵ Kogolen bè yó, lemwót Juhanan lifut stulón ke Gidalaya anì du fen lifut hmatay ke Ismaél, monen mò ke Gidalaya, “Moen ke hnatayen uu? Tedu se tô kmò le du yó kem tau lomi semfulék ebè Juda ni ke tói lana lem blóng le? Igò tekuy là hol wen ke tô tekuy gotu lana.”

¹⁶ Okóm yó udél Gidalaya ebè Juhanan, monen, “Bê. Béem lusà du tô nmoem. Béem tnifù kéng Ismaél.”