Jirimaya 39 - Udél Dwata: Gna Kesfasad ne Lomi Kesfasad

Kegbà Jirusalim

¹ Timbow deng syóm halay sfolò bulón Sidikaya kmamal bè Juda, lemwót Nibukadnisar yóm tau hol geta bè Babilun, bud mulék ebè Jirusalim mung du yóm kdê sendaluen anì na le e snibut yóm syudad yó.

² Botong lewu halay sóól kegen le smibut du, ne tódô genbà le yóm beng hmilol Jirusalim. Bè yóm kegbà le du yó, deng sfolò sotu halay bud fat bulón bud syóm kdaw Sidikaya ne deng kmamal bè Juda.

³ Bè yóm gónó le gembà du yóm beng hmilol Jirusalim yó, gónó le gotu mlan yóm kdê genlal bè yó kem sendalù Babilun ne myón le bè yóm gónô kmukum bè yóm bak tikeb bnoluy le Tikeb Gónón Sóól. Yó genlal mógów elemen, duhen Nirgal-sarisér lemwót bè Samgar, ne Nibu-sarsikim yóm sotu geta bè yó kem sendalù, ne yóm sotu Nirgal-sarisér yóm gónón gel mungol hlau yóm tau hol geta, ne tey wen he kem dumu genlal mung kul.

⁴ Timbow ton Sidikaya ne yó kem sendaluen yóm deng kógów le elemen yó kem genlal bè Babilun yó, yó nmò le nangat le yóm kkifuhen, omin le yó gotu mlóy. Mlan le bè galdin Sidikaya etu bè yóm bak tikeb yóm lewu beng sedà hmilol Jirusalim, ne tô le hlós etu bè Datal Jurdan.

⁵ Okóm tódô gotu bud ktes le lu yó kem sendalù Babilun ne kenfô le Sidikaya bè Datal Jiriku. Nwit le ebè Nibukadnisar yóm tau hol geta bè Babilun, deng kól bè syudad Ribla bè tonok Hamat. Bè yó gónó Nibukadnisar kmukum du.

⁶ Bè yó bè Ribla tódô gotu hfatay Nibukadnisar yó kem ngà Sidikaya logi ne yóm kdê genlal bè Juda bè yóm igoen temngel.

⁷ Ominen yó hesit mata Sidikaya ne hféten kedina ne ominen hwit du etu bè Babilun.

⁸ Ne ditu bè Jirusalim, tódô gotu ntem yó kem sendalù Babilun yóm syudad yó, gomong yóm gónô bong yóm tau hol geta ne gotu genbà le yóm beng hmilol Jirusalim.

⁹ Lemwót Nibusaradan yóm kmandér bè yó kem sendalù, gotu negefen lu ebè Babilun yó kem tau dù tebel lem yóm syudad yó, gomong yó kem tau deng gfi béléen.

¹⁰ Okóm fen tebelen bè Juda yó kem tau alì élél mò semgifà yó kem tonok gónó mò hulu ne yó kem grép hulu le.

Ktebel Jirimaya bè Juda

¹¹ Lemwót Nibukadnisar dóken Nibusaradan hangayen du Jirimaya, monen,

¹² “Béen wen hemdes du ne hol sen-gyok ye. Tódô blay ye du kihu nóyóen.”

¹³ Tahu se, yó nmò Nibusaradan yóm kmandér bè yó kem sendalù Babilun ne Nibusasban yóm sotu genlal geta bè yó kem sendalù ne Nirgal-sarisér yóm gónón gel hmungol hlau yóm tau hol geta ne yó kem dumu genlal yóm tau hol geta bè Babilun,

¹⁴ mdók le kem tau mò hewà ke Jirimaya gu lem blanggù. Bè yóm deng kegewà Jirimaya, wen sotu tau gónó le smalig du boluyen Gidalaya yóm ngà Ahikam logi ne témê Syafan. Du mò fen mit du mulék ebè kun gónô. Tahu se, tódô nô bè Juda Jirimaya lem blóng yó kem dumuhen.

¹⁵ Bè yóm igò Jirimaya tolo nô lem blanggù, wen udél Dwata ebéléen, monen,

¹⁶ “Tulónem ke Ibid-mélék yóm tau lemwót bè Ityupya, monem mò du, ‘Yó udél yóm Dwata laen dù là gbeken du, yóm Dwata yó kem tau Israél, monen, Angat nmou bè nim syudad ni yó kem deng eles oluhu etahen. Wen tey heglumfaku du nim syudad ni, balù udì ke wen hyu mung du. Angat tonem se kóm yóm kegbaen.

¹⁷ Okóm kóm du Ibid-mélék, fen hewau uu bè yó kem tau alì knikoem.

¹⁸ Abay se snaligem ou, yó gónóhu hlowil kóm ne gónóhen laen dù hemenem. Ou se Dwata nim mudél ni.’ ”