Jirimaya 38 - Udél Dwata: Gna Kesfasad ne Lomi Kesfasad

Ksù le ke Jirimaya lem yóm sol gónó le gel hemyu él

¹ Yóm gel tulón Jirimaya bè yó kem tau, gungol le Sifataya yóm ngà Matan logi ne Gidalaya yóm ngà Pasur logi ne Jihukal yóm ngà Silimaya logi ne yóm sotu Pasur yóm ngà Malkiya logi. Yó gel tulón Jirimaya bè yó kem tau, monen,

² “Ni se udél yóm sana Dwata hol gónó mogot, monen, Ket tau tebel bè nim syudad Jirusalim ni angat matay. Wen se matay bè gida ne wen se matay lemnus ne wen se matay bè des. Okóm yó se tau hewà bè nim syudad ni ne heglaan bè yó kem sendalù Babilun, là kóen matay angat mowil.

³ Wen sotu udél Dwata ebélê ye, monen mò kuy, Nim syudad Jirusalim ni, angat suu lem hólól yó kem sendalù yóm tau hol geta kmamal bè Babilun anì nled le.”

⁴ Duhen yó, lemwót yó kem genlal bè Juda yó mógów le ebè yóm tau hol geta bélê le, mon le mò du, “Ó Sér, tódô hnatay tekuy ne nim tau ni. Ngem ni dé lemwót bè yó kem tendo gel tulónen, botong lana bè yó kem dù sendalù tekuy yóm kfól nawa le dalang se bè yó kem dumu tau tebel bè nim syudad ni. Yó kem gel tulónen laen kô gónón gemtóbóng yó kem tau, deng mom hensideken lu.”

⁵ Yó balà Sidikaya kul, monen, “Yó ne, deng nô lem hólól ye yóm tau yó. Laen kô dù lanu hemseng kuy.”

⁶ Tahu se, nwa le Jirimaya ne omin le mfét du, hloyol le elem yóm sol tehe hokol Malkiya mò gónó le hemyu él. Nim Malkiya ni sotu ngà yóm tau hol geta bélê le. Yóm sol yó, nô talak lósól gónô bong yóm tau hol geta bélê le bè yóm gónóhen nô yóm tau gel mentey bè yó. Laen dù élen tódô hono hitok, botong gebeng lemen Jirimaya.

⁷ Okóm wen sotu tau boluyen Ibid-mélék yóm tau lemwót bè Ityupya, tau bong glalen lem yóm gónô bong yóm tau hol geta. Gungolen se kun yóm deng kehloyol le ke Jirimaya elem yóm sol hono hitok. Bè yóm kungolen du, tolo myón bè yóm gónón gel myón kmukum yóm tau hol geta bè Bak Tikeb Bindyamin.

⁸ Tódô kendel mlóy ebéléen Ibid-mélék na a stulón du, monen mò du,

⁹ “Ó Sér, tey sidek nmò le bè Jirimaya yóm tau tugod Dwata. Tódô hloyol le elem tum sol gónó le gel hemyu él tódô hono hitok. Là kóen legen angat matay lemnus mtu kdeng, abay se móyón gotu yóm ken bè nim syudad ni.”

¹⁰ Yó mon yóm tau hol geta mò ke Ibid-mélék, “Miti tlu folò bè yó kem dou tau bè ni mò tmóbóng kóm, nwa ye eta Jirimaya gu laanen là deng matay.”

¹¹ Tahu se, nwit Ibid-mélék yó kem tau yó mógów le ebè yóm sotu dfél nô laan yóm dfél gónó le gel hemyu filak, yóm dfél gónó le gel hemsù yó kem nes deng legen bè gónô bong. Wen nwa le bè yó kem nes yó ne nwit le bè yóm sol gónón nô Jirimaya. Kkól le bè yó, hloyol le ebè Jirimaya.

¹² Yó udél Ibid-mélék ebè Jirimaya, monen, “Suem bè imakem nim nes ni anì là desen yóm fét.” Tahu se, nmò Jirimaya.

¹³ Omin le yó semketeng ke Jirimaya eta. Bud hulék le ebè yóm gónó blanggù bè lósól yóm gónô bong yóm tau hol geta bélê le bè yóm gónóhen nô yóm tau gel mentey bè yó ne bè yó gónó Jirimaya hlós nô.

Yóm snólók Sidikaya bè Jirimaya

¹⁴ Sotu kdaw bè yó, hangay Sidikaya Jirimaya yóm tau tugod Dwata, etu bè yóm getluhen bak tikeb bè Gónô Dwata. Bè yóm keston le yó mon yóm tau hol geta mò ke Jirimaya, “Wen snólóku béléem, hol tulónem dou yóm ktahuhen.”

¹⁵ Bnalà Jirimaya se, monen, “Ke tulónu kóm yóm ktahuhen Sér, kaem angat hfatayem ou. Ne ke hnauhu uu, là kô hnungolem do.”

¹⁶ Duhen yó wen fasad Sidikaya ke Jirimaya, bede lifuten du, monen, “Wen fasadu kóm mlan bè boluy yóm Dwata là matayen, yóm Dwata tehe hlowil kut. Là kô hfatayu kóm ne là se kô blayu kóm elem hólól yó kem tau tô hmatay kóm.”

¹⁷ Omin yó bud udél Jirimaya ebè Sidikaya, monen, “Ni se udél yóm sana kut Dwata hol gónó mogot yóm Dwata laen dù là gbeken du, yóm Dwata yó kem tau Israél, monen, Ke heglaani bè yó kem genlal yóm tau hol geta bè Babilun, là kô hnatay le kóm ne là se kô ntem le du yóm syudad ni. Ke heglaani bélê le mowili se kóm dalang se yó kem fes lówóhem.

¹⁸ Okóm ke là heglaani bélê le, là kói gewà. Ne angat blay Dwata elem hólól yó kem sendalù bè Babilun nim syudad ni ne gotu ntem le.”

¹⁹ Yó balà Sidikaya ke Jirimaya, monen, “Likoe heglaan bè yóm tau hol geta bè Babilun, déke blayen ou elem hólól yó kem tau Juda deng mung béléen. Déke mom hnatay le ou.”

²⁰ Okóm yó balà Jirimaya ke Sidikaya, monen, “Là. Là kô blay le kóm yó kem sendalù Babilun elem hólól le ke nimónem yóm deng mon Dwata mò kóm. Ke nimónem, là kói matay ne angat hyu kógów klowilem.

²¹ Okóm ke là heglaani, deng hegfan Dwata béléu yóm angat glumfakem.

²² Tódô kdê yó kem libun tebel bè yóm gónô bongem, gotu nwit le lu ebè yó kem genlal yóm tau hol geta bè Babilun. Bè yóm igò le mógów yó kem libun yó udél le ebéléem, mon le, ‘Deng snukat le uu yó kem weem deng snaligem. Tólóng lan hlolò le kóm. Ne ni, deng gebeng lem hitok tihem, lelen yó he deng knogol le uu yó kem weem yó.’

²³ Kdê yó kem yehenem ne yó kem ngaem gotu nwit le lu ebè yó kem sendalù Babilun. Balù uu, là kói gewà bélê le. Hekfóen uu yóm tau hol geta bè Babilun ne htemen nim syudad ni.”

²⁴ Bnalà Sidikaya se monen mò ke Jirimaya, “Béem abay tulón bè kihu tau nim deng sentulón te ni. Ke tulónem, angati matay.

²⁵ Ke gungol yó kem genlal yóm deng kestulón te ne ke mógów le ebéléem, ke snólók le tedu yóm deng sentulón te hol béem abay tulón. Anien he ke wen fasad le kóm, ke mon le là kô hnatay le kóm ke gotu tulónem.

²⁶ Yó tulónem kul, monem, ‘Hkoduhe bè yóm tau hol geta anì là bud heblangguen dou ditu laan tonok bè gónô Junatan, déke mataye ditu.’ ”

²⁷ Tahu se, gotu le mógów ebè Jirimaya yó kem genlal, snólók le tedu yóm deng sentulón le yóm tau hol geta. Gotu tulón Jirimaya kul yóm htulónen du yóm tau hol geta. Duhen yó, laen dù bud udél le yó kem genlal yó, abay se laen dù tau hmungol du yóm deng sentulón le Jirimaya yóm tau hol geta.

²⁸ Lemwót Jirimaya tódô hlós nô bè lósól yóm gónô bong, bè yóm gónón nô yóm tau gel mentey bè yó efet kól bè yóm kdaw kundug le yóm benwu Jirusalim.