Jirimaya 37 - Udél Dwata: Gna Kesfasad ne Lomi Kesfasad

Khangay Sidikaya ke Jirimaya

¹ Timbow deng matay Jihuyakim, lemwót Nibukadnisar yóm tau hol geta bè Babilun, nmoen Sidikaya yóm ngà tehe Jusaya logi mò tles mogot bè Juda. Du mò tles Jihuyakin yóm ngà Jihuyakim logi.Okóm balù Sidikaya ne yó kem genlalen ne yó kem dumu tau tebel bè Juda, balù udì ke hnungol le yóm udél Dwata htugoden ke Jirimaya.

² Okóm balù Sidikaya ne yó kem genlalen ne yó kem dumu tau tebel bè Juda, balù udì ke hnungol le yóm udél Dwata htugoden ke Jirimaya.

³ Sotu kdaw bè yó, yó nmò Sidikaya, wen lewu tau dóken ebè Jirimaya, duhen Jihukal yóm ngà Silimaya logi, lewu le Sifanaya yóm tau gel blóng le ebè Dwata ngà Maasiya logi. Hógówen lu etu bè Jirimaya anì mon le mò du, “Ó Jirimaya, holi mni kut bè Dwata yóm sana kut Dwata hol gónó mogot. Hnihem kut yóm kbenwu tekuy.”

⁴ Bè yóm kdaw yó, là dengen geblanggù he Jirimaya tolo mógów lem blóng yó kem tau.

⁵ Uma kóm bè yóm kdaw yó, deng senibut yó kem sendalù Babilun yóm syudad Jirusalim. Okóm timbow gungol le yóm deng kegdofì yó kem sendalù Idyip bè tonok Juda fi leged anì na le e gnida yó kem sendalù Babilun, yó gónó le tódô lemwót bè yó bè Jirusalim yó kem sendalù Babilun.

⁶ Omin Dwata mudél ebè Jirimaya, monen,

⁷ “Ni se udél Dwata yóm kul Dwata yó kem tau Israél, monen, Hol tulónem ke Sidikaya yóm tau hefni kóm béléu, mon ye mò du, Deng le nô bè lan ne yó kem sendalù Idyip tô tmóbóng kóm, okóm móyón le bud semfulék ebè benwu le.

⁸ Ne yó kem sendalù Babilun ke deng le gemmò bè yó kem sendalù Idyip, bud le semfulék edini na le e genbà nim syudad Jirusalim ni ne gotu ntem le.

⁹ Yó bud udél Dwata, monen mò kuy, Ofo kuy mon du ke là bud le semfulék yó kem sendalù Babilun. Kaem bud senfulék le yu he.

¹⁰ Baluen he ke gemmò ye bè kdê yó kem sendalù Babilun ne són mowil bélê le yó kem olon hnalì, kaem yó kem olo le hnalì yó tódô le btik bè yó kem kamfù le na le e ntem nim syudad ni.”

Kekfô le ke Jirimaya ne keheblanggù le du

¹¹ Timbow tnagak yó kem sendalù Babilun Jirusalim bè yóm na le e kgida yó kem sendalù Idyip,

¹² kewót Jirimaya bè yó se kun bè Jirusalim tô mógów etu bè tonok Bindyamin nan e nauy yóm tonok deng benlihen.

¹³ Okóm tikóng kól bè Bak Tikeb Bindyamin, wen sotu tau mentey bè yó kemfô du boluyen Iriya yóm ngà Silimaya logi ne témê Hananiya. Yó monen mò du yóm tau mentey yó, “Uu se sotu tau deng mung bè yó kem sendalù Babilun.”

¹⁴ Bnalà Jirimaya se, monen, “Là gi. Là kóen tahu yóm monem yó. Là nóen bè nawahu mung bélê le.” Okóm là kô hnungol Iriya du, mom kenfóen Jirimaya ne nwiten ebè yó kem genlal.

¹⁵ Ya tey kebut le ke Jirimaya yó kem genlal efet hfes le ne bnanggù le lem gónô Junatan yóm tau fen gel smulat bélê le bè kukum. Yóm gónóen yó deng nmò le mò gónô blanggù.

¹⁶ Sù le Jirimaya ditu bè yóm sotu gónó blanggù deng nmò le laan tonok, botong hilu kdawen nô bè yó.

¹⁷ Bè yóm knô Jirimaya bè yó, lemwót Sidikaya hangayen Jirimaya ebè gónô bongen ne wen lifut snólóken béléen, monen, “Wen kô udél lemwót bè Dwata?” Bnalà Jirimaya se, monen, “Wen. Angati gnô lem hólól yóm tau hol geta bè Babilun.”

¹⁸ Omin Jirimaya smólók ke Sidikaya, monen, “Salà du de yóm deng nmou béléem ne bè yó kem genlalem duhen ke bè yó kem dumu tau mò gónóm heblanggù dou laan tonok?

¹⁹ Nô se lu du yó kem dumu tugodem yóm tmulón du kóm yóm là kundug le yóm benwuhem yó kem sendalù Babilun?

²⁰ Duhen ni, uu se gónóhu mogot, hkoduhe béléem béem abay bud heblanggù ou ne ditu laan tonok bè gónô Junatan yóm tau gel smulat bè kukum. Ke bud heblangguem ou ditu angate matay ditu.”

²¹ Tahu se, là bud hulék Sidikaya ke Jirimaya lem yóm blanggù laan tonok. Yó gónón kmukub du bè talak lósól yóm gónô bongen bè yóm gónóhen nô yóm tau gel mentey bè yó. Bud wen sotu tau dóken anì gel benlay le sotu mambang tahà ket kdaw lemwót bè yó kem tau gel mò mambang. Tódô hlós kmò le du nim ni efet laen dù bud mambang le. Duhen yó, tódô hlós nô bè yó Jirimaya bè lósól yóm gónô bong bè yóm gónóhen gel nô yóm tau gel mentey bè yó.