Jirimaya 34 - Udél Dwata: Gna Kesfasad ne Lomi Kesfasad

Yóm eles hetgama Dwata ke Sidikaya

¹ Bè yóm kgida Nibukadnisar bè Jirusalim ne bè yó kem dumu benwu glem lem Juda, mung du yóm kdê sendalù lemwót bè kdê yó kem benwu snakufen. Bè yóm kdaw yó wen udél Dwata ebè Jirimaya, monen,

² “Mógówi etu bè Sidikaya bè Juda tulónem du, ‘Ni se yóm udél Dwata yóm Dwata yó kem tau Israél, monen, Móyón hlusu elem hólól yóm tau hol geta mogot yóm benwu Babilun nim syudad ni ne angat gotu ntemen.

³ Là kô gbekem hemlóy du, angat negefen uu. Angati mdà bè solu yóm tau hol geta yó nan e knukum uu bè yóm ktafaken kóm. Ominen megef kóm etu bè Babilun.’

⁴ Okóm, Sidikaya yóm tau hol geta mogot yóm benwu Juda, hol hnungolem yóm fasad Dwata kóm, monen, ‘Là kói matay bè gida se kóm,

⁵ okóm matayi lem blóng yó kem tauhem. Hyu le mtem insinsu béléem lómón yóm deng gel nmò le bè yó kem tau hol geta gónóm gu semfu. Angat nkik le uu, mon le, “Adéy, deng matay yóm tau hol geta bélê tekuy.” Ou se Dwata nim mudél ni.’ ”

⁶ Tahu se, gotu tulón Jirimaya ke Sidikaya bè Jirusalim yóm tau hol geta mogot yóm benwu Juda, yóm udél Dwata ni.

⁷ Bè yóm kdaw yó, tolo lel yó kem sendalù Babilun mundug yóm syudad Jirusalim, gomong Lakis ne Asika kem dù syudad bè Juda tolo mdà yóm beng hmilol kul. Là gomongen bè nili yóm bérs 8 kól bè bérs 22. Yó tulónen bè ni kem bérs ni, bè yóm deng gotu keslibut kem sendalù Babilun du yóm syudad Jirusalim wen udin nmò Sidikaya anì gotu hulék kem tau Israél yóm kdéen tau Hibru hesek le, logi duhen libun. Tahu se, nimón le yóm udin ni. Hyu nmò le lem Gónô Dwata ne hlan le bè boluyen. Okóm tikóng tnagak yó kem sendalù Babilun yóm syudad Jirusalim na le e gnida yó kem sendalù Idyip, ofo kul mon du yó kem tau bè Jirusalim ke là bud le semfulék ebè yó, yó kem sendalù Babilun. Yó nmò le, gotu bud nangay le yó kem hesek deng hulék le, bud hesek le lu. Lemwót bè yóm deng kulé le du yóm fasad deng nmò le lem Gónô Dwata lel le hlan du bè boluyen, yó gónó Dwata alì lembut kul. Yó gónón gotu bud hesfulék yó kem sendalù Babilun anì gotu hnatayen lu.