Jirimaya 32 - Udél Dwata: Gna Kesfasad ne Lomi Kesfasad

Kebli Jirimaya tonok

¹ Timbow deng sfolò halay Sidikaya mogot yóm benwu Juda, wen udél Dwata ebè Jirimaya. Yóm kudél Dwata ni, deng sfolò wolu halay Nibukadnisar ne mogot yóm benwu Babilun.

² Bè yóm kdaw yó, tolo snibut yó kem sendalù Babilun yóm syudad Jirusalim. Lemwót ke Jirimaya, fen bnanggù le talak lósól gónô bong yóm tau hol geta bè Juda bè yóm gónóhen nô yóm tau gel mentey bè yó.

³ Bè ktahuhen, Sidikaya fen heblanggù du bè yó lan Jirimaya gel tmulón yóm udél Dwata yóm gel monen, “Ni se udél Dwata, monen, nim syudad ni angat blayu elem hólól yóm tau hol geta bè Babilun.

⁴ Ne yó kem sendalù Babilun angat kenfô le Sidikaya, nwit le ebè yóm tau hol geta bélê le anì nan e knukum bè yóm ktafaken du.

⁵ Nwitu Sidikaya ebè Babilun ne bè yó gónóhu tmafak du. Ke mit ye sgida bè yó kem tau Babilun là kô ye na a gemmò. Dwata se nim mudél ni.”

⁶ Sotu kdaw bè yó, bud wen udél Dwata ebè Jirimaya, monen,

⁷ “Angat mógów ebéléem Hanamél yóm sotu ngà logi mà diem Syalum, tô hbaluen béléem yóm tonoken bè Anatot. Bè kuy hlau, wen kwalisem bemli du yóm tonoken yó senta kem dumu tau. Tódô benlihem ne.”

⁸ Tahu se, hol lómón yóm deng mon Dwata mò dou, mógów ebéléu Hanamél bè yóm knóu lem blanggù, monen mò dou, “Yake benlihem yóm tonoku bè Anatot glem lem tonok Bindyamin. Bè kut hlau wen kwalisem bemli du se kóm senta yó kem dumu tau. Yó gónóm mon, benlihem mò hlós kóm.” Bè yóm kungolu du yóm udélen yó tódô tngónu lemwót bè Dwata yóm udél lomi gungolu yó.

⁹ Tahu se, benlihu yóm tonok Hanamél bè Anatot. Yó blihu du béléen sfolò hitu botù blówón bukay.

¹⁰ Bè yóm deng keblihu du femahu yóm klatas, ominen wen dketu du lem blóng yó kem gemtanud du. Tnimbangu yóm blówón bukay blihu du, ominu mayad du.

¹¹ Nwahu yóm klatas deng denketu yó koni ne yóm klatas là denketu du, yóm klatas gónóhu smulat du lemen yóm kmò keblihu yóm tonok,

¹² ominu bemlay du ke Baruk yóm ngà Niraya logi ne témê Masiya. Blayu du yóm igò Hanamél nô bè yó, yóm dumuhu setwoli ne yó kem gemtanud du, fema lem yóm klatas, ne yóm kdê logi bè Juda fen myón bè yó bè yóm kdaw yó.

¹³ Ominen yó udélu ebè Baruk bè yóm igò le hmungol yóm kdê le, monu,

¹⁴ “Yó udél yóm Dwata laen dù là gbeken du yóm Dwata yó kem tau Israél, monen, nwitem yóm lewu klatas ni yóm wen deketen ne yóm sotu laen dù deketen, henyuhem lem lebwón tonok anì là sideken balù nô kegenen.

¹⁵ Yakà yó udél yóm Dwata laen dù là gbeken du yóm Dwata yó kem tau Israél, monen, elem hulin kdaw bè nim benwu ni, angat wen sebli gónô ne sebli gónó mulu grép ne sebli tonok.”

Kni Jirimaya bè Dwata

¹⁶ Tikóng deng oguhu ke Baruk yóm klatas tonok yó koni ominu mni bè Dwata, monu,

¹⁷ “Ó Dwata yóm hol dandónen geta, mlan bè yóm tey kfasangem nmoem longit ne tonok. Laen kô dù là gbekem du.

¹⁸ Tey bong nawahem tau ne tey hyu kmoem ebélê le yó kem hilu libuhen kwen le, okóm gel tnafakem yó kem ngà le lemwót bè salà yó kem tuha le. Uu se yóm Dwata hol geta alì mfasang, yóm Dwata laen dù là gbeken du.

¹⁹ Teyi hulung hedem ne tey hentaw ton yóm gel nmoem. Gotu tngónem yóm kul gel nmò yóm kdéen tau ne blayem kul yóm ofol bang balà yóm kul gel nmò.

²⁰ Bè yóm gnan kdaw, tey wen yó kem hentaw ton tehe nmoem bè yó bè Idyip. Ne efet yóm kmoen ni tendo wen gel nmoem bè ni bè benwu Israél dalang se bè yóm kdê dumu benwu bè klamangen. Yó gónóm mon, tey tótól yóm kóm boluy efet yóm kmoen ni.

²¹ Lemwót bè yó kem tey dê hentaw ton tehe nmoem, yó gónón sidek klikò le yó kem hohon me. Tódô mlan bè yóm tey kegbekem ne yóm tey kfasangem gónóm tehe mit kul hewà gu bè Idyip yó kem tauhem Israél.

²² Deng blayem yó kem tau Israél yóm tonok tehe fasadem yó kem tehe fù le, yóm tonok tilob ne tonok tembas.

²³ Okóm bè yóm kkól yó kem tehe fù me na le e kwa yóm tonok ni là kô bud nimón le kóm, deng mom kenbê le yóm kóm hlau. Là kô nmò le du yó kem hloloem kul. Yó se gónóm heglumfak du kul nim tey hlayam le ni.

²⁴ Hnénégem dé yóm deng nmò yó kem hohon me tódô genbà le yóm beng lemibut yóm syudad ni anì gusek le elemen. Angat btang elem hólól yóm tau hol geta mogot yóm benwu Babilun nim syudad ni mlan bè gida ne bè bitil ne bè des. Kdê yó kem deng tehe monem, deng gotu dohò ne.

²⁵ Lelen yó he Dwata yóm hol dandónen geta, balù yóm deng móyón kebtangen elem hólól yó kem sendalù Babilun nim syudad ni, mom bud heblihem ou tonok lem blóng yó kem gemtanud du ni.”

Eles ktulón Dwata yóm kegbà Jirusalim

²⁶ Ominen yó udél Dwata ebè Jirimaya, monen,

²⁷ “Ou se yóm sana Dwata hol gónó mogot, yóm Dwata yóm kdéen tau bè klamangen benwu. Laen kô dù là gbeku du.

²⁸ Yóm syudad ni blayu elem hólól yó kem sendalù Babilun, elem hólól Nibukadnisar yóm tau hol geta bè Babilun ne nleden.

²⁹ Yó kem sendalù Babilun kmamfù tekwang yóm beng hmilol Jirusalim, angat le tódô gotu husek na le e ntem yóm syudad. Gotu ntem le se yóm kdéen gónô, gónó le gel mtem insinsu ta ketef le ebè yóm dwata kéng boluyen Baal ne gel ketwél le yóm tifas grép gel ninum le ebè yó kem dwata kéng. Duhen yó se yóm alì lenbutu.

³⁰ Yó kem tau bè Israél ne tau bè Juda tódô lemwót bè kbuten laen kô dù dumu nmò le són sidek. Deng hebut le ou bè yó kem sidek gel nmò le,” mon Dwata.

³¹ “Tódô lemwót bè kbut kehdà le nim syudad ni, laen kô dù dumu nmò le ke là lembute du. Ni se gónóhu gembà du.

³² Yó alì hebut dou yó kem salà yó kem tau bè Juda ne bè Israél dalang se yó kem tau bè Jirusalim, salà yó kem tau hol geta bélê le ne yó kem genlal le ne yó kem tau gel blóng ebéléu ne yó kem tugodu.

³³ Deng knogol le ou yóm kdê le là bud le móyô semfulék. Tódô senflósu tmolok kul yóm hyu, tnódónem là kô le móyô hmungol, là kô le móyô mimón.

³⁴ Deng mom hdà le lem yóm dou Gónô yó kem dwata lennged alì sidek yó. Là buden mólós ne yóm dou Gónô.

³⁵ Deng le mom hemdà yó kem gónó le demsù ebè Baal ditu bè Sbong Ben Hinom ne bè yó gónó le hkekeb yó kem ngà udì le logi duhen ke libun, mò dsù le ebè yóm dwata kéng boluyen Molék. Nim nmò alì sidek ni, là kô naw e hmò du kul. Là kô hendemu du ke yó hmou kul yóm tey sidek yó. Bè yóm nmò yó, alì sidek kegsalà le du yó kem tau bè Juda.”

Yóm fasad Dwata kul anì wen bud nefet nawa le

³⁶ Yó bud udél Dwata ebè Jirimaya yóm Dwata yó kem tau Israél, monen, “Yó gel mon yó kem tau, angat btang elem hólól yóm tau hol geta bè Babilun nim syudad ni mlan bè gida ne bè bitil ne bè des. Okóm ni se udél yóm sana Dwata hol gónó mogot yóm Dwata yó kem tau Israél, monu,

³⁷ Angat bud nwitu lu semfulék yó kem dou tau gu bè yó kem benwu deng gónóhu e semkla kul lemwót bè yóm tey kebutu. Hol ebè nim syudad ni se gónóhu bud e mit kul. Tódô menek ne kbenwu le ne laen kô dù hemen le.

³⁸ Lu se mò dou tau ne ou se mò kul Dwata.

³⁹ Ne laen kô dù tul sónen yóm keblayu kul yóm kessotu nawa le anì sónmoen wen klikò le dou mò kul kehyu dalang se yó kem angat lugod le.

⁴⁰ Angat wen senfasad me yóm fasad laen dù tul sónen. Fasadu kul yóm tendo keblayu kul yóm hyu. Suu bè nawa le yóm tendo klikò le dou ne là kô bud tebel le do.

⁴¹ Angat tey kligalu mò du bélê le yóm hyu ne hol lemwót lem but blututu yóm bud khuluhu kul ta nim tonok ni.

⁴² Yóm kdohò yóm deng kehwitu ebélê le hlayam yóm kmoen ni, lómón yó se kdohoen yóm bud keblayu kul yóm kdê hyu deng fasadu kul. Ou se Dwata nim mudél ni.”

⁴³ “Angat wen bud sebli tonok bè nim benwu ni yóm benwu tô mon ye, ‘Deng gotu hensidek tau bè Babilun nim tonok ni. Laen kô dù bud tau tonem kkólen bè yó kem ógóf, deng le gotu lana.’

⁴⁴ Okóm bè yóm hulin kdaw, bè tonok Bindyamin ne bè ni bè Jirusalim ne bè yó kem benwu bè Juda ne bè yó kem benwu lemnek lem bulul ne bè yó kem but bulul bè Juda ne bè Négéb snéen, angat wen bud sebli tonok du nmò le gónó fema ne denket le ne wen kem gemtanud du. Yakà wen he kdawen bud kehguléku klowil yó kem dou tau. Ou se Dwata nim mudél ni.”