Jirimaya 31 - Udél Dwata: Gna Kesfasad ne Lomi Kesfasad

Yóm angat kesfulék le ebè benwu le yó kem tau Israél

¹ Yó udél Dwata, monen, “Angat kól yóm kdawen bud ou se Dwata nulék yóm kdéen sfu Israél ne lu se yó kem dou tau.

² Tehe yu ekni bè yóm benwu laen hol wen tauhen, tey kkoduhu kul yó kem dù tau mowil. Bè yóm kdaw alì sidek kliteg yó kem tau Israél, hegfane lem blóng le lemwót gu bè yóm tey mayuk gónóhu nô.

³ Ó kem dou tau, laen kô dù sónen yóm kbong nawahu kuy. Yó gónóm mon, tódô senflósu hegfan du bélê ye yóm là konol yóm kbong nawaw kuy.

⁴ Angat bud hdau yu kem tau Israél. Lómó ktonu kuy hol lómón ke tolo ye sawang libun béléu. Angat bud nogot ye yó kem tamburin gel nuni ye anì bud ye hligal madal.

⁵ Angat ye bud mulu grép bè yó kem bulul bè Samarya ne yó kem tau mulu du, bud gken le he yóm bunguhen.

⁶ Angat bud kól yóm kdawen angat bud tmaba yó kem tau mentey gu ta yó kem bulul lemnek bè Ifraim. Yó taba le, mon le, ‘Géhél ye ne mneged tekuy ebè Jirusalim, tmaba tekuy ebè yóm sana kut Dwata hol gónó mogot.’ ”

⁷ Ni bud udél Dwata, monen, “Hligal ye semngal gbak bè yó kem tau Israél. Mensag ye dé bè yóm kdóyón ye kul yó kem tau alì tnóbóng Dwata bè kdéen tau talak tonok. Hgel ye udél ye dmóyón kul, mon ye, ‘Ó Dwata, hol hewaem yó kem tauhem. Hol hewaem yó kem dù tebel bè yó kem tau Israél.’

⁸ Tahu se,” mon Dwata, “angat bud nwitu lu semfulék lemwót gu tebwak ne bud sentifunu lu lemwót ditu bè són tonok. Angat le bud mung se kul yó kem tau butô ne yó kem tau tugô. Dalang se yó kem libun tolo mlutut ne yó kem libun móyón kmuleng blutut le. Angat tey kwen le bè yóm bud kesfulék le.

⁹ Botong le gotu mkik lemwót bè kligal le. Ne tey tilob kesgifau kul bè yóm bud kwitu kul semfulék. Nalaku lu hilol yóm él mlel bè yóm lan hyu gónó le là tlokob. Yakà ou du se mà yó kem tau Israél ne Ifraim se yóm hol ngau twogu.

¹⁰ Ó kem kdéen tau bè klamangen benwu, hol hnungol ye yóm udél yóm sana Dwata hol gónó mogot. Hol heglalag ye etu bè kem benwu mayuk kilil mohin. Yó udél Dwata, monen, Deng tehe senklahu lu yó kem tauhu, okóm angat bud sentifunu lu, sen-gyoku lu lómón yóm tau gel sen-gyok yó kem ubihahen.

¹¹ Yakà deng nsoku yó kem tau Israél, nsoku lu lem tdok yó kem tau alì kemgis senta le.

¹² Angat le semfulék ebè benwu le ne tey kehligal le semngal ta yóm bulul bè Jirusalim gónó le tmaba ebéléu. Tey kehligal le lemwót bè yó kem deng basahu kul. Wen halay ne tifas grép le ne hnolo ulib ne wen tey ngà ubiha le ne kem ngà safì le. Yóm kmò klowil le hol mkél bè yóm tonok tendo wen élen. Laen kô dù bud gónó le élél. Ne laen dù bud knangag le.

¹³ Omin le yó gotu madal yó kem sawang libun, tey kligal le. Dalang se yó kem logi, kem ngà logi kólen bè kem tuha gotu le hligal se kul. Wen kligal blayu kul mò tles yóm klangag le ne wen klaan nawa blayu kul mò tles yóm keblat nawa le.

¹⁴ Tendo wen tey ken hyu blayu ebè yó kem tau blóng ebéléu ne hegsengelu nawa yó kem tauhu lemwót bè yóm tey hyu blayu kul. Ou se Dwata nim mudél ni.”

Yóm kligal blay Dwata ke Rakél mò tles yóm klangagen

¹⁵ Yó bud udél Dwata, monen, “Wen tey dmumu mkik bè yóm benwu boluyen Rama anì monem, dnumu nkik Rakél yó kem ngaen ne là kô wen gembek mifa du, abay se là kô bud tonen kul ne.”

¹⁶ Okóm ni, bud wen udél Dwata, monen, “Bê ye abay bud mkik, yakà wen yóm ofol blayu kuy. Angat le bud semfulék ebélê ye yó kem ngà ye lemwót le gu bè yóm tey benwu mayuk yó kem hohon ye.

¹⁷ Ni wen bud nefet nawa ye, abay se angat le bud semfulék ebè yóm hol kul benwu yó kem ngà ye.

¹⁸ Deng gungolu yóm udél le hegsel yó kem tau Israél yóm kmon le du, ‘Ó Dwata, ke hningón me yóm kmoem kum, hol me mkél bè yóm safì là deng wen tmolok du dmadu. Okóm ni deng tolokem mi mimón. Hol bud hnomihem mi ne nwitem mi semfulék, yakà tek són du uu yóm sana kum Dwata hol gónó mogot.

¹⁹ Deng tódô knogol me uu, okóm ni móyô me bud semfulék ebéléem. Kogol yóm ktafakem kum, tey sidek kegnóm me du. Tey sidek kyak me, abay se gotu me gemsalà lemwót bè yóm hanà kngà me.’ ”

²⁰ Yó bud udél Dwata, monen, “Ó Israél, uu se yóm ngà kenbong nawahu yóm hol gónón nô nawahu. Là gbeku du ke là tehe tnafaku kóm, okóm là kô kó nawahu kóm. Són uu yóm tendo nô bè nawahu ne tey kkoduhu kóm.

²¹ Bè yóm kewót ye ebè Babilun, mò ye ilô bè yóm lan lolò ye anì là tlas ye bè yóm bud kesfulék ye. Ó kem tau Israél angat ye bud semfulék ebè yó kem benwu gónó ye gu lemwót.

²² Kegenen de yóm ktabag ye kem ngau là mimón? Okóm wen yóm lomi angat nmou bélê ye kem tau Israél. Yó nmou, henbalingu yu yó kem tau wen óyô le bud mulék ebè yóm kul Dwata.”

Angat kgulék klowil yó kem tau Israél

²³ Yó udél yóm Dwata laen dù là gbeken du yóm Dwata yó kem tau Israél, monen, “Bè yóm bud kwitu kul semfulék yó kem tauhu, yó bud mon yó kem tau bè Juda ne bè yó kem syudaden, ‘Dwata he hol muyag du yóm kun bulul bè Jirusalim yóm hol kun gónó nô.’

²⁴ Gotu le bud hligal nô bè Juda yó kem tauhen, yó kem tau mò hulu ne yó kem tau semgyok ógóf ne yó kem tau nô bè syudaden.

²⁵ Yakà angat kóhu du bè yó kem tau yóm alì kliteg le ne benlayu kligal yó kem langag.”

²⁶ Ominu yó btik ne temngele gu hmilol. Deng tey tilob yóm ktungóu.

²⁷ Yó bud udél Dwata, monen, “Angat kól yóm kdawen bè ni bè Israél ne bè Juda bud hbólu yó kem dou tau dalang se yó kem ógóf le.

²⁸ Bè yóm gnan kdaw, lómón ke kendutu lu ne lómón ke hebtangu yóm benwu le. Ne gotu genlau lu ne wen tey heglumfaku kul. Okóm bè hulin kdaw, bud huluhu lu ne bud hdau yóm kul benwu,” mon Dwata.

²⁹ “Bè yóm kdaw yó, là bud gel mon kem tau du ne nim udél hlalak ni, ‘Kem tuha le mken du yóm grép alì msom, bede fen kem ngà le ngilów du.’

³⁰ Okóm là ne ni. Yóm tuha mken du yóm grép alì msom bud du se ngilów du. Yó gónóm mon, tódô ket tau matay bè yóm salà kun nmò.”

Yóm angat lomi senfasad le Dwata yó kem tauhen

³¹ Yó bud udél Dwata, monen, “Angat kól yóm kdawen bud wen lomi senfasad me yó kem tau bè Israél ne bè Juda.

³² Yóm senfasad me ni, là mkélen bè yóm tehe kesfasad me yó kem tehe fù le bè yóm tehe kalaku kul hewà gu bè Idyip. Yóm tey kbong nawahu kul bè yóm kdaw yó hol lómón yóm tau syehen, ewenem mom nulé le yóm deng senfasad me.

³³ Okóm ke deng kól yóm kdawen, ni se yóm lomi senfasad me yó kem tau Israél. Angat suu lem nawa le yó kem hlolou kul ne snulatu lem hendem le. Angat bud ou se mò kul Dwata ne lu se mò dou tau.

³⁴ Là bud tnolok le kul ne yó kem dumu le sebét ne yó kem fes lówó le ke mon le, ‘Yake hol tngón ye Dwata.’ Abay se angat tódô kdê le temngón dou lenwóten bè leneken kkólen bè lebangen. Angat gotu hnifótu yó kem sidek deng nmò le ne là kô bud hendemu du ne.”

³⁵ Kaem Dwata se tehe mò du yóm kdaw mò mnóng ke kemdaw ne bud mò du yóm bulón ne yó kem blotik mò mnóng ke kifu. Du se alì hewók yóm mohin, yó gónón alì lemungkul. Yó boluyen, Dwata laen dù là gbeken du. Ne ni se udélen, monen,

³⁶ “Yóm igoen tolo wen benwu là kô le lana se kul yó kem tau Israél.

³⁷ Yóm là kegbek bemtes yóm longit ne là kegbek hemnagì du yóm but tud blóngón tonok, lómón yó se yóm là kegbeku hlós kembê kul yó kem tau Israél balù yóm tey kwen yó kem salà nmò le. Ou se Dwata yóm mudél ni.

³⁸ Angat wen kdawen he,” mon Dwata, “gotu bud hdà le yóm dou syudad Jirusalim lenwóten ditu bè yóm sotu gónô geta gónó le gel mentey boluyen Hananél efet kól bè yóm sotu tikeb mon le Tikeb Sokok.

³⁹ Yó kililen, lemwót bè yóm Tikeb Sokok yó knitayen yóm ngà bulul Garéb hlalak etu bè Guwa.

⁴⁰ Yó klamangen, gomong yóm gónó le gel lembeng ne gónó gel mkok fól efet kól etu bè yó kem gónó le gel mò hulu bè Datal Kidron fi dmata kdaw ne efet kól etu bè Tikeb Kudà, hono dou funen. Yóm syudad ni, laen kô dù bud mundug edu ne laen kô dù bud gembà du.”