Jirimaya 3 - Udél Dwata: Gna Kesfasad ne Lomi Kesfasad

Yóm ken-gel nawa yó kem tau Israél là mimón ke Dwata

¹¹ Ominen yó bud mudél ebéléu yóm sana Dwata hol gónó mogot, monen, “Balù yóm deng kkogol le dou yó kem tau Israél, sidek senta yó he yóm kul nmò yó kem tau Juda bè yóm là kteneb le ebéléu.

¹² Yó gónóm mon lemwóti ne, hol heglalagem bè yó kem tau Israél bè yóm kul benwu fi bwak, monem mò kul, ‘Ni se udél yóm sana kuy Dwata hol gónó mogot, Ó kem tau Israél, kem tau laen dù bud kehtahu le, bud ye semfulék ebéléu dé yakà tey kkoduhu kuy. Là bud lenbutu kuy ne.

¹³ Són olo nmò ye, hol henmóyô ye yóm deng kegsalà ye. Hen-gsel ye yóm deng kkogol ye dou, yóm sana kuy Dwata hol gónó mogot ne yóm deng kdà ye do lan ye gel tmaba ebè yó kem dwata lenbù nmò ye laan yó kem koyu lembang. Hen-gsel ye yóm là bud klolò ye do.’ Ou se yóm sana kuy Dwata hol gónó mogot nim mudél ni.”

¹⁴ “Ó kem tau là mimón, semfulék ye ebéléu ne. Ou se mfun kuy. Angat bud nwitu yu semfulék ebè yóm kuy benwu Israél lemwót gu bè yóm kdê benwu deng gónóhu e semkla kuy, sotu bélê ye angat lemwót bè yóó ne lewu se angat lemwót bè yóm benwu tuu.

¹⁵ Angat suu lem blóng ye yó kem tau temngón ne hulung hedem mò malak kuy, kem tau tendo gel mimón dou.

¹⁶ Bè yóm bud kból ye ta yóm tonok ye,” mon Dwata, “là bud gehedem ye du ne yóm kdaw gnan yóm kwen Slungan Fasad nô lem blóng ye gónóhen nô yóm deng tehe senfasad tekuy. Balù udì ke gbel bè nawa ye yóm kdaw gnan, duhen ke bud gehedem ye. Laen dù bud mu ye du ne, ne là bud ye mò gewuhen.

¹⁷ Bè yóm kdaw yó, yó angat boluy Jirusalim, Gónón Myón Kmamal Dwata. Ne angat le gotu stifun bè yó yóm kdéen but tau bè klamangen benwu mò gónó le hegfan du yóm kadat le dou. Là bud lolò le du ne yó kem sidek tehe gel nmò le lemwót bè yóm kgel kulu le.

¹⁸ Bè yóm kdaw yó, angat le slomong mulék yó kem tau tehe lemwót bè Juda ne yó kem tau tehe lemwót bè Israél, mulék le gu bè yóm benwu fi bwak tehe gónó le e megef kul. Gotu le mulék edini eta yóm tonok tehe fasadu yó kem fù le ekni mò hlós nfun le.

¹⁹ Yó tehe nô bè nawahu,” mon Dwata, “yóm kmou bélê ye, lómón ke hol ngau yu. Kóyóu ke blayu kuy yóm hol tonok hyu, tonok hol knóón nfun bè klamangen benwu. Kóyóu ke taba ye dou ‘Mà’ ne là knogol ye dou.

²⁰ Okóm kem tau Israél, deng mom tebel ye ou. Deng ye mkél bè yóm libun tebelen yehenen,” mon Dwata.

²¹ Wen tey mkik gungolu gu ta yó kem bulul geta, kik le hkodu yó kem tau Israél, abay se deng klifót le yóm sana kul Dwata hol gónó mogot ne deng le tey mayuk ne bè kun lan.

²² “Ó kem ngà là mimón,” mon Dwata, “semfulék ye ebéléu dé anì kóhu bélê ye yóm nawa là mimón nô lem but blutut ye.” Ne yó balà le ke Dwata yó kem tau, mon le, “Tahu se, mulék me ebéléem ne ni, yakà uu du yóm kum Dwata hol gónó mogot.

²³ Yóm gel ktaba me ebè yó kem dwata kéng ne yóm kessamuk me gu ta yóm kdéen bulul, hono là hyuhen. Tek són bè yóm sana kum Dwata hol gónó mogot gónó me gewà.

²⁴ Lemwót bè hanà kngà me, tendo ton me yóm klanahen bè yó kem tehe fù me yóm kdê leniteg le lan le lemolò yóm kéng. Yó kem ubiha ne safì le ne yó kem ngà le logi ne ngà le libun, gotu lana bélê le lan le lemolò yóm kéng.

²⁵ Deng tey kyak me ne ni laen dù bud madat kum, yakà deng tódô lenwóten du bè yó kem fù me ekni yóm tendo kmò me salà bè yóm sana kum Dwata hol gónó mogot. Balù udì se ke deng tô nimón me.”