Jirimaya 29 - Udél Dwata: Gna Kesfasad ne Lomi Kesfasad

Ksulat Jirimaya ebè yó kem tau Israél deng negef le ebè Babilun

¹ Bè yó bè Jirusalim wen sulat Jirimaya ebè yó kem tau Israél deng negef le ebè Babilun, sulaten ebè yó kem tuha gónó le gel galak ne ebè yó kem tau gel blóng ebè Dwata ne ebè yó kem tau tugod Dwata ne ebè kdê yó kem tau deng negef Nibukadnisar ebè Babilun.

² Yóm ksulat Jirimaya du nim sulaten ni, kogol yóm deng kegef le kul ebè Babilun le Jihuyakin lewu le yéen ne yó kem genlalen ne yó kem tmuha gónó le gel galak bè Juda ne kdê yó kem tau wen kenhulung tdok le.

³ Nim sulaten ni hwiten ke Ilasa yóm ngà Syafan logi ne ke Gimariya yóm ngà Hilkaya logi, bè yóm kógów le ebè Babilun, kem tau gel snalig Sidikaya mò gónón gel setngón ebè Nibukadnisar. Yó lem yóm sulat Jirimaya, monen,

⁴ Yóm udél ni hwit yóm Dwata laen dù là gbeken du yóm Dwata yó kem tau Israél. Hwiten ebè kdê yó kem tau lemwót bè Jirusalim deng hegefen ebè Babilun. Yó udél Dwata, monen,

⁵ “Hdà ye gónô ye ne tódô ye henek bè yó. Mò ye hulu anì wen ken ye.

⁶ Myehen ye anì hol ye mból. Hyehen ye lu yó kem ngà ye anì mból le se kul. Hol ye hból.

⁷ Bè yóm knô ye bè yó bè Babilun, nmò ye yóm gónón menek ke benwu ye ne gónón hyu klowil ye. Hol ye mni bè Dwata bè yóm syudad yó, abay se ke hyu klowil yó kem tau bè Babilun, bud hyu se yóm kuy klowil.”

⁸ Yó udél yóm Dwata laen dù là gbeken du yóm Dwata yó kem tau Israél, monen, “Bê ye abay hegsukat bè yó kem hlingón tugod dwata ne bè yó kem tau demwata nô bè yó bè Babilun. Hol bê ye abay hmungol ke wen kna tulón le.

⁹ Abay se hono kéng yóm gel tulón le hlan le bè dou boluy. Yó kem tau yó là kô naw e hógów kul,” mon Dwata.

¹⁰ “Bè ktahuhen, na ye na hitu folò halay he nô bè Babilun. Kogolen bè yó, bud nwitu yu semfulék ne nmou bélê ye yó kem hyu deng fasadu kuy.

¹¹ Yakà dengen wen kem dou atul bélê ye, hono kem atul hyu, là kô gfà du, kem atul hyu bè klowil ye elem hulin kdaw mò nefet nawa ye.

¹² Bè yó kem kdaw yó ke mni ye béléu, hnungolu yu.

¹³ Ke hnebel ye ou angat ton ye o. Ke hotu ye nawa ye mebel dou ton ye ou.

¹⁴ Tahu se, angat ton ye o,” mon Dwata. “Angat bud nwitu yu semfulék ebè yóm hol kuy benwu. Angat gotu sentifunu yu gu bè yó kem benwu deng gónów e semkla kuy, nwitu yu semfulék ebè yóm hol kuy benwu.”

¹⁵ Yó udél Jirimaya, monen, “Ofo kuy mon du ke wen kem tugod Dwata suen bélê ye bè yó bè Babilun, okóm là.

¹⁶ Okóm ni se udél Dwata gbak ebè Sidikaya yóm tau hol geta tles myón bè yóm gónón myón kmamal Dabid ne ebè kdê yó kem dù tau nô bè ni bè Jirusalim, yó kem kuy dumu là gmungen negef ebè Babilun.

¹⁷ Ni se udél yóm Dwata laen dù là gbeken du ebélê le, monen, ‘Angat wen gida hwitu elem blóng le ne hbelu yóm tey bitil bong, lelen wen tey des hgefetu bélê le. Lemwót bè yóm heglumfaku kul ni, yó gónów hkél kul bè bungu fig bolok là bud hyu mken du.

¹⁸ Tahu se, wen gida hwitu elem blóng le ne hbelu yóm tey bitil bong ne wen tey des hgefetu ebélê le ne gotu senklahu lu bè klamang benwu. Ket benwu gónów e semkla kul, gotu henmulà le lu yó kem tau fun benwu ne senkbê le lu, lel le semdekà kul.

¹⁹ Yó gónón lómón yó kmou kul, abay se là kô hnungol le dou balù yóm tendo kessulitu mudél ebélê le hlanu bè yó kem tugodu. Ne balù yu, yó kem tau negef le ebè benwu mayuk, là kô hnungol ye dou snéen,’ ” mon Dwata.

²⁰ Bud mon Jirimaya, “Yóm kdê ye deng negef ebè Babilun, hol hnungol ye yóm udélen ebélê ye Dwata.

²¹ Ni se udél yóm Dwata laen dù là gbeken du yóm Dwata yó kem tau Israél, udélen ebè le Ahab yóm ngà Kulaya logi ne ebè Sidikaya yóm ngà Maasiya logi, kem tau lembù tmugod du gel hlan le bè boluyen yóm kéng gel tulón le. Yó udél Dwata ebélê le, monen, suu lu elem hólól Nibukadnisar mò hol hmatay kul lem blóng tau.

²² Yóm katay le yó mò angat gel sentulón tau elem hulin kdaw, anì yó ke tô henmulaen kem dumun yóm sotu tau deng negef le, yó angat monen, ‘Hol angat nmò Dwata béléem he yóm tehe nmoen bè le Sidikaya ne Ahab, kem tau tehe dnutung Nibukadnisar matak.’

²³ Abay se ni kem tau ni, tey gedlug yóm salà nmò le bè yó kem tauhu. Kóem snamuk le yehen yó kem dumu le sebét ne gel le mò kéng hlan le bè boluyu. Ou se temksì du nim ni,” mon Dwata.

Yóm udél Dwata ebè Simaya

²⁴ Yó udél Dwata ebè Simaya yóm tau Nihilam nô bè Babilun, monen,

²⁵ “Ni se udélen ebéléem yóm Dwata laen dù là gbeken du, yóm Dwata yó kem tau Israél, monen, deng wen sulat lenbù hwitem ebè Sifanaya yóm tau gel blóng ebéléu ngà Maasiya logi, ne bud wen se dumu yóm sulat lenbù yó hwitem ebè yó kem dumu tau gel blóng ebéléu ne ebè yó kem dumu tau bè Jirusalim. Yó sulatem ebè Sifanaya, monem,

²⁶ ‘Deng nélék Dwata uu mò tles ke Jihuyada yóm tau gel blóng ebè Dwata, mò mogot yóm Gónô Dwata. Kóm snolu ke wen tau lembù tmugod ke Dwata ke nfétem kdina ne hensuem bala tók bè liholen.

²⁷ Moen de ke là nmoem du bè Jirimaya nim ni, yóm tau lemwót bè Anatot lembù tmugod ke Dwata?

²⁸ Deng wen sulat Jirimaya ebélê me kem tau negef bè Babilun, tulónen kum yóm na me kegen bè ni. Na me na hdà gónô bè ni kun, abay se na me legen bè ni, na me mulu yóm koyu mungu kun mò ken me hulin kdaw.’ ”

²⁹ Okóm bè yóm kgefeten bè Sifanaya yóm tau blóng ebè Dwata bè Jirusalim, yóm sulat Simaya ebéléen yó, ominen mit du ebè Jirimaya ne senfalahen béléen.

³⁰ Omin Dwata bud mudél ebè Jirimaya, monen,

³¹ “Hemwiti sulat ebè kdê tu kem tau deng negef le ebè Babilun. Tulónem kul, ‘Ni se udél Dwata gbak ebè Simaya yóm tau Nihilam. Lemwót bè yóm tódô kebuen mò tulón tibas là lemwóten béléu, lelen smukat kuy anì hentahu ye yóm kéng tulónen

³² yó kmou du, tnafaku homongu yó kem fes lówóhen. Laen dù bè yó kem sfuhen mton du yóm hyu angat nmou bè yó kem tauhu, abay se mom toloken yu là mimón dou. Ou se Dwata nim mudél ni.’ ”