Jirimaya 26 - Udél Dwata: Gna Kesfasad ne Lomi Kesfasad

Kwit le ke Jirimaya ebè mogot kukum

¹ Bè yóm hanà tolo kbut Jihuyakim mogot bè Juda yóm ngà Jusaya logi, wen udél Dwata ebè Jirimaya,

² monen, “Mdai bè lósól yóm dou Gónô ne mudéli ebè yó kem tau lemwót bè klamangen Juda, yó kem tau mógów ebè yó na a tmaba ebéléu. Hol tulónem kul yóm kdê htugodu kóm, hol béen abay wen tebelem du balù sotu.

³ Déke gungol yó kem tau ne tenflok le yó kem sidek tendo gel nmò le. Ke yó nmò le, là kô hdohou du yóm keglau kul lemwót bè yó kem sidek gel nmò le.

⁴ Hol monem mò kul, ‘Ni se udél yóm sana Dwata hol gónó mogot, monen, ke là hnungol ye dou ne ke là lolò ye du yóm hlau deng hlolou kuy

⁵ ne ke là hnungol ye yóm udél yó kem tau tóbóng lówóhu, duhen yó kem tugodu yakà deng dê duléku du hetgama du kuy, okóm là kô dog hnungol ye kul,

⁶ ke henlós ye yóm là kimón ye, angat genbau yóm Gónóu ni hol lómón yóm tehe kegbau bè Silu, yóm benwu tehe gna gónó ye tmaba ebéléu. Ke deng ton yó kem dumu tau bè klamang benwu yóm angat kegbau yóm Jirusalim ne ke wen henmulà le, angat mon le, hol mkél bè Jirusalim he yóm ktafak Dwata kóm.’ ”

⁷ Tahu se, lemwót yó kem tau gel blóng ebè Dwata ne yó kem tugod Dwata ne kdê yó kem dumu tau, gotu hnungol le yóm kdê udél Jirimaya bè lósól yóm Gónô Dwata.

⁸ Okóm tikóng deng ktulón Jirimaya du yóm kdê htugod Dwata du, lemwót yó kem tau gel blóng ebè Dwata ne yó kem tugod Dwata ne kdê yó kem dumu tau nô bè yó tódô kenfô le Jirimaya, omin le hetê, mon le, “Hnatay tekuy.

⁹ Moen de ke hlanem bè boluy Dwata yóm tulónem angat hkélen bè kegbà Silu yóm angat kegbà yóm Gónô Dwata ni? Moen de ke gel monem angat meglà yóm syudad Jirusalim ni ne balù sotu tau ke wen bud menwu du?” Omin le gotu smibut ke Jirimaya yóm kdéen tau bè yó.

¹⁰ Timbow gungol yó kem tau genlal bè Juda yóm nmò le bè Gónô Dwata yó, tódô le kendel lemwót bè yó bè gónô bong yóm tau hol geta bélê le, kendel le mógów ebè yóm Gónô Dwata ne gotu le myón bè yóm Lomi Bak Tikeb bè yó bè Gónô Dwata bè yóm gónó le gel kmukum.

¹¹ Lemwót yó kem tau gel blóng le ebè Dwata dalang se yó kem tugod Dwata, gotu tulón le bè yó kem genlal ne bè yó kem dumu tau nô bè yó yóm delem le ke Jirimaya, mon le, “Tódô hnatay kmò du nim tau ni, abay se són tulónen yóm sidek gbak bè yóm syudad tekuy. Deng gungol ye se kuy yóm monen yó.”

¹² Omin Jirimaya mudél ebè yó kem genlal ne ebè yó kem dumu tau nô bè yó, monen, “Dwata se yóm deng hógów dou mò tmulón du kuy yó kem deng gungol ye gbak bè yóm Gónóen ne bè nim syudad ni. Deng gotu htugod Dwata dou ket udél gungol ye.

¹³ Okóm ke hol kó ye yó kem sidek tendo gel nmò ye ne ke hol nimón ye yóm sana kuy Dwata hol gónó mogot, angat tenles Dwata hendemen bè yóm keglaen kuy.

¹⁴ Béléu do denge nô lem hólól ye, hol nmò ye béléu sen yóm hyu bè kuy kehedem du.

¹⁵ Okóm eles hol hendem ye ke hnatay ye ou, hnatay ye yóm tau laen dù salaen ne yu mbô du dalang se yóm kdéen tau bè nim syudad ni. Abay se bè ktahuhen, Dwata se fen hógów dou mò eles tmulón du kuy yó kem udél hetgamahen kuy.”

¹⁶ Lemwót yó kem tau genlal ne yó kem dumu tau nô bè yó, yó udél le ebè yó kem tau gel blóng le ebè Dwata ne ebè yó kem tugod Dwata, mon le, “Bê tekuy abay hnatay nim tau ni, abay se hlanen bè boluy yóm sana kut Dwata hol gónó mogot yóm tulónen.”

¹⁷ Ominen wen bè yó kem tmuha hulung hedem mdà ne mudél le ebè yó kem tau sbung, mon le,

¹⁸ “Bè yóm kdaw tehe kogot Hisikaya yóm benwu Juda, wen sotu tugod Dwata boluyen Mika lemwót bè Murisit. Wen tulónen yó kem tau bè Juda, monen, ‘Ni se udél yóm Dwata laen dù là gbeken du, monen, yóm Bulul Sayun, angat dnadu le hol lómón kdadu le yóm tonok gónó le gel mò hulu. Ne yóm syudad Jirusalim, angat gotu gbà. Yóm tfusù bulul gónón mteg yóm Gónô Dwata nim kmoen ni, angat baling dlag.’

¹⁹ Bè yóm tehe kungol Hisikaya du dalang se yó kem tau bè Juda yóm tulón Mika kul yó, hnatay le kô Mika? Là gi. Deng le mom likò ke Dwata ne gotu kó le yó kem sidek deng gel nmò le, gotu le bud tmaba ebè Dwata ne hkodu le béléen yóm kdê le. Ne yó gónó Dwata là dmohò du yóm tô keglaen kul. Ne ni, ke hnatay tekuy Jirimaya ten-geed tekuy mit keglà bè kut knô.”

²⁰ (Bè yóm kdaw yó, wen sotu tau tmugod ke Dwata boluyen Uriya ngà Simaya, lemwót bè benwu Kiriyat-dyirim. Bud tulónen se kun yóm htugod Dwata du. Yó tulónen, bud senged bè yóm deng kun tulón Jirimaya gbak bè yóm angat kegbà Dwata yóm syudad le ne yóm benwu le.

²¹ Timbow gungol Jihuyakim ne yó kem sendaluen ne yó kem genlal yóm tulón Uriya yó, yó gónón hógów tau mò na a hmatay ke Uriya. Okóm gungol Uriya yóm atulen yó, yó gónón mlóy etu bè Idyip lemwót bè yóm tey sidek klikoen.

²² Omin Jihuyakim hektes du ke Élnatan yóm ngà Akbur logi, etu bè Idyip ne wen kem dumu tau mung du mò kemfô ke Uriya.

²³ Tahu se, kenfô le ne nwit le mulék ebè Jihuyakim. Omin Jihuyakim hfatay du mlan bè sudeng ne hboten lówóhen bè yóm gónó le gel lembeng yó kem tau laen dù kwa le.)

²⁴ Bè yóm kekfô le ke Jirimaya yó, wen sotu tau boluyen Ahikam ngà Syapan logi nô bè yó ne tey kfihen ke Jirimaya ne yó gónó le là hfatay ke Jirimaya yó kem mogot kukum. Là gomongen bè nili yóm tsaptér 27. Yó tulónen bè ni yóm udél Dwata ebè Sidikaya. Là olon du bè Sidikaya gónó Dwata e mudél, okóm gomong yóm limu kem benwu hmilol bè Juda. Wen yok hmò Dwata ke Jirimaya mò suen bè liholen, hningónen hyu ke gotu le heglaan bè Nibukadnisar anì angat le mowil. Hyu ke tódô henlós le mung bè Nibukadnisar efet kól bè yóm bud kun kogot yóm ngaen ne bud kun kogot yóm téméen. Okóm ke là heglaan le bè Nibukadnisar, angat le gotu matay. Matay le bè gida ne matay le lemnus ne matay le bè des. Eles hetgama Jirimaya kul hol bê le abay hmungol bè yó kem dumu tugod Dwata ne bè yó kem tau demwata yóm gel mon du mò kul hol bê le abay heglaan. Yóm tulón le yó mon Jirimaya, là kô htugod Dwata du kul. Là gomongen bè nili yóm tsaptér 28. Yó tulónen yóm kun tulón yóm tugod dwata kéng boluyen Hananiya. Monen, tek lewu halay duen angat kmò Dwata sónen yóm kfasang Nibukadnisar. Bè yóm kdaw yó kun, bud semfulék ebè Juda Jihuyakin yóm tehe negef le, mung du yóm kdéen tau deng tehe negef le ebè Babilun. Ne bè yóm bud kulék le yó kun, gotu bud nwit le snéen yóm kdéen kimu mebtes deng nwa yó kem sendalù Babilun lem yóm Gónô Dwata. Bè yóm igoen mudél Hananiya, tódô tenfoken yóm yok nô bè lihol Jirimaya hningónen yóm kegesón kogot Nibukadnisar yóm benwu Babilun. Okóm sotu kdaw stulón ke Hananiya Jirimaya. Tulón Jirimaya du yóm là kewóten bè Dwata yóm tulónen, ne yóm katay Hananiya lemwót bè yóm ktulónen kéng yó.