Jirimaya 25 - Udél Dwata: Gna Kesfasad ne Lomi Kesfasad

Yóm hitu folò halay kegen le nô bè Babilun yó kem tau Israél

¹ Bè yóm gfaten halay kegen Jihuyakim yóm ngà tehe Jusaya mogot yóm benwu Juda, wen udél Dwata ebè Jirimaya gbak bè yóm kdéen tau bè Juda. Ni se yóm halay hol kbut Nibukadnisar mogot yóm benwu Babilun.

² Yó udél Jirimaya yóm tau tugod Dwata ebè yó kem tau bè Juda ne bè Jirusalim, monen,

³ “Deng lewu folò tlu halayen ne efet nim kmoen ni yóm tendo ktulónu du kuy yóm udél Dwata ebélê ye. Tódô nbuten bè yóm gesfoloen tlu halay kogot Jusaya yóm benwu Juda yóm ngà Amun logi, yóm tendo ktulónu du kuy yóm udél Dwata efet nim kmoen ni, okóm là kô hnungol ye du.

⁴ Tendo wen kem dumu tugod Dwata hógówen elem blóng ye snéen, yó kem tau tóbóng lówóhen, okóm là kô hnungol ye kul ne là se kenmón ye kul.

⁵ Yó tendo mon Dwata mò kuy, ‘Knogol ye ne yóm sidek gel lolò ye ne yóm sidek gel nmò ye, anì yó gnô ye ta yóm tonok deng blayu kuy dalang se ebè yó kem tehe fù ye mò hlós nfun ye efet kól bè sónen.

⁶ Bê ye abay hebut ou ke mlan bè ktaba ye ebè yó kem dwata kéng ye anì là tnafaku kuy.’

⁷ Okóm là kô dog hnungol ye dou,” mon Dwata. “Mom hebut ye o bè yóm gel ktaba ye ebè yó kem dwata kéng. Yu se mit du bè kuy knô yóm kdê hlayam glumfak ye nim kmoen ni.

⁸ Lemwót bè yóm là khungol ye do yóm Dwata laen dù là gbeken du,

⁹ gotu sentifunu lu yóm kdéen sendalù lemwót bè yóm benwu fi bwak nogot Nibukadnisar bè Babilun, yóm deng néléku mò tóbóng lówóhu. Nwitu lu edini mò gmida bè ni bè Juda ne bè yó kem tauhen dalang se bè yó kem dumu benwu hmilol du. Gotu genlau yu gomong yó kem benwu hmilol kuy. Yó kem benwu yó, baling benwu knikò ne laen kô tul sónen yóm kegbaen.

¹⁰ Laen kô dù bud kligal le semngal ne là se bud le kmuli. Là bud gungolem du ne yóm gel kehligal le bè gónó mulu. Yó kem udél swa le laen duen ne. Yó kem gónô le laen dù tauhen lelen kmifu lemen.

¹¹ Yóm klamang yóm benwu yó gotu msulék gebà, laen dù bud menwu du. Yó kem tau Israél ne yó kem tau menwu hmilol kul, botong hitu folò halay le kegen le nô lem hólól yóm tau hol geta bè Babilun.

¹² Kogol yóm hitu folò halay yó, angat tnafaku yóm tau hol geta bè Babilun kkólen bè yó kem tauhen lan le tendo mò sidek,” mon Dwata. “Yóm benwu Babilun, nmou benwu là hyu menwu du efet laen dù tul sónen.

¹³ Gotu heglumfaku yó kem tauhen yó kem tafak deng htugodu ke Jirimaya lem nim bok ni.

¹⁴ Angat tey dê benwu ne angat tey dê kem tau hol geta angat bud hmesek kul yó kem tau Babilun, bud huléku eta le yóm khesek le yó kem dou tau. Tafaku kul yóm bang tafak yóm sidek deng nmò le bè yó kem dou tau.” Là gomongen bè nili yóm bérs 15 kól bè bérs 38. Yó tulónen bè ni kem bérs ni yóm angat kwen kdaw Dwata tmafak yóm kdéen tau là mimón du bè klamangen benwu, balù kihu benwu gónó le nô. Yó kmoen du, angat wen gida bong hwiten ebélê le. Laen dù benwu talak tonok ke là gnómen du yóm alì ktafak Dwata yóm là kimón. Yó monen bè bérs 33 “Bè yóm kdaw yó, yóm lówó yó kem tau deng hnatay Dwata tódô hegasà bè klamangen benwu le. Laen dù tau tebel mò lemangag kul ne laen se dù lembeng kul. Tódô bélét te tonok yó kem lówó le lómón ke kê ógóf.”