Jirimaya 23 - Udél Dwata: Gna Kesfasad ne Lomi Kesfasad

Yóm tau hol geta tnaba le Hanga Tedeng

¹ Yó udél Dwata, monen, “Ya tey sidek angat ktafaku kul yó kem tau gónó le gel galak yó kem dou tau, abay se deng gotu hensidek le yó kem tau hesegyoku kul ne deng gotu senkla le lu.”

² Ni se bud udél Dwata yóm Dwata yó kem tau Israél, ebè yó kem tau tô halaken yó kem kun tau, monen, “Lemwót bè yóm deng kesekla ye kul yó kem dou tau deng mom lo ye lu, là kô dog sen-gyok ye kul, yó gónów tmafak kuy bè yóm sidek deng nmò ye bélê le.

³ Okóm yó angat nmou bè yó kem dou tau, gotu bud sentifunu lu yó kem dù tebel bè yó kem benwu deng tehe gónóhu e semkla kul. Gotu bud nwitu lu semfulék ebè yóm tehe kul benwu ne angat tey bud kból le bè yó.

⁴ Angat wen kem tau snaligu mò malak kul. Laen kô dù bud knikò le ne yó kem dou tau ne laen se dù lana bélê le balù sotu,” mon Dwata.

⁵ Yó bud udél Dwata, monen, “Angat kól yóm kdawen wen tau hol geta néléku lemwót bè ból Dabid, tey tau tedeng kmoen. Yó angat taba le du, Hanga Tedeng. Yóm tau hol geta angat néléku yó, tey hulung bè yóm kogoten tau ne hono tedeng yóm gel nmoen bè klamang yóm benwu knamalen.

⁶ Bè yóm angat kogoten benwu, angat le gotu gewà yó kem tau bè Juda ne laen kô dù hemen le yó kem tau Israél. Yó angat taba le du, ‘Yóm Dwata mit kut tedeng.’

⁷ Angat kól yóm kdawen,” mon Dwata, “ke smafà yó kem tau Israél là kô mon le du, ‘Smafae bè yóm Dwata laen dù tul katayen, yóm deng hewà yó kem tau Israél gu bè Idyip.’

⁸ Mom yó angat mon le, ‘Smafà me ebè yóm Dwata laen dù tul katayen, yóm deng mit kul semfulék yó kem tau Israél ebè yóm kul benwu, gu le bè yóm benwu fi bwak ne gu bè yóm kdê dumu benwu deng tehe gónón e hegef kul.’ Omin le yó he henek bè yóm hol kul benwu.”

Yóm gbak ebè yó kem tau tugod dwata kéng

⁹ Yó udél Jirimaya, monen, “Lemwót bè yóm udél Dwata eta yó kem tau tugod dwata kéng yó, yóm udél Dwata laen kô dù belenen, lómó kegnómu du lómón ke deng gbà lem kfuhu ne tey sidek kesetbol kkelu. Lómó kegnómu du lómón ke lengele, lómón ke ou yóm tau alì gedlug kinumen yóm tifas grép.

¹⁰ Abay se yóm benwu yó hono tau smamuk. Yó se gónó Dwata tmafak du yóm tonoken. Deng tódô mékéng yóm gónó le gel hótób ógóf hol lómón ke langag se kun yóm tonok. Abay se yó kem tau tugod Dwata, hono sidek yóm nmò le ne sidek kwit le du yóm kfasang le.”

¹¹ Yó bud udél Dwata, monen, “Yó kem tau tmugod dou ne yó kem tau gel blóng ebéléu, bà udì ke knikò le yóm là kimón le do. Deng tonu yó kem sidek alì gel nmò le lem yóm dou Gónô.

¹² Yó gónóm mon, tey medel yóm lan lolò le ne tey sidek kkifuhen. Hetlokobu lu ne hebtangu lu. Wen heglumfaku kul ke deng bangu tmafak kul. Ou se Dwata nim mudél ni.

¹³ Yó kem tehe tugodu ebè Samarya, deng tonu yóm tey kmò le sidek. Deng mom tnugod le yóm kun boluy Baal ne deng mom nit le lu tlas yó kem dou tau Israél.

¹⁴ Okóm nim kmoen ni, milud he ksideken yóm kul gel nmò yó kem tugodu bè Jirusalim. Ndà le yehen le ne deng knalam le yóm kmò le kéng. Deng mom genduf le yó kem tau gel mò sidek anì là tenflok le du yóm kmò le sidek. Yóm ksidek nmò le yó mkél bè yóm tehe kul ksidek nmò yó kem tau bè Sodom ne Gmura.”

¹⁵ Yó gónóm mon, ni se udél yóm Dwata laen dù là gbeken du gbak ebè yó kem tugoden bè Jirusalim, monen, “Wen hulu héét hkenu kul ne wen gónó milu hinumu kul, abay se lemwót bè yó kem tugodu bè Jirusalim gónón hono sidek nmò yó kem tau bè klamangen nim benwu ni.”

¹⁶ Yó udél yóm Dwata laen dù là gbeken du ebè yó kem tauhen bè Jirusalim, monen, “Wen eles hetgamahu yó kem dou tau. Hol bê ye abay hnungol yóm kul tulón yó kem tau tmugod yó, abay se yóm tulón le kuy yó laen kô dù nefet nawa ye du, tulón là tahuhen. Tulón le kuy yóm nô lem hendem le, là kóen lemwót béléu.

¹⁷ Yó gel tulón le bè yó kem tau gel kembê du yóm dou tulón, mon le, ‘Hono hyu yóm angat sut bè klowil ye.’ Ne wen bud tulón le bè yó kem tau senflós le mò sidek lemwót bè yóm kgel kulu le gel mon le mò kul, ‘Angat laen kô dù bang hemen ye se kuy.’

¹⁸ Okóm bè yó kem tmugod yó, laen kô dù bélê le ke deng temngón du yóm nô lem hendem Dwata. Laen kô dù bélê le hmungol du duhen ke deng temnef du yóm kun udél Dwata. Laen dù bélê le hemklingu du duhen ke kemmón du yóm gel monen.

¹⁹ Ngem yóm kebut Dwata kul, hol lómón ke mbel yóm hol yéen lenos bong gotu tnódóen yó kem tau gel mò sidek.

²⁰ Ne là kóen na a hotok yóm kebut Dwata yó efet gotu dengen yóm atulen eta yó kem tau mò sidek. Angat getnef ye he nim ni elem hulin kdaw.”

²¹ Yó bud udél Dwata, monen, “Yó kem tmugod yó là kô naw e hógów kul dou, kaem tódô lenbù le mógów. Laen kô dù htugodu kul, kaem tódô lenbù le tmugod hlan le bè dou boluy.

²² Ke yó dum hnungol le ou, deng tulón le ne yóm dou udél bè yó kem dou tau ne heteflok le kul yóm alì kmò le sidek.

²³ Ou se yóm Dwata nô bè klamangen, là tek sotu benwu du yóm gónóhu nô.

²⁴ Laen kô dù tau gbek hembnos dou,” mon Dwata. “Tódô tfengu longit gónóhu nô ne tódô tfengu tonok.

²⁵ Deng gungolu yóm gel tulón yó kem tau tmugod kéng yó yóm gel mon le, ‘Deng wen hekna Dwata dou ebuteng.’

²⁶ Kilón de khotoken yóm kwit le kul tlas yó kem tauhu mlan bè yóm kéng lenbù nmò le?

²⁷ Yó atul le, lemwót bè yóm kna là tahuhen gel sentulón le yó, hendem le bè yó gónó le kmifót dou yó kem dou tau, lómón yóm tehe keklifót le dou yó kem tehe fù le bè yóm tehe ktaba le ebè Baal.

²⁸ Bayaem ne yóm gel tulón yó kem tugod gel kemna yó. Okóm yó kem tau htugodu yóm dou udél, hol le tódô hteneb tmulón du sen yóm udélu. Tey wen gónón stólóng yóm lami halay bè yóm bunguhen.

²⁹ Yóm dou udél,” mon Dwata, “hol lómón ke ofi gotu kenen kdéen. Ne sotuhen, hol lómón ke bakbak gbeken bemtù botu.

³⁰ Yó gónóm mon,” mon Dwata, “tey kekbéu kul yó kem tmugod tendo gel tulón le yóm gel gungol le lemwót bè yó kem dumu le.

³¹ Kenbéu snéen yóm kehfun le dou yóm kul tulón lenbù.

³² Hol hnungol ye yóm dou udél ebélê ye. Tey kekbéu kul yó kem tmugod gel tmulón kna kéng. Nwit le lu tlas yó kem dou tau mlan bè yóm kna kéng gel tulón le. Là kô naw e hógów kul dou yó kem tmugod yó, là kô naw e nélék kul. Laen kô dù gónó le gemtóbóng yó kem tau.” Là gomongen bè nili yóm bérs 33 kól bè bérs 40. Yó tulónen bè ni kem bérs ni yóm gel tulón yó kem tau lembù tmugod ke Dwata, yó gel mon le, “Udél lemwót bè Dwata nim udélu ni.” Anì monem là. Lemwót bè yóm tey keblat nawa Dwata bè nim nmò le ni, yó gónóhen homong kul bè yó kem dumu tau negef le ebè tólóng benwu. Tey kehyaken kul, yóm yak là mkóhen ta le efet kól bè sónen.