Jirimaya 22 - Udél Dwata: Gna Kesfasad ne Lomi Kesfasad

Yóm gbak ebè yó kem tau hol geta deng mogot yóm benwu Juda

¹ Yó udél Dwata ebè Jirimaya monen, “Lemwóti ne nam e mudél ebè tum tau hol geta mogot yóm benwu Juda, monem mò du,

² ‘Uu se yóm tau hol geta mogot yóm benwu Juda yóm sfu tehe Dabid, hol hnungolem nim udél Dwata ebéléem. Ne hol hfungolem kul ne yó kem genlalem dalang se yó kem dumu tau bè Jirusalim.

³ Ni se udél Dwata ebélê ye, monen, hol bê ye abay kmihu, nmò ye yóm tedeng. Tnóbóng ye yó kem tau deng wen hennagaw le bélê le. Lenwà ye yó kem tau hen-gnok lem hólól yó kem tau hemgnok kul. Tenflok ye ne yóm kmò ye sidek. Bê ye abay hensidek yó kem tólóng tau nô lem blóng ye kkólen bè yó kem ngà hikit ne yó kem libun bolu. Bê ye abay hnatay yó kem tau laen dù salà le.

⁴ Ke lolò ye yóm hlolou kuy ni, tendo wen bélê ye semfu gu bè yóm tehe Dabid kmamal bè ni bè Jirusalim. Smakay kudà ne klitun tók yóm tau hol geta yó, mung du yó kem genlalen ne yó kem tau nogoten, mlan le bè bak tikeb nim gónô bong ni.

⁵ Okóm ke là lolò ye du nim eles hetgamahu kuy ni, safau bélê ye angat gotu lemusok nim gónô bong ni.’ ”

Yóm gbak ebè yóm gónô bong yóm tau hol geta bè Juda

⁶ Yó udél Dwata gbak ebè yóm gónô bong yóm tau hol geta bè Juda, monen, “Yóm ktilobem, hol lómón ktilob yóm tonok Gilyad ne lómón ktilob yó kem dlag bè yó kem bulul Libanun. Okóm angat genlau uu ne laen kô dù bud tauhem.

⁷ Angat wen tau dóku mò gembà kóm, sket kul mit ngom sfatay. Gotu nofok le yó kem koyu sidar hehekem ne gotu bot le lu elem ofi.

⁸ Angat wen kem tau lemwót bè dumu benwu mlan bè yóm syudad gbà yó, yó angat sentulón le, mon le, ‘Moen ke genbà Dwata nim tey syudad bong ni?’

⁹ Angat wen malà du, mon le, ‘Lan le mulé yóm deng fasad le yóm sana kul Dwata hol gónó mogot ne lan le tmaba ebè yó kem dwata kéng.’ ”

Yóm gbak ebè Jihuyahas

¹⁰ Ó kem tau bè Juda, hol bê ye abay nkik yóm katay Jusaya ne bê ye abay lenangag yóm klanahen lem blóng ye. Yó dé hol nkik ye yóm ngaen, duhen Jihuyahas yóm tau hol geta negef le ebè benwu mayuk, abay se là kóen bud gesfulék, là kô bud tonen du ne yóm kun benwu tehe gónó sut.

¹¹ Yakà yó du udél Dwata gbak ebè Jihuyahas yóm ngà Jusaya logi bud tles mogot yóm benwu Juda, bede deng negef le. Mon Dwata, “Là kóen bud gesfulék ne.

¹² Tódô matay bè benwu mayuk, là bud tonen du ne yóm hol kun benwu.”

Yóm gbak ebè Jihuyakim

¹³ Yó udél Dwata, monen, “Megtafak kun ke Jihuyakim. Hdaen yóm kun gónô bong mlan bè alì kdanda kdóken yó kem tau. Balù udì se ke snukéyen lu. Balù yóm tey ktilob yó kem dfél hmoen, okóm sal lemwót bè là ktedengen lanen gmaga mdók yó kem tau hmoen du.

¹⁴ Megtafak bè yóm kmonen du, ‘Angate hemdà gónô bong, hwenu kem dfélen ne kem tembó bengen, nbengu koyu sidar tilob boohen, ominu bemtulà du yóm btulà móntóng hulô.’

¹⁵ Okóm balù nô ktilob yóm gónô bong hdaem Jihuyakim, là kô gbeken hemtilob du yóm kegetahem. Yó gónón alì tahà kogoten benwu Jusaya yóm maem, abay se monem tedeng kogoten benwu. Yó se gónó Dwata alì tmóbóng du.

¹⁶ Sal gel tedeng kukumen yó kem tau élél ne kdê yóm nmoen sal hyu uléken. Yó se yóm kmò ketngónen dou,” mon Dwata.

¹⁷ “Okóm kóm Jihuyakim, teyi seglom, geli tmulón kéng. Gel hnatayem yóm tau laen dù salaen ne gel hen-gnokem yó kem tau élél ne tey sidek kwitem kul yó kem tauhem.”

¹⁸ Yó gónóm mon, yó udél Dwata eta Jihuyakim yóm ngà Jusaya deng bud tles maen mogot yóm benwu Juda, monen, “Là kô wen fes lówóhen mkik du ke sok matay. Ne laen se dù kem tau nogoten kemmón du yóm katayen.

¹⁹ Yóm kebeng le du hol lómón kebeng kudà asnu, tódô dyol le hewà gu bè Jirusalim, bot le e sentu yóm bak tikeb.”

Yóm gbak ebè yóm kegbà Jirusalim

²⁰ “Hol ye mkik kem tau bè Jirusalim, abay se angat le gotu meglà yó kem tau gel dumu ye stóbóng. Hnebel ye lu ditu bè Libanun. Hol hgel ye tmaba kul ditu bè Basan. Ne hnebel ye lu bè yó kem benwu fi dmata kdaw. Okóm là kô na ye e bud ton kul, deng le tódô gotu meglà.

²¹ Yóm hanà tolo kegenem kwasa deng wen eles hetgamahu kóm, okóm là kô dog hnungolem dou. Tódô nbuten bè kegenem hanà ngà deng kem sana yó ne yóm kóm kmò, là kói móyô hmungol.

²² Yó kem tau gel dumum stóbóng, angat le tódô gotu lana, mung le holis bè lenos. Kdê yó kem tau gel dumum stóbóng, angat tódô gotu negef le lu. Ke deng sut yóm yó, ominem yó he mulék myak lemwót bè yó kem sidek gel nmoem.

²³ Ya tey kehyuhen yóm knóem lem yóm gónô bongem nmò le gu bè yó kem koyu sidar lemwót bè Libanun, okóm bè sónen angati mulék mkik ne mulék dmolong. Lómó ksidek kegnómem du lómón yóm libun kmuleng blututen.”

Yóm gbak ebè Jihuyakin

²⁴ Yó udél Dwata eta Jihuyakin yóm ngà Jihuyakim yóm tau hol geta bè Juda, monen, “Ni se udél yóm Dwata là matayen. Baluen he ke uu yóm tising blówón nô bè tdok kwananu, botong kóhu uu.Blayu uu elem hólól yó kem tau malu hmatay kóm, yó kem tau alì knikoem. Blayu uu elem hólól Nibukadnisar yóm tau hol geta bè Babilun ne ebè yó kem sendaluen alì mfasang.

²⁵ Blayu uu elem hólól yó kem tau malu hmatay kóm, yó kem tau alì knikoem. Blayu uu elem hólól Nibukadnisar yóm tau hol geta bè Babilun ne ebè yó kem sendaluen alì mfasang.

²⁶ Hdóhu yu bè yóm kuy tonok lewu ye yéem ne angat ye tódô matay ditu bè tólóng benwu mayuk.

²⁷ Là kô bud tonem du ne yóm benwu ye ne là kói bud gesfulék edu.

²⁸ Moen de nim Jihuyakin ni, hol lómón tô yóm lebwón btù deng hnuda? Moen de ke mom negef le ebè benwu mayuk mung du kem ngaen?

²⁹ Ó tonok, hol hnungolem yóm udél Dwata, monen,

³⁰ bè yóm snulat le gbak bè klowil Jihuyakin laen kô dù sfuhen, abay se laen dù bè yó kem ngaen ke gemyón bè yóm kun gónó myón kmamal Dabid mò mogot yóm benwu Juda. Ne laen kô dù gónón e kól yóm kun klowil.”