Jirimaya 20 - Udél Dwata: Gna Kesfasad ne Lomi Kesfasad

Yóm udél Jirimaya ebè Pasyur

¹ Wen sotu tau gel blóng ebè Dwata nô bè yó boluyen Pasyur ngà Imér. Du fen mogot du yóm Gónô Dwata. Bè yóm kungolen du yóm udél Jirimaya

² yó nmoen, hekfóen Jirimaya yóm tugod Dwata, ominen hfes du ne hféten moni bè yóm bak tikeb boluy le du Bak Tikeb Bindyamin bè Gónô Dwata.

³ Tikóng hayahen bè yó, omin Pasyur hewà du. Ne yó udél Jirimaya ebè Pasyur, monen, “Là bud Pasyur du ne boluy Dwata kóm. Yó tles boluyen kóm, ‘Tau sónmoen tendo likò.’

⁴ Yakà ni du yóm udél Dwata ebéléem, monen, angat tey sidek kehlikou kóm dalang se yóm kdê weem. Kóm mata se angat mton du yóm ktibó kem hohon ye kul sudeng yó kem weem. Angat blayu lu elem hólól yóm tau hol geta mogot yóm benwu Babilun yó kem tau bè Juda. Wen se bélê le negefen etu bè Babilun ne wen se bélê le matay bè sudeng.

⁵ Ne yóm kdê kendengen ye bè Jirusalim gotu hegefu yó kem hohon ye. Yóm kdê kendengen alì mebtes lem nim syudad ni, kem ngom yó kem tau hol geta bélê ye yóm wen botu sminang alì mebtes nô du, dalang se yóm tahu blówón ne blówón bukay le, gotu negef le lu ebè Babilun.

⁶ Bong kóm, Pasyur, dalang se yó kem fes lówóhem gotu negef le yu etu bè Babilun snéen. Ditu angat tódô gónóm matay ne angat gónó le lembeng kóm, mung kóm yóm kdê weem deng gónóm tmugod kéng, yóm kmonem du laen dù hemen ye.”

Ktalaw Jirimaya ebè Dwata

⁷ Yó udél Jirimaya ebè Dwata, monen, “Ó Dwata, deng tey kubugem dou bè yóm kehtugodem do. Teyi kemgis sentahu ne uu gemmò béléu. Ne ni, tey sidek kesedekà le dou yóm kdéen tau bè nim syudad ni.

⁸ Ke wen tulónu, sal gel hgelem udélu ne són yó tulónu, ‘Angat wen tey gemlà kuy.’ Lemwót bè yóm htulónem do yó, deng mom senflowon le ou ne sendekà le ou.

⁹ Okóm ke monu tódô klifótu ne Dwata ne laen dù bud tulónu mlan bè boluyen. Yó mò do yóm udélem bnosu lem hendemu, hol lómón ke ofi mken lem but blututu ne mken lem tiolu. Là bud gafasu du ne ke là tulónu du yóm htugodem dou.

¹⁰ Deng tey dê gungolu udél le etahu. Yó boluy le do, ‘Tau Tendo Likò.’ Ne yó eles mon le mò dou ke bud wen dumu tulónu, angat klamo le o. Balù yó kem tehe weu, sónmò nangat le ke wen gónóhu btang bè udélu. Mon le, ‘Hyu ke wen gónón gholot mò gónó tekuy gembeles béléen.’

¹¹ Okóm yóm Dwata, tendo nô klohoku lómón ke sendalù lóbô. Là kô le gemmò béléen yó kem hohonu. Là kô le gemmò béléu. Angat tey sidek kyak le, abay se là gfuhen yó kem tô atul le etahu. Ne là kô klifót kem dumu tau du yóm tey kyak le yó.

¹² Ó Dwata yóm laen dù là gbeken du, tngónem se kóm yó kem tau tedeng kmoen, gel henklolem yóm nô lem but blutut le ne nô lem hendem le. Htonem do dé yóm fen kbelesem, yakà deng suu du lem hólólem yóm dou klowil.

¹³ Ne ni, lemingóne ebè Dwata mò gónóhu dmóyón du. Abay se yóm ou tau hen-gnok le ne deng lenwà Dwata ou lem hólól yó kem tau hemgnok do yó.

¹⁴ Okóm ni, henmulau yóm kdaw tehe ksutu. Hyu ke tódô lana yóm kdaw tehe ksutu yó.

¹⁵ Henmulau snéen yóm tau tehe mon du mò ke mà, ‘Wen hyu tulónu kóm, deng wen ngaem logi.’

¹⁶ Hyu ke hol meglà yóm tau yó, lómón keglà yó kem tehe syudad gna, bà udì ke wen kkodu Dwata kul. Hyu ke hol sidek klikoen bè yóm angat kungolen uni yó kem tau sgida,

¹⁷ abay se là deng tehe hnatayen do bè yóm tehe ksutu. Mom hyu ne ekni ke tehehe matay lem blutut yê, ditu gónóhu lebeng.

¹⁸ Moen de ke tehehe sut? Yóm klawihu mowil laen kô dù gónón menek, senflósen wen gónóhu langag ne wen gónóhu myak.” Là gomongen bè nili yóm tsaptér 21. Yó tulónen bè nim tsaptér ni yóm kdók Sidikaya tau ebè Jirimaya anì hol mni tóbóng bè Dwata bélê le anì là henlós genbà Nibukadnisar du yóm syudad le, blaem deng snibut le lu. Okóm yó balà Dwata kul, là kô tnóbóngen kul. Mom hegefen Sidikaya mung du yó kem genlalen ne gotu ntem yó kem hohon le yóm syudad Jirusalim.