Jirimaya 2 - Udél Dwata: Gna Kesfasad ne Lomi Kesfasad

Yóm duón Dwata yó kem kun tau

¹ Yó bud udél Dwata ebéléu mon Jirimaya,

² “Lemwóti ne, hol heglalagem bè kdéen tau lem Jirusalim, monem mò kul, ‘Ni se udélen ebélê ye yóm sana Dwata hol gónó mogot, monen, Gtulón nawaw yóm tey tehe kteneb ye béléu bè yóm hanà klomi ye tau. Tey kbong nawa ye dou, lómón yóm libun lomi myehen, tey kbong nawahen yóm tuha logihen. Balù elem yóm benwu là hyu menwu du, yóm benwu balù udì ke wen mowil du, ewenem sana klolò ye dou.

³ Bè yó kem kdaw yó, deng hetfingu yu ebéléu yu kem tau Israél. Yu se yó kem hol ngau twogu. Ke wen tau tehe hemsidek kuy sal gel wen glumfak hwitu ebélê le. Ou se yóm sana Dwata hol gónó mogot nim mudél ni.’ ”

⁴ Ó kem tau Israél kem tau sfu Jakub, hol hnungol ye yóm udélen ebélê ye Dwata.

⁵ Yó udélen ebélê ye, “Salà du de yóm tehe ton le béléu yó kem tehe fù ye? Tedu se ton le mò gónó le hlayuk béléu? Deng le mom tmaba ebè yó kem dwata lenbù nmò laen dù muhen. Ne yó uléken baling le tau laen dù mu se kul.

⁶ Balù udì se ke tô mon le, ‘Nô se yóm Dwata tehe mit tekuy hewà gu bè Idyip ne laen kô dù hemen tekuy? Nô se yóm tehe malak tekuy lem yóm benwu là hyu menwu du? Yó se yóm benwu balù udì ke wen mowil du tódô hono helek, hono sol ne tey sidek kkinien, benwu gónó matay. Balù sotu ke wen tau menwu lemen ne balù sotu tau ke wen mlan lemen.’

⁷ Bè yóm tehe kwitu kuy eta yóm tey tonok tembas gónó ye hligal mken du yó kem hyu tmowok tahen, deng mom nmò ye yóm sidek ta nim tonok ni, yóm tonok deng tehe fasadu kuy.

⁸ Yó kem tau gel blóng ebéléu balù udì se ke mon le, ‘Nô se Dwata du?’ Yó kem tau gel kmukum là kô bud tngón le dou. Yó kem tau mogot benwu deng mom knogol le ou. Ne yó kem tau gel tugodu deng le mom tmugod bè Baal. Tmaba le ebè yó kem dwata lenbù nmò le, yóm laen dù muhen.

⁹ Yó gónóm mon angat nwitu yu bè kukum, ngangu dmuón kuy efet kól bè yó kem angat lugod ye. Ou se yóm sana Dwata hol gónó mogot nim mudél ni.

¹⁰ Mógów ye etu fi desdef bè yóm benwu Siprus ne bud ye mógów etu fi dmata kdaw bè yóm benwu Kidar. Hol hennagì ye yóm angat ton ye ditu. Hol hnénég ye ke deng wen bélê le ditu mò du yóm deng nmò ye béléu ni.

¹¹ Deng wen bélê le kô temles du yó kem kul dwata balù yóm là ktahu le? Okóm yó kem dou tau deng mom tenles le ou, yóm kul Dwata hol gónón lemwót yóm kadat le kul yó kem dumu tau. Tles le dou yó kem dwata lennged laen dù muhen.

¹² Duhen ni, Longit, sidek kegbeng lemem du se kóm nim nmò le ni. Tahu sidek kegnómem du se kóm nim nmò le béléu ni,” mon Dwata.

¹³ “Yakà deng wen lewu salà nmò le béléu yó kem dou tau. Deng tebel le ou, yóm sfut él gónó le mowil ne deng wen sol nokol le nbeng le botu mò gónó le hemsù él, okóm deng mom molo yóm él sù le lemen.”

Ulék yóm kkogol le ke Dwata yó kem tau Israél

¹⁴ “Yó kem tau Israél là kô le hesek se kul. Là kô le hesek mbut bè yóm tehe ksut le. Moen se ke deng mom negef le lu yó kem hohon le?

¹⁵ Hol lómó kmò le ebélê le yó kem hohon le yó hol lómón ke mngel yó kem liyun. Yóm kul benwu yó kem tau Israél, deng mom nmò yó kem hohon le benwu là hyu menwu du. Deng tódô gbà yó kem syudad tehe gónó le nô, ne deng hol tahu gbayà.

¹⁶ Yó kem tau Idyip lemwót bè benwu Mimfis ne bè benwu Tefanis, deng gotu kó le bè yó kem tau Israél yóm któtól le ne kfasang le.

¹⁷ Ó kem tau Israél, yóm glumfak ye ni lemwót bè yóm ktagak ye dou yóm sana kuy Dwata hol gónó mogot, igou malak kuy bè yóm lan hyu.

¹⁸ Tedu se deng guta ye du bè yóm gel kógów ye ebè Idyip na ye e kinum bè yóm kul Él Nayl bè yó? Tedu se deng guta ye du du yóm gel kógów ye ebè Asirya na ye e kinum bè yóm kul Él Yufratis bè yó?

¹⁹ Yó kem sidek tendo gel nmò ye, bud mulék eta ye. Gnóm ye he yóm tey khééten ne yóm tey ksideken yóm ktagak ye dou yóm sana kuy Dwata hol gónó mogot. Yó se ulék yóm là klikò ye dou. Ou se yóm Dwata hol dandónen geta, yóm Dwata laen dù là gbeken du nim mudél ni.”

Kekbê le ke Dwata yó kem tau Israél

²⁰ Yó bud mon yóm Dwata hol dandónen geta, “Ó kem tau Israél, deng tey legen ne yóm kekbê ye dou. Là kô nimón ye dou ne là se kô ye tmaba ebéléu. Tódô ket ta yó kem bulul geta ne ket laan yó kem koyu lembang gónó ye gel tmaba ebè yó kem dwata kéng. Lómó kmò ye dou lómón ke tau mdà yehen.

²¹ Moen de ke lómón ni nmò ye? Igoen bè yóm tehe khuluhu kuy, lómón ke yu yóm lefà grép alì mgélék. Okóm moen se ni du ke deng ye mkél bè yóm lefà grép tmowok lem bnes laen dù bud muhen?

²² Baluen he ke smabun ye yóm sabun alì lóbô, là kô ye na a baling mólós. Sana tolo ktonu du bélê ye he yóm lekes salà ye. Ou se yóm Dwata hol dandónen geta nim mudél ni.

²³ Okóm yó gel udél ye, ‘Kéng yóm monem yó. Là kô me gel tmaba ebè Baal se kum.’ Okóm hnénég ye dé yóm deng nmò ye ditu bè sbong. Hol hendem ye yóm deng nmò ye bè yó. Bè yóm kektes ye yó kem dumu dwata, hol lómón ke yu yóm kamél libun móyô logi, sónmoen mlóy sembeweg mebel tô lanen.

²⁴ Ne hol lómón ke yu yóm kudà asnu libun nô lem bnes. Sónmoen mungef du gónón seblà nô yóm kudà asnu logi. Ke kól béléen yóm óyóen logi, laen kô dù gembek mafas du. Ne yóm kudà asnu logi móyô du tey mahil béléen mebel du, abay se tódô mlóy ebéléen yóm asnu libun yó.

²⁵ Ó kem tau Israél, bê ye là ngang kemtes yó kem dumu dwata efet gotu bolok snilas ye ne efet mékéng lem lihol ye. Okóm deng mom yó udél ye, ‘Là, là kô gbek me du ke là ktes me kul. Deng bong nawa me kul yó kem tólóng dwata ne ni ktes me lu.’ ”

Yóm but gónó Dwata tmafak kul yó kem tau Israél

²⁶ Yó udél Dwata, monen, “Yóm tau mnagaw, tey sidek kyaken ke gekfô. Lómón yó se kuy kem tau Israél, angat tey sidek kyak ye bè yóm kekfóu kuy yóm kdê ye, gomong yó kem tau hol geta bélê ye ne yó kem genlal ye ne yó kem tau gel blóng ye ebéléu ne yó kem tau tugodu, angat tey sidek kyak le.

²⁷ Deng le gotu menmà bè yóm dwata lenbù nmò le bè koyu ne menyê le bè yóm sotuhen nmò le gu bè botu. Deng knogol le ou, okóm ke wen gfà le, bud le hkodu béléu anì lenwau lu.

²⁸ Nô se lu du yó kem dwata lenbù nmò ye? Ke sok wen gfà ye, hkodu ye bélê le anì lenwà le yu ke gbek le. Ó kem tau bè Juda, yóm tey kwen yó kem benwu gónó ye nô, lómón yó se kwenen yó kem dwata ye.

²⁹ Tedu se yóm alì delem ye dou kem tau Israél? Deng mom yu kmogol dou yóm sana kuy Dwata hol gónó mogot.

³⁰ Deng tnafaku yó kem ngà ye, okóm là kô le medlà. Là kô le mimón. Bud yu se yó kem tau tendo gel hmatay yó kem tau tugodu, lómón ke yu yóm liyun tendo módód msék.

³¹ Ó kem tau Israél, hol hnungol ye nim udélu ebélê ye ni, udél yóm sana kuy Dwata hol gónó mogot. Deng lómó kmou ebélê ye kô lómón ke ou yóm benwu là hyu menwu du hlós wen gónó ye élél du? Lómón ke ou kô yóm benwu alì mget kkifuhen, là ton ye du lan ye? Ke là tahuhen se yó, moen de ke mom mon ye là bud ye gfét béléu ne, ne là bud ye móyô semfulék ebéléu?

³² Yóm ngà libun, gbeken kô kmifót du yóm ngom blówónen? Ne yóm libun myehen, gbeken kô kmifót du yóm nes mò leseken? Hol mou kun ne ke tô klifót le. Okóm yó kem dou tau deng kem hilu halayen ne yóm keklifót le dou.

³³ Deng hónô tngón ye se kuy yóm kmò kektes ye du yó kem dumu dwata nóyô ye. Balù yóm libun hdóyón, sana kwen dnalangen bélê ye bè yóm khulung ye kemtes.

³⁴ Yóm nes ye, deng tódô hono lekes litô yó kem tau laen dù gónó le ma ne laen dù salà le. Tódô hnatay ye lu baluen ke laen dù deng hennagaw le bélê ye.

³⁵ Mom yó gel mon ye, ‘Laen kô dù salà deng nmò me. Là kô lenbut Dwata kum.’ Okóm ni, ou se yóm Dwata angat tmafak kuy, abay se deng hnalà ye yóm kegsalà ye.

³⁶ Ne sotuhen, tey dê benwu lembang deng gónó ye e semdakit mò gónó ye htóbóng. Okóm ni, bè yóm kehtóbóng ye bè Idyip gónó ye mulék myak lómón yóm tehe kehyak le kuy yó kem tau bè Asirya.

³⁷ Yakà deng kenbê Dwata kul yóm lewu kem benwu lembang deng snalig ye. Laen kô dù lan le tmóbóng kuy. Angat tahu yóm kbaling ye tau negef.”