Jirimaya 19 - Udél Dwata: Gna Kesfasad ne Lomi Kesfasad

Yóm lebwón tonok lenusok Jirimaya

¹ Yó udél Dwata ebéléu, monen, “Lemwóti nam e bemli lebwón tonok. Ke dengi bemli, tminoki ebè yó kem tuha gónó le gel galak yó kem tau ne bè yó kem tau gel blóng ye ebè Dwata anì mung le kóm.

² Mógów ye etu bè Datal Ben Hinom, mlan ye bè yóm Bak Tikeb Kébéng. Bè yó gónóm tmulón du kul yóm tulónu kóm.

³ Yó tulónem kul, monem, ‘Yu kem tau hol geta mogot yóm benwu Juda ne yu kem tau bè Jirusalim, hol hnungol ye yóm udélen ebélê ye ni yóm Dwata laen dù là gbeken du, yóm sana kuy Dwata kem tau Israél. Yó udélen ebélê ye, monen, angat wen tey glumfak bong hwitu ebè nim benwu ni, anì yó kdê yó kem tau mungol du nim nmou ni, angat le tódô gotu teneng.

⁴ Yó gónów mò du nim ni, abay se deng tnagak le ou yó kem tau Israél ne deng nmò le yóm alì sidek béléu lem nim benwu ni mlan bè yóm gel kedsù le ebè yó kem dwata kéng, kem dwata là deng kul hnikót tngón du. Dalang se yó kem fù le ne yó kem tau hol geta mogot yóm benwu Juda, là deng kul hnikót tngón du yó kem dwata kéng ni. Bè nim benwu ni gónó le mamà litô yó kem ngà le, kem ngà laen dù salà le.

⁵ Deng le mom hemdà gónó demsù ebè Baal mò gónó le hkekeb ebéléen yó kem ngà le logi. Là kô hmou du kul nim ni, ne là se kô hendemu du balù sulék.

⁶ Yó gónóm mon, hol ye eles temgama. Angat kól yóm kdawen là bud bnoluy le du Tufét ne nim sbong ni, ne là se bud bnoluy le du Sbong Ben Hinom. Yó tles boluy le du Sbong Gónó Hmatay.

⁷ Yakà angat hensengu du yóm atul yó kem tau bè Juda ne yó kem tau bè Jirusalim ne hlusu yó kem sendalù hohon le mò hmatay kul. Yó kem lówó le deng matay tódô tebel yó kem hohon le, gotu htukóu yó kem onuk koyu mken matay ne hséku yó kem ógóf lem bnes.

⁸ Angat tey sidek kegbau du yóm syudad Jirusalim. Lemwót bè yóm alì kegbaen, ya tey sidek ketnga yó kem tau mlan bè yó ne tey khisik le du.

⁹ Angat heslibutu yó kem hohon ye yóm syudad yó efet laen dù bud ken le yó kem tau nô lemen. Lemwót bè yóm tey sidek kbitil yó kem tau nô lemen, botong ken le yó kem kul dumu ne yó kem ngà le, bà mon yóm tey sidek keslibut le kul yó kem hohon le.’

¹⁰ Ó Jirimaya, bè yóm igò le temngel yó kem tau mung kóm, gotu lenusokem yóm lebwón nwitem.

¹¹ Ominem yó mon du mò kul, ‘Yó udélen ebélê ye yóm Dwata laen dù là gbeken du, monen, yóm klusoku nim lebwón tonok ni, hol lómón ni se angat klusoku yó kem tau bè Juda ne tau bè Jirusalim, laen dù bud gembek semtnù kul. Bè yó bè Tufét angat gónó le lembeng lówó yó kem tau deng matay. Yó mò du efet laen du bud gónó le lembeng bè yó ne, bà mon se yóm tey tau matay.

¹² Ni se, mon Dwata, angat nmou bè nim benwu ni ne bè yó kem tauhen. Là kóen bud mólós ktonu du yóm syudad le yó, hol lómón yóm là kólós yóm benwu Tufét.

¹³ Yó kem gónô bè Jirusalim gomong yóm gónô bong yó kem tau hol geta mogot yóm benwu Juda, là kóen mólós ktonu kul. Là mólósen béléu, abay se ta ketef gónó ye gel mtem insinsu ebè yó kem blotik gel tnaba ye mò dwata ye ne gónó ye gel temwél yóm tifas grép ebè yó kem dwata lennged ye mò dsù ye ebélê le.’ ”

¹⁴ Omin Jirimaya lemwót bè yó bè Tufét, yóm benwu gónó Dwata htulón du du yóm udélen ni koni ne tódô mulék. Bè yóm kuléken nan na slob talak lósól yóm Gónô Dwata ne yó udélen ebè yó kem tau nô bè yó, monen,

¹⁵ “Ni se udél yóm Dwata laen dù là gbeken du, yóm sana kuy Dwata kem tau Israél, monen, angat wen tey heglumfaku du yóm syudad ni dalang se yó kem benwu hmilol du, hol lómón yóm deng monu mò kuy, abay se tey mgel kulu ye, là kô hnungol ye dou.”