Jirimaya 17 - Udél Dwata: Gna Kesfasad ne Lomi Kesfasad

Khulung hedem lemwót bè Dwata

⁵ Yó udél Dwata, monen, “Megtafak yóm tau ke knogolen ou ne ke smalig bè kgis tau te tonok.

⁶ Hol mkél bè yóm koyu lefungu mteg bè yóm benwu laen hol wen tauhen. Mteg bè yóm tey tonok mékéng, tonok wen khééten, balù udì ke wen mowil du. Ke lómón yó yóm tau, laen dù bud nefet nawahen.

⁷ Okóm tnóbóngu yóm tau smalig béléu ne són ou nefet nawahen.

⁸ Hol mkél bè yóm koyu mteg hilol él gefet bè él dolilen. Ke bangen kinì kdaw yóm kdawen là kmulón, laen kô dù bang tnafa nawahen. Sana kenawen yóm dounen ne tendo senflósen wen bunguhen.

⁹ Yóm kehedem tau hol gónó gsukat, tey móyô mò sidek. Tau du se gbek temnef du yóm ksideken yóm kehedem tau?

¹⁰ Okóm ou se yóm sana Dwata hol gónó mogot, ou se gel hemklol du yóm nô lem hendem tau ne gotu tonu yóm nô lem but blututen. Yóm ofol blayu du sal lemwót bè yóm deng kun gel nmò.”

¹¹ Yóm tau fmilak mlan bè là ktedengen, hol mkél bè yóm onuk koyu nlonen yóm là kun ngà lenbotù du, là legenen béléen yó kem ngaen yó. Bud là legenen bè yóm tau yóm kendengenen mlan bè yóm là ktedengen, tódô kendel lana. Ne ke deng tuha bud mulék élél, gfan yóm kungelen.

¹² Okóm kum, Dwata, bè yóm kóm gónó kmamal gónó me gel tmaba ebéléem. Yóm gónóm kmamal yó, tey kegetahen ne alì knóón ne laen kô dù sónen.

¹³ Ó Dwata, uu se yóm nefet nawa yó kem tau Israél. Angat le gotu mulék myak yó kem tau kmogol kóm. Angat le tódô lana lómón yóm boluy snulat le bè kfung, yakà deng tebel le kóm yóm tbul él hol gónó mowil.

¹⁴ Ó Dwata, kóhem dou yóm blat nô tahu anì bud hyu kegnómu du. Lenwaem ou anì laen dù hemenu. Tek són uu yóm dóyónu.

¹⁵ Yó udél le hemnê do yó kem tau, mon le, “Boluyen yóm tendo tulónem yóm gel monem, ‘udél lemwót bè Dwata.’ Moen là géhél sut du yóm tendo gel tulónem yó?”

¹⁶ Ó Dwata, là kô bayau du yóm hmoem dou ni. Lómón ke ou yóm tau semgyok ubiha, sen-gyoku yó kem tauhem. Là kô nubugu kóm se anì wen hlayam hwitem ebélê le. Kaem kóm udél se yóm tendo tulónu kul, là kô dou udél du.

¹⁷ Ó Dwata, béem bayà ou. Tek són uu yóm nefet nawahu bè yóm kdawu glayam.

¹⁸ Yóm kdê tau tendo hmayam do ni, hol henyakem lu ne hol benlayem lu klikò. Okóm benlayem ou kenek nawa yó dum do. Tahu se, Dwata, hol tennuem yóm hegfaem kul.

Yóm hlolò Dwata bè Kdaw Kehegnô

¹⁹ Yó bud udél Dwata ebéléu, monen, “Lemwóti ne Jirimaya, mdai bè yó kem bak tikeb bè Jirusalim, hegnahem yóm bak tikeb gónón gel hewà yóm tau hol geta, ominem semket yó kem dumu bak tikeb bè yó.

²⁰ Mdai bè yó, mudéli ebè yóm kdéen tau, monem, ‘Ó kem tau hol geta kmamal bè Juda ne yu kem tau bè Juda, dalang se yóm kdê tau nô bè Jirusalim, hol hnungol ye yóm udél Dwata ebélê ye.

²¹ Ni se udél Dwata, hol hnungol ye yóm eles hetgamahu kuy anì mowil ye. Bè yóm Kdaw Kehegnô, hol bê ye abay nwit ebè yó kem bak tikeb bè Jirusalim yó kem gel hbalù ye.

²² Bê ye abay mò nmò bè yóm kdaw yó, yó se kun kdaw Dwata. Deng tehe hlolou yó kem tehe fù ye ekni nim hlau ni,

²³ okóm là kô le hmungol ne là kô nimón le do. Tey mgel kulu le, là kô kenmón le du yóm hlolou kul ne là kô le medlà ke wen tafaku kul.

²⁴ Okóm kuy, ke nimón ye ou mon Dwata, ne ke là hembalù ye bè yóm Kdaw Kehegnô ne ke là mò ye nmò ne ke hol hetfing ye ebéléu yóm kdaw yó,

²⁵ angat hlós efet kól bè laen tul sónen nim benwu ye ni. Ne tendo wen sfu Dabid seflós myón bè yóm gónón myón kmamal bè ni bè Jirusalim. Angat tendo wen kem tau hol geta mogot kuy ne kem genlal le smakay kudà ne myón klitun tók lem blóng yó kem tau bè ni bè Juda. Nim syudad ni, laen kô dù nan e són.

²⁶ Kdê yó kem tau lemwót hmilol Jirusalim, lemwót le bè yó kem benwu bè Juda ne bè Bindyamin, tau lemwót bè yó kem but bulul fi desdef ne bè yó kem bulul lemnek ne bè Négéb, angat le gotu mógów ebè ni mit le yóm dsù hkekeb le ebéléu, dalang se yó kem dumu gel dsù le. Mit le halay mò blay le do ne wen insinsuhen ne yóm dsù gónó le dmóyón do, nwit le ebè ni bè yóm dou Gónô.

²⁷ Okóm, mon Dwata, ke là nimón ye do ne ke là hetfing ye du ebéléu yóm Kdaw Kehegnô ne ke mit ye hbalù mlan bè yó kem bak tikeb bè Jirusalim lómón yóm gel nmò ye bè yó kem dumu kdaw, angat gotu ntemu yó kem bak tikeb bè Jirusalim. Yóm ofi yó, ngangen mken efet kól bè gónô bong yóm tau hol geta mogot kuy ne laen kô dù gembek hmatay du.’ ”