Jirimaya 15 - Udél Dwata: Gna Kesfasad ne Lomi Kesfasad

Alì kegtafak yó kem tau bè Juda

¹ Omin Dwata bud mudél ebè Jirimaya, monen, “Baluen he ke mdà bè ni Musis lewu le Samwél tô na a hkodu béléu bè ni kem tau bè Juda ni, là kô naw e knodu kul. Lohem lu mayuk. Hdóhem lu bè soluhu.

² Ke snólók le béléem, tedu gónó me e solu du, tulónem kul, ‘Ni se udél Dwata ebélê ye, monen ke kul olu matay bè des yó kem dumu, yó se hatay le. Ne yó kem dumu ke yó kul olu matay bè gida, yó se hatay le. Ke kul olu se yó kem dumu matay lemnus, yó se hatay le. Ne ke kul olu negef mayuk yó kem dumu, negef le lu mayuk.’

³ Ou se Dwata deng eles matul du yóm fat angat heglumfaku bélê le ni kem tau ni. Wen sudeng angat gónó le matay. Wen ohu fen demyol lówó le mò msék kul. Wen kem onuk koyu mken matay tmukô lówó le. Ne kem ógóf lem bnes fen bud hmotu kul.

⁴ Lemwót bè yó kem sidek tehe nmò Manasi yóm tau hol geta bè Jirusalim yóm ngà Hisikaya logi, bè yóm tehe kogoten yóm benwu Juda, yó gónóhu mò du bè yó kem dou tau ni kem monu ni koni. Ke ton yó kem dumu tau bè klamangen benwu yóm glumfak le ni, botong kenhisik le lu.

⁵ Tau du se kmodu kuy, yu kem tau bè Jirusalim? Tau du se lemangag kuy du? Tau du se smólók du yóm kuy kmò?

⁶ Yu se yó kem tau deng kembê dou,” mon Dwata. “Deng knogol ye ou. Duhen ni, tayalu eta sigelu mò gemlà kuy. Denge tey tmakas ne hembala du yó kem sidek tendo gel nmò ye.

⁷ Tódô ket benwu bè nim tonok ye ni gónów e tmeef kuy. Gotu genlau yu kem dou tau ne gotu hlangagu yu, abay se là kô kó ye du yó kem sidek gel nmò ye.

⁸ Angat tey wen libun bolu bè benwu ye, bong le wen senta yó kem helek bè kilil mohin. Lemwót bè yóm angat khatayu yó kem ngà ye logi lomi lemnok, angat tey kehlangagu yó kem yê le, mung du yóm tey sidek klikò le.

⁹ Yóm libun ke deng gotu lana béléen yóm hitu kem ngaen logi botong là kóen bud temngón, ne là kóen bud gnawa. Baling kifu béléen igoen tolo mnóng kdaw. Tey sidek kyaken ne tey sidek kegbeng lemen. Yó kem dù mowil bélê ye, gotu hfatayu lu hlanu bè yó kem hohon ye. Ou se yóm sana Dwata hol gónó mogot nim mudél ni.”

Ktalaw Jirimaya bè Dwata

¹⁰ Yó udél Jirimaya, monen, “Tey tau laen dù kligalen nim ou. Moen de, Yê, ke tehe hesutem ou lem nim benwu ni? Tey kekbê le dou yó kem tau bè klamangen benwu me. Là kóe deng mutóng filak se dou ne là se kóe deng hutóng. Okóm moen se ni du ke deng mom hnagi le ou yó kem tau?”

¹¹ Yó balà Dwata do, “Ó Jirimaya, ou se fen mofin kóm anì laen dù hemenem. Yó kem tau kembê kóm yó, angat le hkodu béléem anì uu fen mni béléu anì tnóbóngu lu ke kól yóm kdawen wen gfà le, yóm kdaw le hol glayam.

¹² Ke hningón te yóm mò kmò yóm hohon ye angat sut, hol lómón yóm bala tók alì mgel lemwót bè yóm benwu fi bwak, laen kô dù tau gembek temfok du. Dalang se yóm tembaga futì lemwót fi bwak, laen kô dù tau gembek temfok du.

¹³ Lemwót bè yó kem salà le béléu yó kem dou tau, angat hwahu yó kem hohon le yó kem kendengen le ne yó kem kimu legen le.

¹⁴ Hegefu kul yó kem dou tau anì nwit le lu ebè yóm benwu là deng hnikót kul tngón du, abay se yóm kebutu kul hol lómón ke mkal dilóf ofi gotu kenen kdéen.”

¹⁵ Ominu yó mudél ebè Dwata, monu, “Ó Dwata, tódô uu ne temngón du yóm kdéen. Hol hendemem o ne hol tnóbóngem o. Hbelesem dou yó kem tau tô hmatay do. Béem tlek hanay nawahem bélê le ni kem tau ni. Ke tô hanayem nawam déke wen kdaw le hmatay dou. Hendemem dé lemwót bè yóm ktugodu kóm gónów glayam bè yó kem tau.

¹⁶ Dengi mudél ebéléu ne gel hnungolu se yóm kdê udélem. Bè kóm udél se gónów gel hligal, yakà uu du se yóm Dwata laen dù là gbeken du ne kóm boluy yóm gel nwitu.

¹⁷ Là kô deng namau du udasu bè yó kem dumu tau bè yóm gel kehligal le. Lemwót bè kimónu yóm hmoem dou, laen kô dù dumuhu balù sotu. Ne gele lembut bè yó kem sidek gel nmò le.

¹⁸ Mou alì heglayam du? Moen là mkó du yó kem haliu? Bè kehedemu du yóm któbóngem do, déke là dohoen. Déke lómón yóm él mlel angat kti bè kinì kdaw, duhen ke yóm kokol deng kti.”

¹⁹ Yó balà Dwata do bè nim ni, monen, “Ke hegseli, henmóyóu uu ne budi baling tóbóng lówóhu. Ke tulónem yó kem udél wen muhen bélê le, budi baling tau mò tugodu. Lemwót bè udélem ebélê le, uu se mit kul yó kem tau. Là hyuhen ke lu mit kóm.

²⁰ Lómó kmou kóm lómón ke uu yóm beng tenwél alì mbegel. Ke wen mit kóm sfatay là kô le gemmò béléem. Tendohe nô béléem mò kemlung kóm anì laen dù hemenem. Ou se yóm sana Dwata hol gónó mogot nim mudél ni.

²¹ Angat hewau uu lem tdok yó kem tau gel mò sidek ne lem tdok yó kem tau tô hmatay kóm.” Là gomongen bè nili yóm tsaptér 16 kól bè tsaptér 17:4. Yó tulónen yóm là kóyô Dwata ke myehen Jirimaya. Là móyô Dwata snéen ke mung bè mulu ne ke mógów bè gónó modung, duhen ke mung bè yó kem gel kehligal le ke wen gel ken le bè yó kem gel dsù le. Yó gónó Dwata là móyô ke gbót Jirimaya bè yóm gel kehligal le yó, kóyóen ke dilô yó kem tau yóm angat kkóhen du bélê le yó kem dê gel hnigal le yó.