Jirimaya 14 - Udél Dwata: Gna Kesfasad ne Lomi Kesfasad

Kbel yóm tey kinì kdaw

¹ Ni se udél Dwata ebè Jirimaya gbak bè yóm tey kinì kdaw, monen,

² “Yó kem tau bè Juda tey klangag le. Bè yó kem syudaden laen dù bud gónó le ma mò hbalù le bè yó. Tódô le myón bè tonok yóm kdéen tau lan le langag. Ya tey sidek kkik le yóm kdéen tau bè Jirusalim lemwót bè yóm alì sidek keglayam le.

³ Yó kem tau wen kendengen le, dók le yó kem tóbóng lówó le anì na le e mebel él. Tahu se, mógów le ebè yó kem kokol, okóm laen kô dù bud él ton le. Bud nit le mulék laen dù lem yó kem tô nlem le. Tey sidek kegnóm le du ne tey kesbeweg le, botong lenimun le kulu le lemwót bè yóm sidek kegnóm le du.

⁴ Lemwót bè yóm là kkulónen tódô mékéng yóm tonok, botong gentô. Ya tey sidek kegnóm le du yó kem tau gel mò hulu, botong lenimun le kulu le se kul.

⁵ Ditu lem bnes, tódô tebel yóm uhu yóm ngaen lomi sut lanen laen dù bud nótóben.

⁶ Yó kem kudà asnu lem bnes, tódô olo le mdà ta yó kem bulul laen dù bnesen. Tey sidek ksudù nawa le lemwót bè kleeng le, lómón ksudù nawa yó kem ohu lóbô lem bnes laen dù ninum le. Là buden gmefet ketngel le lemwót bè alì sidek kbitil le, laen kô dù bud nótób le.”

⁷ Yó udél Jirimaya, monen, “Balù yóm tey kegsalà me, Dwata, nam na hol bud tnóbóng mi anì ton yó kem tólóng tau hmilol kum mò gónó le madat kóm. Deng tey dê dulék me kmogol kóm. Deng me gemsalà béléem.

⁸ Tek són uu se yóm nefet nawa me kem tau Israél. Tek són uu se yóm gembek lemwà kum bè yóm gónón wen hlayam. Moen de ke lómón ke tauhi milo bè benwu me, lómón ke tauhi mógów tek suloyen?

⁹ Moen de ke laen dù gmoem, lómón yóm sendalù là gbeken du tmóbóng? Uu se hol nô bélê me, Dwata, ne mi se yó kem kóm tau. Hol béem abay tódô bayà mi.”

¹⁰ Yó udél Dwata gbak ebè yó kem tauhen, monen, “Tey kóyô le du yóm kehlayuk le béléu ne là bud lolò le du yóm dou lan. Yó gónóm mon, là kô bud henmóyóu kul mò dou tau. Gtulón nawaw yóm kdê sidek deng gel nmò le, naw na tnafak lu bè yó kem salà le yó.”

Là móyô Dwata ke bud mni Jirimaya béléen bè yó kem tau bè Juda

¹¹ Yó udél Dwata ebéléu, monen, “Ó Jirimaya, béi abay bud mni tóbóng béléu bè ni kem tau ni.

¹² Baluen ke fasting le, là kô naw e kenmón kul. Ne baluen ke dsù le ebéléu yóm dsù gel hkekeb le ne ke wen blay le dou bè yóm halay le, là kô naw e henmóyô kul. Mom yó nmou bélê le, matay le bè gida ne matay le lemnus ne matay le bè des.”

¹³ Ominu yó mudél ebè Dwata, monu, “Ó Dwata yóm hol dandónen geta, wen tulón yó kem tau gel tmugod lem blóng le mon le mò kul, ‘Laen dù gida angat sut bè benwu tekuy ne laen se dù bitil angat mbel lem blóng tekuy. Angat henek Dwata he lem yóm benwu tekuy.’ ”

¹⁴ Okóm yó balà Dwata dou, monen, “Yó kem tmugod yó, hlan le bè boluyu yóm kmò le kéng. Là kô naw e dók kul ne laen se kô dù htulónu kul. Balù sotu ke deng wen htugodu kul. Wen gel ton le kun, okóm là kóen lemwót béléu. Ne wen gel tulón le yóm angat sut, laen kô dù muhen. Olo bè kul kehedem gónón lemwót yó kem yó.

¹⁵ Yó gónóm mon, eles tulónu kóm yóm angat nmou bè yó kem tugod là lemwót le béléu. Tódô lenbù hlan le bè dou boluy yóm gel tulón le, yóm kmon le du laen dù gida ne laen dù bitil mbel bè nim benwu ni. Yó nmou bélê le ni kem tau lembù tmugod ni, angat le gotu matay bè gida ne bè kbel bitil bong.

¹⁶ Bud senged se nmou bè yó kem tau deng gónó le tmulón du yóm tulón lenbù ni, bud le gotu matay se kul mlan bè gida ne matay le mlan bè kennus le. Yó kem lówó le, angat tudà yó kem hohon le ebè yó kem lan bè Jirusalim ne laen kô dù tebel bélê le mò lembeng kul. Ni se angat gfà le yóm kdê le, gomong kem yehen le ne kem ngà le logi ne ngà le libun. Hbayadu kul ne yó kem sidek deng nmò le.”

¹⁷ Yó hmò Dwata dou, htulónen dou bè yó kem tau yóm tey sidek klangagu, monu, “Hol tódô senflósen kdaw ne kifu he yóm klel lewoku. Hol là skasen he yóm tendo kkiku yó kem dou tau yóm tau hol kenbong nawahu, yakà dengen tey nelem halì le lan le tembek kul yó kem hohon le ne là kô le mowil du.

¹⁸ Ke mógówe ebè yó kem tonok gónóhu mò hulu, tódô tonu yó kem lówó tau deng hnatay yó kem hohon le. Ke mógówe ebè yó kem syudad, tódô tonu yó kem tau deng matay lemnus. Ne yó kem tau gel tmugod lem blóng le ne yó kem tau gel blóng ebè Dwata, tódô henlel le mò du yóm nmò le, okóm là kô tngón le du yóm nmò le yó.”

Alì kehkodu Jirimaya du bè Dwata yó kem tau Israél

¹⁹ Ó Dwata, deng hol tahu kenbéem ne kô yó kem tau bè Juda? Deng hol tahu nutó nawahem lu ne kô yó kem tau bè Jirusalim? Moen de ke alì hensidekem hemdes kum, yóm des laen tul kkóhen? Tô hendeen me yóm kenek kbenwu me, okóm là kô dog ton me du. Tô hendeen me yóm kdaw kkó des me, okóm mom bud msut bélê me yóm alì knikò.

²⁰ Deng me gemsalà béléem, Dwata. Hen-gsel me ne yó kem salà me, gomong yóm salà yó kem tehe fù me. Deng me gotu gemsalà béléem yóm kdê me.

²¹ Béem tódô bayà mi, Dwata, anì là myaken yóm kóm boluy. Béem mom kenbê mi, Dwata. Béem abay henyak yóm benwu Jirusalim, yóm benwu gónón nô yóm hol gónóm myón kmamal. Béem abay genbà yóm deng tehe senfasad tekuy, hol béem abay tódô bayà mi.

²² Laen kô dù bè yó kem dwata kéng ke gbeken hkulón. Balù longit, là kô gbeken du hkulón ete tonok. Són uu, Dwata, ken-gel nawa me yóm hol kum gónó mogot. Tek són uu gembek mò du ni kem hni me béléem ni. Nangat me yóm któbóngem kum.