Jirimaya 12 - Udél Dwata: Gna Kesfasad ne Lomi Kesfasad

Yóm snólók Jirimaya bè Dwata

¹ Ó Dwata, ke wen klamohu béléem sal tedeng yóm kukumem du. Ni wen snólóku béléem mò knukumem. Moen de kul yó kem tau mò sidek ke tilob kógów klowil le? Moen de ke gel le hligal yó kem tau là tedeng kmò le?

² Lómón ke deng huluhem lu ne deng le dmolil ne tmowok le, omin le mungu. Són boluyem btang bè sumóng le, okóm lem but blutut le balù udi ke wen nawa le ebéléem.

³ Okóm béléu dou, Dwata, deng tngónem yóm nô lem but blututu. Tonem ou ne tngónem se yóm nô lem hendemu. Ni kem tau mò sidek ni, dyolem lu hlayuk lómón kedyol le yóm ubiha ebè yóm gónó e tmétê du. Htólóngem lu efet kól bè yóm kdaw khatayem kul.

⁴ Lemwót bè yóm sidek gel nmò yó kem tau, deng gotu mékéng ni kem tonok me. Kegenen de duen yóm tey kékéngen ni, Dwata? Dalang se yó kem hulu me, deng le gotu menes. Ne yó kem ógóf lem bnes ne yó kem onuk koyu, deng le gotu matay lemwót bè yóm sidek gel nmò yó kem tau. Mom yó udél yó kem tau mò sidek, mon le, “Là kô ton Dwata du nim gel nmò tekuy ni.”

Yóm balà Dwata ke Jirimaya

⁵ Yó udél Dwata ebéléu, monen, “Ke mitegi bè yóm kwitem skuya mlóy bè tau, milud he klitegem ke kudà dumuhem skuya mlóy. Ke tlokobi bè yóm lan hyu, milud he ketlokobem ditu lem bnes mget bè kilil Jurdan.

⁶ Balù yó hem logi hol dumum sulil-lem hol kóm fes lówó, deng gbót hohon le uu. Hol béem abay snalig lu baluen ke tey tilob kmò le ebéléem.” Là gomongen bè nili yóm bérs 7 kól bè bérs 13. Yó tulónen bè ni kem bérs ni yóm alì kekbê Dwata du yó kem salà nmò yó kem tauhen, lelen tey sidek kegnómen du yóm tódô kbayaen kul elem hólól yó kem hohon le, yó kem tau angat gemlà kul ne gembà yó kem benwu gónó le nô.

Yóm udél Dwata gbak ebè yó kem tólóng tau

¹⁴ Yó udél Dwata, monen, “Ni se udélu ebè yó kem tólóng tau sidek nmò le deng tô mled yóm tonok tehe blayu bè yó kem dou tau Israél. Angat gotu kendutu lu ta yóm kul tonok lómón yóm angat kekdutu yó kem tau bè Juda ta yóm kul tonok.

¹⁵ Okóm kogolen bè yó bude semfulék ebélê le, bud knoduhu lu yóm kdê le. Bud nwitu lu semfulék ebè yóm hol kul benwu, ket tau nuléken yóm kun tonok.

¹⁶ Ne ke hol lolò le yóm kul hentahu yó kem dou tau ne ke hol lemwót lem but blutut le ne ke hlan le bè dou boluy ke wen safà le, ke mon le, ‘Safau bè boluy yóm Dwata là matayen’ (lómón yóm tehe ktolok le yó kem dou tau, hsafà le lu bè boluy Baal) ke yó nmò le, baling le mò dou tau.

¹⁷ Okóm ke wen bè yó kem tólóng tau là mimón do, angat gotu kendutu lu ne genlau lu. Ou se yóm sana Dwata hol gónó mogot yóm mudél ni.” Là gomongen bè nili yóm tsaptér 13. Yó tulónen bè yóm tsaptér ni yóm kehebli Dwata ke Jirimaya hilet nmò le gu bè yóm tey nes tilob bnetek bukay, hol lómón yóm nes gel lesek yóm tau blóng ebè Dwata. Hfilet Dwata ke Jirimaya yóm hilet ni, okóm hol béen abay nfuk. Omin Dwata hógów ke Jirimaya etu bè Él Yufratis bè benwu Asirya anì bnosen ditu yóm hilet yó lem sol botu. Deng legen bè yó, bud hwa Dwata ke Jirimaya yóm hilet tehe hebnosen du yó. Bè yóm kwa Jirimaya du, tey usingen ne deng bolok, là kóen hyu bud hmilet du tódô boten. Yó mon Dwata mò ke Jirimaya, “Ni se koni yóm gónów e hmingón kul yó kem tau Israél. Tau laen dù bud mu le.” Tahu se, tey tehe ktilob le bè yóm tehe knô le lem hólól Dwata, yóm tehe tey kimón le du ne yóm tehe gel ktaba le ebéléen. Okóm timbow knogol le Dwata, deng mom lolò le yó kem dwata kéng hentahu yó kem tólóng tau hmilol kul. Deng le mkél bè yóm hilet bnos lem sol, laen dù bud muhen tódô botu.