Jirimaya 11 - Udél Dwata: Gna Kesfasad ne Lomi Kesfasad

Là bud klolò kem tau Israél du yóm deng senfasad le Dwata

¹ Yó bud udél Dwata ebè Jirimaya, monen,

² “Heftulónem bè nawa yó kem tau bè Juda ne bè Jirusalim yóm deng tehe senfasad me.

³ Monem mò kul, ‘Ni se yóm udél Dwata, yóm Dwata yó kem tau Israél, monen, Hol megtafak yóm tau ke là loloen du yóm deng senfasad me.

⁴ Yó tehe senfasad me yó kem tehe fù ye bè yóm kwitu kul hewà gu bè Idyip, yóm benwu gónó le ghesek,’ monu, ‘Ke nimón ye ou ne ke gotu lolò ye yóm kdê hlolou kuy, baling ye mò dou tau ne ou se mò Dwata ye.

⁵ Yó gónóhu tehe mon du nim ni anì dohò yóm deng fasadu yó kem fù ye, duhen yóm keblayu du kul yóm tey tonok hyu ne tonok alì tembas, yóm tonok deng nfun ye ni kmoen ni.’ ” Yó balà Jirimaya ke Dwata, monen, “Tahu se, Dwata, yóm monem yó.”

⁶ Omin Dwata bud mon du, “Mógówi ebè yó kem benwu bè Juda ne ebè yó kem lan bè Jirusalim, heglalagem yóm udélu, ‘Hol hentulón nawa ye yóm deng tehe senfasad me yó kem tehe fù ye ne hol lolò ye yóm deng kul fasad dou.

⁷ Bè yóm tehe kwitu kul hewà gu bè Idyip yó kem tehe fù ye, tendo eles gel hegbelu bè nawa le yóm kimón le do. Ne senged se bélê ye ni kmoen ni, tendo eles hegbelu bè nawa ye.

⁸ Okóm yó kem fù ye, là kô kenmón le dou. Balù udì ke hnungol le ou. Mom hgel le kulu le, lolò le yóm óyô le mò sidek. Lemwót bè yóm là kimón le, yó gónóhu heglumfak du kul yóm kdê tafak deng nô lem yóm tehe senfasad me.’ ” Là gomongen bè nili yóm bérs 9 kól bè bérs 23. Yó tulónen bè ni kem bérs ni yóm kkogol le ke Dwata yó kem tau Israél ne yóm angat keglà Dwata kul dalang se yóm benwu le, lemwót bè yóm là kimón le du yóm deng tehe senfasad le Dwata. Yó udél Dwata ebè Jirimaya, monen, “Hol béi abay bud mni béléu bè yó kem tau yó. Béem bud nkik lu ne, abay se là bud hnungolu kul ke hkodu le béléu.” Yó nmò yó kem tau bè yóm kun benwu Jirimaya, deng mom nifis hnatay le Jirimaya ke wen udél Dwata bud tugoden. Okóm deng eles fasad Dwata yóm keklungen du ne yóm angat ktafaken yó kem tau tô hmatay du.