Jirimaya 10 - Udél Dwata: Gna Kesfasad ne Lomi Kesfasad

Gónón stólóng bè Dwata yó kem dwata kéng

¹ Ó kem tau Israél, hol hnungol ye yóm udél Dwata ebélê ye,

² yó monen, “Hol bê ye abay lolò yóm kul kmò yó kem tau bè dumu benwu. Bê ye abay likò lemwót bè yó kem ilô ton le bè longit, balù yóm alì klikò le kul yó kem tau bè dumu benwu.

³ Yóm kul hentahu yó kem tau yó, laen dù muhen. Nmò le dwata lennged yóm koyu nofok le lem dlag.

⁴ Ne wen blówón bukay ne tahu blówón gel klóón le du. Omin le tmutuk du bè yóm gónó le hemsù du anì là btangen.

⁵ Yó kem dwata le yó, lómón ke ongot bè gónó mulu timun. Là kô le mudél ne là se kô le mógów, sal gel sniwi le lu. Bê ye abay hlikò bè yó kem kul dwata yó, là kô gbek le hemsidek kuy ne là se kô gbek le tmóbóng kuy.”

⁶ Ó Dwata, laen kô dù semnged kóm. Laen kô dù là gbekem du ne tey mfasang yóm boluyem.

⁷ Tau du se là likò kóm, igoen uu yóm hol geta bè klamangen. Uu se yóm hol knóón bang gónó likò. Bè yó kem tau alì temngón bè klamangen benwu laen kô dù tau semnged kóm. Ne laen kô dù bè yó kem tau hol geta mogot kul ke semnged kóm.

⁸ Yóm kdê le gel tmaba bè yó kem dwata lennged le hono nungel, tau laen dù tngón le. Tedu se dnalang le bè yó kem dwata koyu le?

⁹ Yó kem dwata le yó, gel lenafin le yóm blówón bukay lemwót gu bè benwu Spén ne yóm tahu blówón lemwót gu bè benwu Ufas. Gotu blay le bè yó kem tau wen khulung le mò du. Nnes le yóm nes megem ginggung, yóm nes newel yó kem libun alì hulung mò nes.

¹⁰ Okóm uu, Dwata yóm hol gónó mogot, tahuhi Dwata se kóm. Uu se yóm Dwata là matayen, uu se yóm laen dù tul són yóm kegetahen. Ke sok bangem lembut tódô megsinsig yóm klamangen tonok. Gotu le hebnos yó kem tau bè dumu benwu lemwót bè yóm kebutem.

¹¹ Hol tulón ye bè yó kem tau gel tmaba ebè dwata lennged le, mon ye mò kul, “Yó kem kuy dwata kéng yó, là dlimun le du se kul yóm longit ne tonok. Angat le gotu lana yó kem dwata kéng yó, là kô bud tonem kul te tonok ne.”

¹² Okóm ke Dwata kun, dlimunen yóm tonok mlan bè kfasangen ne mlan bè yóm khulungen hedem gónón hbegel du yóm tonok dlimunen yó. Ne bud mlan bè yóm ketngónen gónón mból yóm longit.

¹³ Ke mudél Dwata gel lemugung gu bè longit, gel hlobunen gu ta kmawang. Gel heksilaen mung bè kulón ne wen lenos hwiten gu bè yóm gónón gel hemyu.

¹⁴ Ke hol hendem tekuy yóm tey kegbek Dwata, laen kô dù tngón le yó du kem olo tau te tonok, hono le nungel. Yó kem tau mò dwata lennged angat le gotu myak, abay se kéng yóm dwata lennged nmò le, là mowil le laen dù genbek le.

¹⁵ Laen kô dù mu le, knóón bang kenhisik. Ke sok bangen kól Dwata, gotu genlaen lu.

¹⁶ Yóm kun Dwata tehe Jakub, là kóen mkél bélê le. Du se mò du yóm kentihen. Deng néléken yó kem tau Israél mò hol kun tau nfun. Yó hol kun boluy, Dwata laen dù là gbeken du.

Yóm móyón keglà yó kem tau Israél

¹⁷ Ó kem tau bè Jirusalim, móyón senibut le yu ne yó kem hohon ye. Eles sentifun ye yó kem nwit ye, yakà tebel ye du yóm benwu ni.

¹⁸ Yó bud udél Dwata ebélê ye, monen, “Ni, botu yu mayuk gu bè nim tonok ye ni. Wen tey heglumfaku kuy anì gnóm ye yóm kebutu.”

¹⁹ Yó angat utóm kik yó kem tau bè Jirusalim, mon le, “Tey sidek nim tódô bélê me ni. Laen kô tul kkóhen yó kem halì me. Tódô kem henbala me nim tey gfà me ni.

²⁰ Yó kem gónô me, deng gotu gbà. Laen kô dù bud tebel du mò tmóbóng kum bè yóm bud kehdà me du. Gotu negef le lu yó kem ngà me, là kô bud ton me kul ne.

²¹ Yó kem tau gónó me galak laen kô dù mu le. Là kô le halak bè Dwata ne là kô hnebel le du yóm kun kóyô. Ni se yóm duón gónó le meglà yó kem tau nalak le ne gónó le gotu sekla.

²² Hnungol ye dé, wen tulón sut. Tey sendalù wen lemwót gu bè yóm benwu fi bwak, angat gotu genlà le yó kem tau bè benwu Juda. Henbaling le benwu mò gónó le nô yó kem ógóf lóbô lem bnes.”

Kni Jirimaya ebè Dwata

²³ Ó Dwata, tngónu se yóm klowil tau là kô kun du. Laen dù tau tódô gembek matul du yóm kun kmò klowil.

²⁴ Hol sentódóem ou, Dwata, bede hen-ganagem. Béem alì tnafak ou ke lemwót bè yóm kebutem do. Ke yó nmoem béléu, mataye.

²⁵ Yóm kebutem, Dwata, hol kokem eta tu kem tólóng tau kembê kóm, tu kem tau là tmaba le ebéléem. Yakà deng gotu hnatay le yó kem tauhem. Deng gotu genlà le mi yóm kdê me ne deng gbà yóm kum benwu.