Istér 9 - Udél Dwata: Gna Kesfasad ne Lomi Kesfasad

Khatay kem Ju yó kem hohon le

¹ Duhen yó na a kól yóm gesfoloen tlu kdaw bè bulón Adar, yóm kdaw kehto yóm lewu kem udin deng hwit yóm tau hol geta. Ni se yóm kdaw alì nangat yó kem hohon yó kem Ju anì na le e genlà lu, okóm deng mom kem Ju gemmò.

² Yó nmò yó kem Ju bè klamang yóm benwu yó, gotu le stifun bè ket yó kem syudad gónó le nô ne gotu le setgel anì yó, ke wen tau tô mundug kul deng le eles htigel ne kul. Tódô kdê yó kem tau là Ju le, gotu le likò kul ne laen dù bélê le gembek matù kul.

³ Bè ktahuhen, mom tnóbóng le lu he yó kem Ju yó kem tau wen glalen bè prubinsya, yó kem gubérnor ne yó kem tau wen hogot le kul ne yó kem tau wen glal le bè yóm tau hol geta. Yó gónó le tmóbóng kul abay se likò le ke Murdikay.

⁴ Deng tey tótól bè klamang yóm benwu yó yóm alì kfasang Murdikay lemwót bè yóm alì kbong glalen bè yó bè gónô bong ne sónmoen temnù yóm glalen yó.

⁵ Yó se gónó kem Ju tódô mò du yóm kul kóyô bè yó kem hohon le. Gotu hnatay le lu mlan bè sudeng.

⁶ Bè yó bè Susa yóm hol yê yó kem syudad bè Pérsya, botong limu latu tau hnatay yó kem Ju bè yó.

^7-10 Gomong le lemen yó kem sfolò ngà Haman logi yóm Haman ngà Hamidata, yóm hohon yó kem Ju. Yó boluy yó kem ngaen, Pasandata ne Dalfun ne Aspata ne Purata ne Adalya ne Aridata ne Parmasta ne Arisay ne Ariday ne Basata. Okóm là kô nwa kem Ju du yó kem kimu yó kem tau hnatay le.

¹¹ Bè yóm kdaw yó, gotu tulón le bè yóm tau hol geta yóm kwen yó kem tau matay bè Susa.

¹² Yó gónóhen mon du mò ke Istér yóm tau hol geta, “Tek olo bè ni bè Susa, botong limu latu tau hnatay yó kem Ju gomong lemen yó kem sfolò ngà Haman logi. Ngunte ke hilu hnatay le bè yó kem dumu prubinsya. Ne ni, Boi Istér, wen he kô dumu bud nóyóem anì blayu kóm? Tulónem do dé anì nmou béléem.”

¹³ Bnalà Istér se, monen, “Ke yó dum hyu béléem, nam bud hulit hmò kul haya yó kem Ju bè ni bè Susa nim deng nmò le kemdaw ni. Ne gotu hetléwéngem yóm lówó yó kem sfolò ngà Haman logi bè yóm koyu deng hefdà mà le.”

¹⁴ Tahu se, nmò yóm tau hol geta yóm hnihen yó ne gotu heglalag le bè yó bè Susa. Yóm lówó yó kem sfolò ngà Haman logi tódô tléwéng le bè yó anì tódô kdéen tau mton kul.

¹⁵ Bè yóm gesfoloen fat kdaw bè bulón Adar, bud le stifun yó kem Ju nô bè Susa ne botong tlu latu tau bud hnatay le. Bud senged snéen laen dù kimu nwa le bélê le.

¹⁶ Okóm yó kem Ju nô bè ket prubinsya, gotu le setgel se kul mò lan le sofin. Tey dê hnatay le bè yó kem hohon le. Botong hitu folò limu libu tau kmutó nawa kul hnatay le. Okóm laen dù nwa le bè yó kem kimu le.

¹⁷ Nim khatay le ni nmò le bè yóm gesfoloen tlu kdaw bè yóm bulón Adar. Laen dù bud hnatay le ne bè yóm gesfoloen fat kdaw. Yó nmò le bè yóm kdaw yó, mò le ken bong ne ya tey kehligal le.

¹⁸ Okóm kul yó kem Ju bè Susa, fen le hligal bè yóm gesfoloen limu kdaw lemwót bè yóm deng keglà le yó kem hohon le bè yóm gesfoloen tlu kdaw efet kól bè gesfoloen fat kdaw. Ne deng le bè yóm gesfoloen limu kdaw.

¹⁹ Okóm yó kem Ju menwu bè yó kem benwu lemnek bè prubinsya, hlós gel hnigal le yóm gesfoloen fat kdaw bè yóm bulón Adar. Gel le mò ken ne gel le seblay.

Kmò le ken bong bè yóm kehligal le bè yóm kdaw boluy le du Purim

²⁰ Ne yó nmò Murdikay, gotu hsulaten kdê ni kem ni ne wen sulat hwiten ebè yó kem Ju bè klamang benwu Pérsya, lenwóten bè yó kem Ju menwu moni bè Susa efet kól bè yó kem Ju menwu mayuk.

²¹ Yó lem yóm sulat hwiten, tódô ket halay le hmigal du yóm gesfoloen fat kdaw ne gesfoloen limu kdaw bè yóm bulón Adar.

²² Ni se yó kem kdaw keglà kem Ju kul yó kem hohon le. Ni se yóm bulón hol kbalingen kligal yóm tehe alì klangag le. Yó hmò le kul, mò le ken bong ne gel wen senblay le ne bud gel benlay le yó kem tau élél.

²³ Tahu se, gotu lolò yó kem Ju nim hlolò Murdikay kul ni ne yó se hlós lolò le ket halay.

²⁴ Yó tehe nmò Haman yóm ngà Hamidata semfu gu bè yóm tehe Agag, yóm hohon yó kem Ju tehe wen atù nmoen yóm gel boluy le du, “purim” mò gónón temngón du yóm kdaw angat keglaen kul yóm kdéen Ju. Yó tehe atulen gotu sulék hnatayen lu.

²⁵ Okóm mógów ebè yóm tau hol geta Istér ne yó nmò yóm tau hol geta yó, wen udin nmoen anì mulék eta Haman yóm sidek tô atulen bè yó kem Ju. Mom Haman hetléwéng le, mung tléwéng le béléen yó kem ngaen logi bè yóm koyu tehe hefdaen.

²⁶ Yó se gónó le tmaba du Purim nim kehligal le ni, abay se yó lanen yóm udél yó “atù.” Duhen yó, lemwót bè yó kem sulat Murdikay ne lemwót bè yó kem deng glan le

²⁷ yó nmò yó kem Ju bè klamang yóm benwu yó, lu mbut du yóm kehligal yó mò hlós lolò yó kem lugod le ne yó kem dumu tau angat baling Ju. Bè ket halay ke kól nim lewu kdaw ni, tey kehligal le lemwót bè yóm hlolò Murdikay kul.

²⁸ Ni kem kdaw ni, hlós hlolò le bè ket kmuleng bè yó kem Ju ne bè ket lugod le ne bè ket prubinsya gónó le nô ne bè ket syudad le. Là kô kó le du yóm kehligal le bè ni kem kdaw ni ne là se kó le du yóm tendo ktulón le du bè yó kem lugod le.

²⁹ Duhen yó lemwót Boi Istér yóm ngà Abihail libun, lewu le Murdikay bud le smulat, mung du yóm kwalis Istér boi anì hol lolò yóm kdéen tau yóm deng snulat Murdikay, duhen yóm hlolò bè yóm kdaw boluy le du Purim.

³⁰ Yóm sulat yó, hwit le ebè kdéen Ju nô bè klamang yó kem 127 prubinsya glem lem Pérsya. Yó nô lem yóm sulat yó duhen yóm hol kehdeen le du bè yó kem Ju yóm kenek kbenwu le ne yóm klaen dù bud knikò le.

³¹ Yó hol bótóngen anì lolò le yóm hlolò le kul bè yóm kdaw Purim bè ket halay, kkólen bè yóm angat bud klolò le du se kul yó kem angat lugod le. Ni se yóm hol hlolò Murdikay ne Boi Istér yó kem Ju. Nim hlolò ni, tódô henmóyô yó kem Ju hol lómón yóm tehe kehmóyô le yóm udin bè yóm kfasting le ne bè yóm klangag le.

³² Yóm hlolò Istér kul bè kdaw Purim yó, gotu snulat le bè yóm bok gónó le gel smulat yó kem gel lolò le.