Istér 8 - Udél Dwata: Gna Kesfasad ne Lomi Kesfasad

Kegmò kem Ju bè yó kem hohon le

¹ Bè yóm kdaw yó, gotu blay Sérksis ke Boi Istér yóm kentihen nfun Haman, yóm tau hmohon yó kem Ju. Ne yó he ktulón Istér du yóm tau hol geta yóm kdumuhen ke Murdikay. Omin le mit ke Murdikay ebè yóm tau hol geta.

² Tódô nlus yóm tau hol geta bè tdoken yóm tisingen, yóm wen ilóen nô du, (yóm tising deng bud nwahen bè Haman) ne oguhen ke Murdikay. Ne ke Istér kun, bud hogoten ke Murdikay se yóm kdê tehe nfun Haman.

³ Ne bud mudél ebè yóm tau hol geta Istér, bede tódô hegluduk klohok tihen mung du kiken. Henkoduhen béléen ke hol hensengen yóm udin deng tehe hsulat Haman yóm tau sfu Agag, bè yóm tô keglaen yó kem Ju.

⁴ Omin Sérksis bud dmugol du ebè Istér yóm tuged blówón gel nogoten ne mdà Istér, yó monen mò yóm tau hol geta,

⁵ “Ke yó dum hyu béléem, ne ke hyu nawahem ebéléu ne hyu kegnómem du bè nim tô bud hnihu béléem ni, holi bud mò udin mò seng yóm tehe udin hwit Haman yóm ngà Hamidata sfu Agag, bè yóm tô keglaen yóm kdéen Ju bè klamang benwu knamalem.

⁶ Là kô gbeku hembala du ke deng glumfak bè yó kem dou dumu nim atulen ni. Là gbeku hembala du snéen ke gotu le matay yó kem dou dumu setwoli.”

⁷ Yó mon Sérksis mò ke Boi Istér lewu le Murdikay yóm tau Ju, “Ngem, deng hetléwéngu Haman bè yóm tô khatayen yó kem Ju ne deng blayu ke Istér se yóm kdê nfunen.

⁸ Okóm yóm udin deng hwiten mlan bè boluyu ne deng hdanaen lemen tisingu, là kô gbeku mkó du. Okóm ni dii nmoem, Murdikay, smulati ebè yó kem dumuhem Ju ke tedu nóyóem mò lanem hemseng yóm udin yó. Snulatem mlan bè boluyu ne hdanaem lemen tisingu.”

⁹ Tahu se, tódô kendel htaba Murdikay yó kem tau gel smulat bè yóm tau hol geta. Yóm kehtabahen kul yó, bè gewuhen folò tlu kdaw bè yóm getluhen bulón yóm bulón boluy le du Siban. Hsulaten kul yóm udin hwiten ebè yó kem Ju ne ebè yó kem gubérnor le ne ebè yó kem tau wen hogot le kul ne ebè kdê yó kem dumu tau wen glalen bè yó kem 127 prubinsya nogot Sérksis, lenwóten bè benwu Indya fi dmata kdaw efet kól bè benwu Sudan fi leged. Yóm sulat hwiten yó hwiten ebè ket prubinsya, hsulaten bè kul udél ne bè kul kmò ksulat. Senged se bè yó kem Ju, hsulaten bè kul udél ne bè kul kmò ksulat snéen.

¹⁰ Yóm hsulat Murdikay yó, hlanen bè boluy Sérksis ne hdanaen lemen tising yóm tau hol geta yó. Yó kem sulat yó, heted le yó kem tau gel meted sulat smakay yó kem kudà alì mlóy, hónô kudà yóm tau hol geta.

¹¹ Yó nô lem nim sulat ni, duhen yóm deng kóyô Sérksis ke setgel yó kem Ju bè ket syudad anì gbek le mofin knô le. Balù kihu prubinsya gónó le nô, ke wen kem tólóng tau sut tô hmatay yó kem Ju, logi duhen libun duhen ke kem ngà tódô le matù. Hyu ke gotu hnatay yó kem Ju yó kem hohon le ne hyu se ke gotu nwa le yóm kdê nfun le.

¹² Bè klamangen benwu Pérsya gónó kem Ju mò du nim lomi udin ni, nmò le bè yóm gesfoloen tlu kdaw bè yóm gesfoloen lewu bulón, yóm bulón boluy le du Adar. Yó se yóm kdaw deng tehe nélék Haman bè yóm tô keglaen yó kem Ju.

¹³ Nim sulat ni, deng baling udin bélê le ne gotu heglalag le bè kdéen tau bè ket prubinsya anì yó, lemwót yó kem Ju eles le htifes bè yóm katù le yó kem hohon le ke sok kól yóm kdaw tô keglà le kul.

¹⁴ Duhen yó lemwót bè udél yóm tau hol geta, tódô le lemwót yó kem tau fen meted du yó kem sulat yó, snakay le yó kem kudà yóm tau hol geta ne ya tey kehlóy le yó kem kudà le. Yóm udin yó bud glalag bè yó bè Susa, bè yóm gónô bong gónóhen nô yóm tau hol geta.

¹⁵ Kewót Murdikay bè yó bè gónô bong yóm tau hol geta leseken yóm nes bè yóm kegetahen, yóm nes ginggung ne bukay ne bud wen nes tilob megem ginggung suen tahen. Hyu wen kuruna blówón alì knóón suub bè kuluhen. Bè yóm kungol le du yó kem tau bè yó bè Susa yóm lomi udin yó ya tey kehligal le.

¹⁶ Bè yó kem Ju bè yóm kdaw yó, ya tey kehligal le se kul ne tey kadat le kul yó kem tólóng tau.

¹⁷ Bè ket syudad ne ket prubinsya gónón e glalag yóm lomi udin yóm tau hol geta yó ya tey kehligal yó kem Ju nô bè yó. Gotu le hligal mò ken. Bè ktahuhen, bè yóm kdaw yó tey dê tólóng tau hbaling Ju lemwót bè klikò le kul.