Istér 7 - Udél Dwata: Gna Kesfasad ne Lomi Kesfasad

Khatay le ke Haman

¹ Duhen yó, mógów le ebè yóm ken nmò Istér le Sérksis lewu le Haman.

² Bè yóm igò le tolo minum yóm tifas grép gel ninum le bè yóm bud kógów le yó bud snólóken Istér yóm tau hol geta yó, “Yó ne, Boi Istér, tedu se tgutem do du? Tulónem do anì blayu kóm. Baluen he ke hnihem sóól nim benwu knamalu tódô blayu kóm.”

³ Mon Istér se, “Ke yó dum hyu béléem, hol hnungolem dou nim tô hnihu béléem. Yó tgutu kóm hol hlowilem o dalang se yó kem dou tau.

⁴ Abay se deng wen tau bemli kum anì gotu hfatayen mi kdê me. Ke yó dum tódô btol benlihen mi mò heseken là kô naw e hnala kóm. Okóm ni, gotu himot hfatayen mi kun.”

⁵ “Na,” mon Sérksis, “tau du se tô mlos mò du myó du? Gónóhen nô se tau yó?”

⁶ Mon Istér se, “Yóm alì hmohon kum ne tô gemlà kum ni sem Haman nii, yóm tau alì sidek balu.” Tódô lemusék Haman lemwót bè yóm alì ksidek klikoen bè yóm igoen myón bè solu yóm tau hol geta ne yóm libun boi.

⁷ Omin Sérksis tódô hebkó mdà lemwót bè yóm alì kebuten tódô tebelen lu mógów ebè lewà etalak lósólen. Tódô gnóm Haman yóm angat kehfatayen du yóm tau hol geta yó gónón tebel bè yó se kun, tódô hendlaen hkodu bè Istér anì là matayen.

⁸ Tódô kem hegluduk bè yóm gónóhen nô Istér na a hkodu béléen. Geslaen se bud kuléken elemen yóm tau hol geta gu bè lósólen. Bè yóm ktonen du yóm nmò Haman tódô hetê, monen, “Moen du ke deng mom glefem yóm yehenu igoen tolo nô béléu bè ni lem gónóu?” Unihen mon du nim ni yóm tau hol geta, uni le lemimun kulu Haman yó kem tau gel tóbóng lówó yóm tau hol geta, yó se ilô yóm khatay le du.

⁹ Ne wen sotu tau bélê le boluyen Harbuna fen mon du mò ke Sérksis, “Ngem kun, deng eles wen koyu hdà Haman klohok gónóen mò gónóhen hetléwéng ke Murdikay yóm tau tehe gónóm temngón du yóm tô khatay le kóm. Botong lewu folò lewu mitru kegetahen.” Yó udél yóm tau hol geta, monen, “Haman dé tléwéng ye du.”

¹⁰ Tahu se, tléwéng le Haman bè yóm koyu tô hefdaen bè Murdikay. Ominen yó he malù lembó kebut yóm tau hol geta.