Istér 5 - Udél Dwata: Gna Kesfasad ne Lomi Kesfasad

Ktinok Istér ke Sérksis lewu le Haman ebè yóm ken nmoen

¹ Timbow deng tlu butengen bè yó omin Istér lemsek yóm nes libun boi, mógów ebè gónô bong bè Sérksis. Tikóng kól ditu, tódô htengen mdà bè lewà yóm bak dól yóm dfél yóm tau hol geta. Ne nô lemen yóm tau hol geta myón bè yóm bangkù gónón myón kmamal bede smolu ebè bak dól.

² Timbow tonen Boi Istér mdà bè lewà tódô kendel hnódóhen, dugolen ebéléen yóm tuged blówón gel nogoten. Omin Istér ganag mógów ebéléen nduen tukô yóm tuged blówón yó.

³ “Nógówem kut ni du, Boi Istér?” sólók yóm tau hol geta. “Tulónem do ke tedu nóyóem, tódô blayu kóm. Baluen he ke hnihem béléu sóól nim benwu nogotu, tódô blayu kóm.”

⁴ Bnalà Istér se, monen, “Ke yó dum hyu béléem, tô tinoku yu lewu ye Haman ebè yóm ken deng nmou bélê ye kemdaw ni.”

⁵ Omin yóm tau hol geta tódô hangay ke Haman anì na le e mógów ebè yóm ken gónó Istér e tminok kul. Tahu se, mógów Sérksis lewu le Haman ebè yóm ken nmò Istér yó.

⁶ Bè yóm igò le tolo minum yóm kul tifas grép bud snólók Sérksis Istér, “Tulónem do dé yóm nóyóem anì tódô blayu kóm. Kihu nóyô hnihem béléu blayu kóm, baluen he ke hnihem sóól yóm benwu knamalu.”

⁷ Bnalà Istér se, monen,

⁸ “Ke yó dum hyu béléem, bud tinoku yu lewu ye Haman bè yóm sotu ken bud nmou bélê ye haya. Bè yó he gónóhu tmulón du kóm yóm nóyô tulónu kóm.”

Kóló khatay Haman ke Murdikay

⁹ Bè yóm kewót Haman bè yó ya tey kehligalen, tilob kegnómen du. Okóm bè yóm ktonen ke Murdikay myón bè bak tikeb yóm gónô bong ne là dogen mdà duhen ke wen dumu nmoen mò gónón hegfan yóm kadaten du bè yóm kiwesen bè yó, ya tey sidek kebut Haman du.

¹⁰ Okóm nafasen nawahen ne hlós mulék ebè gónóen. Ominen tminok ebè gónóen yó kem ween ne hyu hmungen bè yó yehenen snéen boluyen Siris.

¹¹ Ya tey ksaluen knóen. Gotu tulónen kul yóm alì kbong kendengenen ne yóm alì wadag ngaen. Bud tulónen snéen yóm deng kehegeta Sérksis glalen ne yóm alì kehegetahen du senta yó kem dumu tau genlalen.

¹² “Lelen yó he,” mon Haman, “wen ken nmò Boi Istér bélê me, laen dù dumu tau tinoken e du tek són yóm tau hol geta ne ou. Ne haya bud tinoken mi.

¹³ Okóm,” mon Haman, “lómón tô klifótu kdê ni kem ni ke bud tonu yóm sotu tau Ju boluyen Murdikay myón bè bak tikeb yóm gónô bong.”

¹⁴ Ne yó mon yehenen mò du ne yó kem ween, “Moem là hefdà yóm koyu gónó le gel tméwéng tau, lewu folò lewu mitru kegetahen. Hlafus haya hnihem bè yóm tau hol geta anì tléwéngem du Murdikay. Ke deng yó, hligali ne mógówi ebè tum ken gónó Boi Istér tminok kuy.” Tahu se, hyu nawa Haman du yóm atul tulón le du yó, yó gónón kendel hefdà yóm koyu gónó le gel tméwéng tau.