Istér 4 - Udél Dwata: Gna Kesfasad ne Lomi Kesfasad

Kni Murdikay tóbóng bè Istér

¹ Timbow tngón Murdikay nim ni, tódô kentóhen yóm nes bè lówóhen ne tles bud leseken nes sakù lemwót bè yóm alì sidek khéét kegnómen du. Tódô tenfengen kohù kuluhen ne mógów lem yóm syudad yó, tódô hendlaen lemanu

² efet kól bè bak tikeb yóm gónô bong, bede olon mdà bè lewaen abay se là heflós le du e lemen yóm tau mnes sakù.

³ Bè kdê yó kem prubinsya deng gónón e glalag yóm udin yó, gotu le langag yóm kdéen Ju. Là kô le mken, gotu le mkik ne lemanu ne tey kwen le mnes sakù ne gotu hensù le kohù yóm gónó le hlilil.

⁴ Tikóng ton le Murdikay yó kem ngà libun gel tóbóng lówó Istér dalang se yóm tau kafun gel mentey du, tódô henmung tulón le ke Istér ne ya tey ketfà nawa Istér bè yóm kungolen du. Wen nes hwiten ebè Murdikay mò tles yóm nes sakù leseken. Okóm mom kenbê Murdikay.

⁵ Omin Istér htaba ke Hatak yóm tau kafun deng nélék yóm tau hol geta, mò tóbóng lówó Istér, hógówen ebè Murdikay nan e hsólók du yóm lenangagen ne ke tedu buten yóm nmoen yó?

⁶ Tahu se, mógów ebè Murdikay Hatak ebè yóm plasa bè bak tikeb yóm gónô bong.

⁷ Gotu tulón Murdikay ke Hatak yóm kdéen ne bud tulónen snéen yóm tey filak deng hmóyô Haman ke Sérksis mò hamaen bè yóm benwu nogoten ke deng gotu hfatayen yóm kdéen Ju.

⁸ Ne oguhen ke Hatak yóm udin lomi nmò le bè yó bè Susa, duhen yóm gotu khatay le yóm kdéen Ju. Ne yó mon Murdikay mò ke Hatak, “Hol nwitem ebè Istér nim sulat ni ne hol tulónem du yóm angat glumfak me ni. Yake hol mógów ebè tum tau hol geta ne hol henkoduhen béléen anì hol hlowilen lu yó kem kun dumu Ju.”

⁹ Tahu se, gotu nmò Hatak yóm deng mon Murdikay mò du yó.

¹⁰ Bè yóm kungol Istér du, bud huléken Hatak ebè Murdikay ne wen udél hwiten ebéléen, monen,

¹¹ “Yóm udin bè nim benwu ni, ke wen tau logi duhen libun lembù mógów ebè tum tau hol geta na a ston du ke là deng tinoken du, tódô hnatay le. Laen dù tau bè klamang nim benwu nogoten ke là deng tngónen du yóm udin ni, lenwóten bè yó kem tau gel hmau du kkólen bè yó kem tau hkawang bè prubinsyahen. Són gónón là matay ke dugol yóm tau hol geta ebéléen tum tuged blówón gel nogoten. Blaem deng sbulónen ni ne yóm kegenen là deng bud tminok dou yóm tau hol geta.”

¹² Timbow gefet bè Murdikay yóm udél hwit Istér yó

¹³ yó bud gónón hemwit udél ebè Istér se kun, monen, “Béem hendem ke són uu gewà bè yó kem dumuhem Ju lemwót bè yóm knóem bè gónô bong.

¹⁴ Ke tódói fen henek kóm bè nim kdaw ni, ngem sok angat sut yóm tóbóng mò lemwà yó kem Ju, yóm tóbóng là lemwóten béléem, ngem kà uu ne yó kem dumum setwoli fen matay. Okóm déke ni se yóm hol bótóng gónóm baling libun boi anì wen lanem gemtóbóng yó kem kóm tau.”

¹⁵ Ne bud hwit Istér ebè Murdikay balà yóm udélen yó, monen,

¹⁶ “Gotu sentifunem kdéen Ju bè Susa anì gotu ye fasting. Hol bê ye tagad mken duhen ke minum lem yóm tlu buteng. Senged se dou ne yó kem ngà libun gel tóbóng lówóhu bud nmò me se kum. Sok deng yó, mógówe ebè tum tau hol geta baluen ke nuléhu yóm udinen. Ke mataye du nim nmou ni kem kunen ne.”

¹⁷ Tahu se, lemwót Murdikay, gotu nmoen yóm deng tinok Istér ebéléen yó.